ۇلتتىق اكادەميالىق كىتاپحانادا اباي كۇنىنە ارنالعان «اباي تاعىلىمى» اتتى ادەبي-مەرەكەلىك جيىن ۇيىمداستىرىلدى. اتاپ ايتساق, «اباي الەمى» اتتى كەڭ كولەمدى كىتاپ كورمەسى مەن سيرەك قورداعى ماتەريالدار ۇسىنىلعان كورمە وتكىزىلدى. سونداي-اق ەلىمىزگە بەلگىلى ابايتانۋشىلاردىڭ قاتىسۋىمەن وتكەن دوڭگەلەك ۇستەلدە اقىن ءومىرى مەن شىعارماشىلىعى تۋرالى ءتۇرلى تاقىرىپتا باياندامالار وقىلدى. ودان بولەك اباي شىعارمالارىن مانەرلەپ وقۋ مارافونىنا مەكتەپ وقۋشىلارى قاتىسىپ, ءوز ونەرلەرىن كورسەتتى. اقىن مۇرالارىن بىلۋگە ارنالعان ۆيكتورينامەن جالعاسقان مەرەكەلىك جيىن باسقا دا تانىمدىق ءىس-شارالارعا ۇلاستى.
ء«ار حالىقتىڭ, ۇلتتىڭ بۇگىنگى كۇنمەن استاسقان ماسەلەسىن كەشەگىمەن, ەرتەڭگىمەن جالعاستىراتىن ۇلى تۇلعالارى بولادى. ءبىز ءۇشىن دە كونە تۇركى جازۋلارى مەن اباي يدەياسى – سونداي ۇلى قۇندىلىق. سوندىقتان دا اباي كۇنىن اتاپ ءوتۋ – ۇلت ءۇشىن ۇلكەن رۋحاني ەسەپ. مەملەكەت باسشىسىنىڭ جارلىعىمەن بيىل ءۇشىنشى رەت اتاپ وتىلەتىن اباي كۇنىنە ارنالعان جيىنىمىزدىڭ ماقساتى – حاكىم ابايدىڭ تەڭدەسسىز مۇراسىن حالىققا جەتكىزۋ, جاس ۇرپاقتىڭ ساناسىنا اقىن يدەياسىن ءسىڭىرۋ», دەيدى ۇلتتىق اكادەميالىق كىتاپحانا ديرەكتورى عازيزا قۇدايبەرگەنقىزى.
مادەنيەت جانە سپورت مينيسترلىگىنىڭ قولداۋىمەن وتكەن مەرەكەلىك جيىنعا قازاقستانداعى ديپلوماتيالىق ەلشىلىكتەر, فيلولوگيا عىلىمدارىنىڭ دوكتورى شاكىر ىبىراەۆ, كۇيشى, كومپوزيتور جانعالي ءجۇزباي, ابايتانۋشى, عالىم سۇلتان ىبىراي, فيلولوگيا عىلىمدارىنىڭ كانديداتى ەربول تىلەشوۆ, ابايتانۋشى, عالىم ەرنات قاشقىنوۆ جانە باسقا دا ادەبيەتشىلەر مەن زيالى قاۋىم وكىلدەرى قاتىستى.
سونىمەن قاتار اباي كۇنىن ەلوردالىق پوليتسەيلەر دە اتاپ ءوتتى. مەرەيلى مەرەكە اياسىندا نۇر-سۇلتان قالاسىنىڭ پوليتسيا دەپارتامەنتى اقىننىڭ 177 جىلدىعىنا ارنالعان بىرقاتار ءىس-شارا ۇيىمداستىردى. ماسەلەن, دەپارتامەنتتە ابايدىڭ اسىل مۇراسىن ناسيحاتتايتىن «تۇلعاعا تاعزىم» اتتى كىتاپ كورمەسى قويىلدى. سونداي-اق دەپارتامەنتتىڭ ۆەدومستۆولىق مۋزەي باسشىسى, تاريح عىلىمدارىنىڭ ماگيسترى شىنار ۋايسوۆا جەكە قۇرام اراسىندا اباي قۇنانباي ۇلىنىڭ ءومىرىن ناسيحاتتاۋ, اقىننىڭ شىعارماشىلىعى ارقىلى پاتريوتتىق رۋحتى تاربيەلەۋ بويىنشا ءدارىس وتكىزدى.
ايتا كەتەيىك, ءدارىستىڭ ماقساتى – اقىن مۇراسىنىڭ قازاق رۋحانياتىندا الار ورنى, ۇرپاق تاربيەسىندەگى ماڭىزى مەن ونىڭ قۇندىلىعى, ۇلتتىق يدەولوگيانى قالىپتاستىرۋداعى ءرولى جونىندە كەڭىنەن اقپارات بەرۋ, سول ارقىلى ءتارتىپ ساقشىلارىنىڭ پاتريوتتىق, ەرلىك, جىگەرلىك سەزىمدەرىن نىعايتۋ بولىپ وتىر.
ءىس-شارا بارىسىندا پوليتسەيلەر عۇلاما اقىننىڭ ولەڭدەرىمەن, ابايتانۋشىلاردىڭ زەرتتەۋلەرىمەن تەرەڭىرەك تانىسىپ, كۇندەلىكتى قاربالاس جۇمىستارىنان ءبىر ۋاقىت الشاقتاپ, پايدالى ماعلۇمات الدى.
اباي كۇنىنە وراي قازاقستانداعى اقش ەلشىلىگىنىڭ قىزمەتكەرلەرى دە اباي ولەڭدەرىن وقىپ, بەينەجازبا تاراتتى.
«قازاقستانعا كەلگەلى بەرى ءبىز دە حاكىم اباي قۇنانباي ۇلىنىڭ ولەڭدەرىمەن تانىسۋدى ءجون كوردىك. سونىمەن قاتار ءۇزىندى بولسا دا كەيبىرىن جاتقا ايتقىمىز كەلەدى», دەيدى برايان ەسىمدى قىزمەتكەر ءوزىنىڭ بەينەۇندەۋىندە.
اتاپ ايتساق, اقش ەلشىلىگىنىڭ قىزمەتكەرلەرى «سەنبە جۇرتقا, تۇرسا دا قانشا ماقتاپ», «قۇلاقتان كىرىپ, بويدى الار» ولەڭدەرىن وقىسا, ال دجون ەسىمدى تاعى ءبىر قىزمەتكەر «كوزىمنىڭ قاراسى» ءانىن ورىنداپ بەردى.
اقىننىڭ تۋعان كۇنىنە ارنالعان بۇل مارافون بەيجىڭدە دە جالعاستى. بەيجىڭنىڭ ورتالىق «چاويان» ساياباعىنداعى «تسزينتاي» مۋزەيىندە اباي كۇنىن مەرەكەلەۋ اياسىندا اباي وقۋلارى ءوتتى. ءىس-شارا 2014 جىلى ناۋرىزدا قىتاي استاناسىنىڭ ورتالىعىنداعى «چاويان» ساياباعىندا ورناتىلعان اباي ەسكەرتكىشىنە (اۆتورى – ايگىلى قىتاي ءمۇسىنشىسى يۋان سيكۋن) گۇل قويۋ راسىمىنەن باستالدى.
اباي وقۋلارىن قحر مينيسترلىكتەرى مەن ۆەدومستۆولارىنىڭ, شىۇ حاتشىلىعىنىڭ وكىلدەرى, قىتايداعى تمد ەلدەرى ديپلوماتيالىق وكىلدىكتەرىنىڭ باسشىلارى, قازاقستاندىق جانە قىتايلىق ستۋدەنتتەر تىڭدادى. سونداي-اق مادەني جيىن قوناقتارى قازاق جانە قىتاي تىلدەرىندەگى اباي شىعارمالارىنىڭ جيناقتارىمەن تانىستى.
قازاقستاننىڭ قحر-داعى ەلشىسى شاحرات نۇرىشەۆ قۇتتىقتاۋ سوزىندە ابايدىڭ شىعارماشىلىعى, ونىڭ قازاق فيلوسوفياسى مەن ادەبي ءتىلدى قالىپتاستىرۋداعى رولىنە توقتالدى. ەلشى 2015 جىلدان باستاپ بەيجىڭ, شانحاي, داليان جانە سيان جوعارى وقۋ ورىندارىندا «قازاقستان ورتالىقتارى» مەن قازاق ءتىلى كافەدرالارى اشىلعانىن, وندا قازاق ادەبيەتى, مادەنيەتى, تاريحى جانە اباي شىعارمالارى زەرتتەلەتىنىن باياندادى.
