قوعام • 05 تامىز، 2022

ەلىمىزگە 4 ملن قوراپتان استام تەمەكىنى كونتراباندالىق جولمەن كىرگىزبەك بولعان

62 رەت كورسەتىلدى

قازاقستانعا تاڭبالانباعان 4 ملن قوراپتان استام تەمەكىنى كونتراباندالىق جولمەن اكەلۋگە تىرىستى. بۇل رەتتە بيۋدجەتكە تولەۋگە جاتاتىن كەدەندىك تولەمدەردىڭ، سالىقتاردىڭ جانە اكتسيزدىڭ الدىن الا سوماسى – 1،2 ملرد تەڭگە. اتالعان جايت تۋرالى مەملەكەتتىك كىرىستەر كوميتەتى ءمالىم ەتتى، دەپ حابارلايدى Egemen.kz.

«الماتى قالاسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرى كەدەندىك تەكسەرۋ جۇرگىزۋ كەزىندە «سايكەستەندىرۋ قۇرالدارىمەن تاڭبالاۋسىز تەمەكىنى» زاڭسىز الىپ وتۋگە بايلانىستى كەدەن زاڭناماسىن بۇزۋدىڭ 3 فاكتىسىن انىقتادى. بارلىق 3 فاكتىنىڭ قىلمىستىق قۇقىق بۇزۋشىلىق بەلگىلەرى بار.

مىسالى، «الماتى» كەدەندىك رەسىمدەۋ ورتالىعىنىڭ قىزمەتكەرلەرى بىرىككەن اراب امىرلىگىنەن قازاقستان رەسپۋبليكاسىنىڭ اۋماعىنا اكەلىنەتىن جۇكتى تەكسەرۋ كەزىندە تازا سالماعى – 24،2 توننا، (1،422 ملن قوراپ) تەمەكى تاپتى. بيۋدجەتكە تولەۋگە ءتيىستى كەدەندىك تولەمدەردىڭ، سالىقتاردىڭ جانە اكتسيزدىڭ سوماسى – 403 ملن تەڭگە بولدى. ماتەريال سوتقا دەيىنگى تەرگەپ-تەكسەرۋ تۋرالى ماسەلەنى شەشۋ ءۇشىن كولىك پروكۋراتۋراسىنا بەرىلدى.

سونداي-اق، «الماتى» كرو قىزمەتكەرلەرى لاتۆيادان قازاقستان اۋماعىنا اكەلىنەتىن، سالماعى – 13 توننا (656 مىڭ قوراپ) وسىعان ۇقساس جۇكتى ۇستادى. بيۋدجەتكە تولەۋگە ءتيىستى سوماسى – 184،5 ملن تەڭگە.

«جەتىسۋ» كەدەن بەكەتىنىڭ قىزمەتكەرلەرى كەدەندىك جەتە تەكسەرۋ بارىسىندا ينۆويسقا سايكەس 45،6 مىڭ ورام كولەمىندە «دارەتحانا قاعازى» دەپ مالىمدەلگەن تاۋاردى انىقتاعان. الايدا، الدىن الا تەكسەرۋ بارىسىندا «سايكەستەندىرۋ قۇرالدارىمەن تاڭبالانباعان تەمەكى ونىمدەرى» تاۋارى ناقتى انىقتالدى. سانى – 2، 090 ملن قوراپ. بيۋدجەتكە تولەۋگە ءتيىستى كەدەندىك تولەمدەردىڭ، سالىقتاردىڭ جانە اكتسيزدىڭ الدىن الا ەسەپتەلگەن سوماسى – 587،9 ملن تەڭگە»، دەلىنگەن كوميتەتتىڭ ءباسپاسوز قىزمەتى تاراتقان حابارلامادا.

ايتا كەتسەك، 2020 جىلعى قازاننان باستاپ بارلىق يمپورتتالعان سيگارەتتەر قازاقستان اۋماعىنا نە كەدەن قويمالارىنا اكەلگەنگە دەيىن سايكەستەندىرۋ قۇرالدارىمەن تاڭبالانۋعا ءتيىس. وسى ورايدا، كوميتەت قر كەدەن كودەكسى 34-بابىنىڭ 1-تارماعىنا سايكەس ەاەو كەدەندىك اۋماعىنا اكەلىنەتىن تاۋارلار وداقتىڭ كەدەندىك شەكاراسىنان وتكەن ساتتەن باستاپ كەدەندىك باقىلاۋدا بولاتىنىن ەسكە سالادى.

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار