اجىراسقانداردىڭ ءوز مىندەتتەمەلەرىن ورىنداي الماي, جاۋاپكەرشىلىكتەن قاشىپ, اليمەنت تولەۋدەن جالتارىپ جۇرگەندىگىن ماماندار جۇمىسسىزدىق, تۇرمىستىق جاعدايدىڭ تومەندىگى, دەنساۋلىعىنا بايلانىستى جاعدايلارمەن دە بايلانىستىرادى. الايدا مۇنداي سەبەپتەر وتباسى الدىنداعى جاۋاپكەرشىلىكتەن قاشۋعا دالەل بولا المايتىنى انىق. بۇل ىستە زاڭ ورگاندارىنىڭ عانا ەمەس, قوعامدىق ينستيتۋتتاردىڭ بەلسەندىلىگى قاجەت ەكەنى داۋسىز.
پروبلەمالىق اليمەنتتەردىڭ سانىن ازايتۋ ماقساتىندا الماتى قالالىق ادىلەت دەپارتامەنتى جەكە سوت ورىنداۋشىلارىنىڭ وڭىرلىك پالاتاسى, پوليتسەيلەر جانە جۇمىسپەن قامتۋ ورتالىعىمەن بىرلەسىپ بورىشكەرلەردى اكىمشىلىك جانە قىلمىستىق جاۋاپكەرشىلىككە تارتۋ, سونداي-اق جۇمىسقا ورنالاستىرۋ بويىنشا مەموراندۋمعا سايكەس جۇمىس ىستەپ كەلەدى. ناتيجەسىندە, بيىل 50-دەن استام بورىشكەر جۇمىسقا ورنالاسقان.
وڭىرلىك كوممۋنيكاتسيالار قىزمەتىندە وتكەن بريفينگتە قالالىق ادىلەت دەپارتامەنتى باسشىسىنىڭ ورىنباسارى جاڭاباي اعمانوۆ وسى جىلدىڭ العاشقى جارتى جىلدىعىندا مەملەكەتتىك سوت ورىنداۋشىلارىنىڭ اتقارعان جۇمىستارى تۋرالى بايانداپ, ەسەپتى كەزەڭدە جالپى سوماسى
163 304 689 470 تەڭگەنى قۇرايتىن 2 مىڭنان استام قۇجات قارالعانىن اتاپ ءوتتى. سوت اكتىلەرىنىڭ جالپى سانىنىڭ 1 مىڭنان استامى نەمەسە 54 پايىزى وڭ شەشىمىن تاپقان.
جاڭاباي اعمانوۆتىڭ ايتۋىنشا, سوڭعى ۋاقىتتا بورىشكەرلەردى اكىمشىلىك جانە قىلمىستىق جاۋاپكەرشىلىككە تارتۋ شارالارى تيىمدىلىگىن كورسەتتى. ناتيجەسىندە, بورىشكەرلەر 85 ملن تەڭگەدەن استام بەرەشەگىن وتەگەن. ءبىرىنشى جارتىجىلدىقتا 68 بورىشكەر جاۋاپكەرشىلىككە تارتىلىپ, 18-دەن استامى اكىمشىلىك قاماۋعا الىنسا, 6 بورىشكەر سوت اكتىلەرىن ورىنداماعانى ءۇشىن قىلمىستىق جاۋاپكەرشىلىككە, ال 36 بورىشكەر اليمەنتتىك وندىرىسكە تارتىلعان. اكىمشىلىك جاۋاپكەرشىلىككە تارتىلعاننان كەيىن بورىشكەرلەردىڭ ءوز مىندەتتەمەلەرىن ورىنداۋى 41 پايىزعا ناتيجەسىن بەرگەن. ال سوتتالعاندار نەگىزىنەن كامەلەتكە تولماعان بالالاردى كۇتىپ-باعۋعا اليمەنت تولەۋ جونىندەگى مىندەتتەردى ۇزاق ۋاقىت بويى ورىنداماي كەلگەن. بۇگىندە قالالىق ادىلەت دەپارتامەنتىندە پروبلەمالىق اليمەنتتەر بويىنشا 1 776 ءىس تىركەۋدە تۇر.
الماتى
