وبلىستىڭ باس دارىگەرى ايدار سەيىتقازينوۆ قازىر كوروناۆيرۋس انىقتالعان ناۋقاستاردا اۋرۋ ماۋسىمدىق تۇماۋ ءتارىزدى ءوتىپ جاتقانىن جەتكىزدى. ياعني پتر ناتيجەلەرى ادام بويىندا ينفەكتسيانىڭ بار ەكەنىن كورسەتكەنىمەن, زاردابى اعزادا جەڭىل وتۋدە.
– دەرتكە شالدىققان تۇرعىندار سانى كۇنىنە 80-90 ادامداي تىركەلىپ جاتىر. ولاردىڭ باسىم بولىگى جەرگىلىكتى تىركەلگەن ەمحانالارى ارقىلى امبۋلاتورلىق ەم قابىلداۋدا. بىلاي قاراعاندا ماۋسىمدىق تۇماۋعا ۇقساتۋعا بولادى. ەپيدەميالىق احۋال بۇدان ءارى كۇردەلەنبەيدى ءارى ستاتسيونارلارعا تۇسەتىن جۇكتەمە كوبەيمەيدى دەگەن ءۇمىتىمىز زور. كوروناۆيرۋس جۇقتىرعاندار سانىنىڭ سوڭعى كۇندەرى كوبەيۋىنە جازعى ۋاقىتتا ادامداردىڭ ءجيى جول ءجۇرىپ, كۋرورتتىق ايماقتارعا ساياحاتتايتىنى سەبەپ بولدى دەپ ويلايمىز. قازىر كوپ ازامات جازعى دەمالىستا ءجۇر. وزگە قالالارعا, مەملەكەتتەرگە جول جۇرگەندە ابايسىزدا اۋرۋ ادامدارمەن بايلانىسىپ, دەرتكە شالدىعادى, – دەيدى ا.سەيىتقازينوۆ.
وڭىردەگى ستاتسيونارلاردا قازىرگى كۇنى شامامەن 39 ادام ەمدەلىپ جاتىر. ولاردىڭ بارلىعىندا سوزىلمالى نەمەسە جاناما اۋرۋلارى بار. ال ينفەكتسيالىق توسەكتىك ورىنداردىڭ 30 پايىزى عانا تولعان. ەمحانالار باستاپقى كومەك كورسەتۋ قىزمەتىن كۇشەيتىپ, ءموبيلدى توپتار تاۋلىگىنە ورتاشا ەسەپپەن 70 شاقىرتۋعا دەيىن بارادى ەكەن. سوڭعى اپتادا 500-دەن استام تۇرعىنعا امبۋلاتورلىق ەم-دوم كورسەتىلگەن. العاشقى مەديتسينالىق سانيتارلىق كومەك كورسەتۋ بويىنشا وبلىستاعى ەمحانالار جانىندا جالپى سانى 140-تاي ءموبيلدى بريگادا جۇمىس ىستەيدى.
ء«ار ەمحانادا 1-2 موبيلدىك بريگادا بار. وتتەگى باللوندارى, وزگە دە قاجەتتى مەديتسينالىق قۇرال-جابدىقتار جەتكىلىكتى. ستاتسيونارلار كەمى 45 كۇنگە جەتەتىن پرەپاراتتار قورىمەن قامتىلعان. پوليمەرازدى تىزبەكتى رەاكتسيا (پتر) ادىسىمەن تاۋلىگىنە 4 484 زەرتتەۋ جۇرگىزە الاتىن 9 ۆيرۋسولوگيالىق زەرتحانا قىزمەت ەتىپ تۇر. ستاتسيونارلىق ەمدەۋدەگى ايەلدەردىڭ سانى – 9 ادام, جاعدايى اۋىر ناۋقاستار جوق», دەيدى وڭىرلىك دەنساۋلىق ساقتاۋ باسقارماسى مەكەمەلەرىنىڭ ستراتەگيالىق دامىتۋ جانە يننوۆاتسيالىق تەحنولوگيالار ءبولىمى باسشىسىنىڭ مىندەتىن اتقارۋشى ەرعالى اسىلبەك.
بۇگىندە ايماقتا ۆاكتسينانىڭ ءۇش ءتۇرى بار. تۇرعىندار QazVac, Vero cell جانە «كوميرناتي» ۆاكتسينالارىن سالدىرا الادى. حالىقتى جاپپاي يممۋنداۋ شاراسى بويىنشا وڭىردەگى كورسەتكىشتەر جامان ەمەس. ۆاكتسينانىڭ I كومپونەنتىن ءوڭىر حالقىنىڭ 77,3 پايىزى, II كومپونەنتىن 75,5 پايىزى سالدىرعان. ال 42 پايىزى قايتا ۆاكتسينالاۋدان ءوتتى.
مۇرات قاپان ۇلى,
«Egemen Qazaqstan»
پاۆلودار وبلىسى
