اباي • 10 تامىز، 2022

بۇگىن – اباي قۇنانباي ۇلىنىڭ تۋعان كۇنى

136 رەت كورسەتىلدى

ەكى جىلدان بەرى ەلىمىزدە 10 تامىز - ۇلى اقىننىڭ قۇرمەتىنە مەرەكەلىك داتا رەتىندە اتالىپ وتەدى، دەپ حابارلايدى Egemen.kz.

عىلىمي ورتادا قازاقتان شىققان ۇلى ويشىلدىڭ تۋعان كۇنى تۋرالى ەكى ءتۇرلى نۇسقا تاراسا دا، جىلدار بويى 10 تامىز رەسمي تۇردە اباي قۇنانباي ۇلىنىڭ تۋعان كۇنى رەتىندە تاڭبالانىپ كەلدى. ابايدىڭ 175 جىلدىق مەرەيتويى قارساڭىندا بۇگىنگى ايتۋلى كۇن كۇنتىزبەگە اباي كۇنى رەتىندە رەسمي بەكىتىلگەن.

«قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2017 جىلعى 31 قازانداعى №689 قاۋلىسىنا تولىقتىرۋ ەنگىزۋ تۋرالى «قازاقستان رەسپۋبليكاسىنداعى مەرەكەلەر تۋرالى» 2001 جىلعى 13 جەلتوقسانداعى قازاقستان رەسپۋبليكاسى زاڭىنىڭ 4-بابىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى:

1. «قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2017 جىلعى 31 قازانداعى № 689 قاۋلىسىنا (قازاقستان رەسپۋبليكاسىنىڭ ءپۇاج-ى، 2017 ج.، № 53، 343-قۇجات) مىناداي تولىقتىرۋ ەنگىزىلسىن: كورسەتىلگەن قاۋلىمەن بەكىتىلگەن قازاقستان رەسپۋبليكاسىنداعى مەرەكەلىك كۇندەردىڭ تىزبەسى: مىناداي مازمۇنداعى 22-1-تارماقپەن تولىقتىرىلسىن: «22-1. اباي كۇنى – 10 تامىز». 2. وسى قاۋلى العاشقى رەسمي جاريالانعان كۇنىنەن كەيىن قولدانىسقا ەنگىزىلەدى»، دەلىنگەن ۇكىمەت قاۋلىسىندا.

اقىننىڭ 175 جىلدىق مەرەيتويى اياسىندا 2020 جىلى الەمنىڭ 70-كە جۋىق ەلىندە اباي تويىنا ارنالعان 250-دەن استام ءتۇرلى ءىس-شارا ءوتتى.

اباي قۇنانباي ۇلى عۇلاما عالىم، ويشىل اقىن، اعارتۋشى ۇستاز رەتىندە ۇلتىمىزدىڭ تۇعىرى بيىك ماقتانىشى.

اباي شىعارماشىلىعى - الەمدىك تۋىندىلار قاتارىندا ورىن العان حالقىمىزدىڭ باعا جەتپەس مۇراسى مەن رۋحاني ازىعى.

قالا اكىمدىگىنىڭ رەسمي سايتىندا حابارلانعانداي، بۇگىن ەلوردادا بۇل بىرقاتار مادەني ءىس-شارا ۇيىمداستىرىلادى.

«اتامەكەن» قازاقستان كارتاسى» ەتنو-مەموريالدىق كەشەنىندە اقىنعا ارنالعان «اباي دارا، اباي دانا قازاقتا» اتتى ءدارىس وتەدى.

ساكەن سەيفۋللين مۋزەيىندە «اباي الەمى» اتتى پوەزيا كەشى ۇيىمداستىرىلادى. كەش بارىسىندا زەرتتەۋشىلەرمەن، ابايتانۋشىلارمەن كەزدەسۋ ءوتىپ، اقىننىڭ شىعارمالارى مەن ولەڭدەرى وقىلادى.

ورتالىق قالالىق كىتاپحانادا ساعات 11:00-دە باستالاتىن «اباي دانا، اباي دارا قازاقتا» اتتى پوەزيا ساعاتىندا اقىن شىعارماشىلىعىمەن تولىعىراق تانىسۋعا بولادى. وسىندا ساعات 12:00-دە «اباي – ۇلى تۇلعا» تاقىرىبىندا تاعى ءبىر ءىس-شارا وتەدى. وندا ەلوردا تۇرعىندارى كورنەكتى اعارتۋشىنىڭ عىلىم مەن مادەنيەتكە قوسقان ۇلەسىن باعالاۋعا، ونىڭ پاتريوت، ازامات جانە اقىن رەتىندەگى تۇلعاسىنىڭ ماڭىزدىلىعى تۋرالى تۇسىنىكتەرىن كەڭەيتۋگە مۇمكىندىك الادى.

ساعات 12:00-دە №2 قالالىق كىتاپحانادا مۇحتار اۋەزوۆتىڭ «اباي جولى» شىعارماسىنا ارنالعان ادەبي ساعات وتەدى.

ۇلى اقىننىڭ قالىپتاسۋى تۋرالى تىڭداپ قانا قويماي، ءومىرى تۋرالى ادەبي كومپوزيتسيانى قۋىرشاق تەاترىندا تاماشالاۋعا بولادى. مۇندا ساعات 16:00-دە ك.ەجەمبەكتىڭ «جارىق ساۋلە» قويىلىمى ساحنالانادى.

سونداي-اق قالا تۇرعىندارى مەن قوناقتارى «الجير» مەموريالدى-مۇراجاي كەشەنىندە «ابايدىڭ قۋعىن-سۇرگىنگە ۇشىراعان ۇرپاقتارى مەن تۋىستارى» كورمەسىن تاماشالاي الادى. كورمەدە ابايدىڭ تۋىستارى مەن ۇرپاقتارىنىڭ فوتوسۋرەتتەرى كورسەتىلەدى.

ال ورتالىق كىتاپحانا «اققۋعا ءۇنىن قوسقان – كەمەل دارىن» اتتى كورمەلەر تسيكلىن باستايدى. كورمەدە ابايدىڭ عانا ەمەس، حالقىمىزدىڭ وزگە دە جازۋشىلارى مەن اقىندارىنىڭ شىعارماشىلىعىمەن تانىسۋعا بولادى.

سوڭعى جاڭالىقتار

ۇقساس جاڭالىقتار