اۆتوردىڭ ايتۋىنشا, ول كىشكەنتاي قىزىمەن شروپشيرگە بارعاننان كەيىن وسى كىتاپتى جازۋ تۋرالى شابىت الادى. قىزى كەڭ دالادا ەمىن-ەركىن جايىلىپ جۇرگەن جىلقىلارعا قىزىعىپ, شەشەسىنەن ولاردىڭ شىعۋ تەگىن سۇرايدى. جازۋشى رەتىندە قىزىنىڭ بۇل سۇراقتارىنا جاۋاپ بەرگىسى كەلگەن ول ۇيىنە قايتقان سوڭ, بوتاي مادەنيەتىن زەرتتەۋگە كىرىسەدى. زەرتتەۋ ناتيجەسى وعان جىلقىنى ەڭ العاش قولعا ۇيرەتكەندەر قازاق حالقى ەكەنىن, سونىمەن بىرگە, قىل قۇيرىقتىلاردىڭ تاريحي وتانى قازاقستان بولعانىن دالەلدەپ بەرەدى.
لۋيزا پۋل بۇل تۋرالى:
– بۇل وقيعا مەنى قاتتى قىزىقتىردى ءارى بەيجاي قالدىرمادى, سول ءۇشىن زەرتتەۋىمدى توقتاتپاي, ءارى قاراي جالعاستىرا بەردىم, اقىرىندا مەن قازاقستان تۋرالى قولعا ۇيرەتىلگەن جىلقىلار جونىندە, ولاردىڭ قايدان شىققانىن, قالاي وزگەرىسكە ۇشىراعانىن بىلە باستادىم. مەن قازاقستاننىڭ تابيعاتىنا, حالقىنا وي جۇگىرتۋدەن تانبادىم, – دەگەن كوزقاراسىن ايتادى.
«جارىق جۇلدىزدىڭ» كەيىپكەرلەرى 12 جاسار راۋشان مەن جارىق جۇلدىز اتتى پوني. جازۋشى شىنايى دا ادال دوستىق حيكاياسى باياندالعان بۇل شىعارما جاسوسپىرىمدەرگە, انىعىن ايتقاندا, جەتى مەن ون ءبىر جاس ارالىعىنداعى بالالاردى قىزىقتىرادى دەگەن ويىن العا تارتادى.
سونىمەن قاتار بۇل كىتاپ ەرەسەكتەردى دە قىزىقتىرا الاتىنىنا سەنىمدى. كىتاپ اۆتورى لۋيزانىڭ ماماندىعى سۋرەتشى, سوندىقتان كىتاپتىڭ بارلىق يلليۋستراتسيالارىن ءوزى جاساپتى.
– مەن بۇل كىتاپتىڭ جارىققا شىعۋىنا كومەكتەستىم, سونىمەن قاتار ونىڭ تۋىندىسىنىڭ كوركەم ۇلگىدە وقىرمانداردىڭ قولىنا جەتۋىنە, شىعارماشىلىق بەلسەندىلىگىنە قولداۋ كورسەتتىم, – دەيدى كاسىپكەر ستيۆ پۋل.
ال جىلقىنىڭ شىعۋ توركىنى تۋرالى بالالارعا ارنالعان كىتاپ جازعان جازۋشى:
– مەن قازاقستانعا بارىپ كورگەن جوقپىن, بىراق بولاشاقتا بارسام دەيمىن, ول جاقتاعى مادەني, تاريحي ورىنداردى, ادامداردىڭ تىرشىلىگىن, الما باۋلارىن جانە ەجەلگى ادامداردىڭ تاستارعا سالعان سۋرەتتەرىن كورسەم دەيمىن, – دەگەن جوسپارىمەن ءبولىستى.
قازىرشە اتالعان كىتاپ تەك قاتتى مۇقابا تۇرىندە باسىلىپ شىققان. بىراق جاقىندا جازۋشى وسى تۋىندىنىڭ ەلەكتروندى نۇسقاسىنىڭ دا وقىرماندارمەن بولىسپەك. ال كەيىپكەرلەر راۋشان مەن جارقىن جۇلدىزدىڭ شىتىرمان وقيعالارىن دا اۆتور كىتاپقا كىرىستىرۋدى جوسپارلاپ جۇرگەنىن جاسىرمايدى.
