قوعام • 11 تامىز، 2022

اتا-انالار جەكەمەنشىك بالاباقشالارعا شاعىمدانىپ جاتىر

36 رەت كورسەتىلدى

وقۋ-اعارتۋ مينيسترلىگىنە تاربيەشىلەردىڭ بالالارعا قول جۇمساۋىنا، سونداي-اق بالاباقشادا بالالارعا جاسالعان ساپاسىز جاعدايعا، كەيبىر جەكەمەنشىك بالاباقشالاردىڭ جوسىقسىز جۇمىسىنا قاتىستى شاعىمدار ءتۇسىپ جاتىر، دەپ حابارلايدى Egemen.kz.

اتا-انالار بالاباقشالاردىڭ قىزمەتىن ەشكىم رەتتەمەيتىنىن ايتىپ، شارا قولدانۋدى تالاپ ەتىپ جاتىر. ماسەلەن، قوستاناي قالاسىندا بالاباقشا تاربيەشىسى ءۇش جاسار ءبۇلدىرشىندى قاتتى تارتىپ جىبەرگەن، ناتيجەسىندە ونىڭ سۇيەگى سىنىپ كەتكەن. تاربيەشى جۇمىستان شىعارىلدى، ال بالاباقشا ديرەكتورى اكىمشىلىك جاۋاپقا تارتىلدى.

ورال قالاسىنداعى جەكەمەنشىك بالاباقشادا دا ۇقساس جاعداي بولعان، وندا تاربيەشى كىشكەنتاي قىزعا قول كوتەرگەن.

جاقىندا ورالداعى تاعى ءبىر جەكەمەنشىك بالاباقشانىڭ تاربيەشىسىنە قاتىستى شاعىم كەلىپ ءتۇستى. بالالار اتا-انالارىنا تاربيەشىنىڭ ۇرعانىن ايتىپ بارعان. تاربيەلەنۋشىلەردىڭ ايتۋىنشا، تاربيەشى «اپايلار» ولاردى بىرنەشە اي بويى ۇرىپ-سوعىپ كەلگەن. بالالار تاربيەشىسىنەن قورىققاندىقتان وسى ۋاقىتقا دەيىن اتا-انالارىنا ەشتەڭە ايتپاعان. بالاباقشا قىزمەتكەرىنە قاتىستى قىلمىستىق ءىس قوزعالدى.

ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق باسقارمالارعا بالاباقشاداعى بۇلدىرشىندەردىڭ ءتۇرلى جاراقاتتارى تۋرالى اقپارات كۇن سايىن ءتۇسىپ جاتقانى انىقتالدى.

قىزىلوردا قالاسىنداعى جەكەمەنشىك بالاباقشادا بۇلدىرشىندەردى قاراۋسىز قالدىرۋ فاكتىلەرى تىركەلدى. دالاعا ءوز بەتىمەن شىعىپ كەتكەن بالالاردى قالانىڭ تۇرعىندارى تاۋىپ العان. ءدال وسىنداي جاعداي ەلوردالىق بالاباقشادا دا ورىن العان ەكەن. تاربيەشىلەر تارتىپتىك جاۋاپقا تارتىلدى.

«قۇقىق بۇزۋشىلىقتاردىڭ سانىن ازايتۋ جانە بالاباقشالاردىڭ جۇمىسىن رەتكە كەلتىرۋ ءۇشىن ءبىز ليتسەنزيا بەرۋ ءتارتىبىن ەنگىزۋدى قولعا الىپ وتىرمىز. بۇل بالالاردىڭ بالاباقشاداعى قاۋىپسىزدىگىن جاقسارتادى. ەگەر بالاباقشا تالاپقا ساي بولسا، وندا قىسقا ۋاقىت ىشىندە تسيفرلى ليتسەنزيا الادى. ال ەگەر ساي بولماي شىقسا، كەمشىلىكتەردى جويۋعا ۋاقىت بەرىلەدى. ليتسەنزيا بەرۋ تالاپتارى قاراپايىم. ودان قورقۋدىڭ قاجەتى جوق. جۇمىس ىستەپ تۇرعان بالاباقشالاردىڭ باسىم كوپشىلىگى ليتسەنزيانى وڭاي الا الادى. ءبىز بالالاردى ساپالى مەكتەپكە دەيىنگى تاربيە مەن وقىتۋمەن قامتاماسىز ەتۋگە مۇددەلىمىز»، دەدى وقۋ-اعارتۋ مينيسترلىگىنە قاراستى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى گۇلزات كوبەنوۆا.

سوڭعى جاڭالىقتار

ءرۋبلدى ساتىپ الۋ 31%-عا ءوستى

ەكونوميكا • بۇگىن، 15:23

ۇقساس جاڭالىقتار