ەلوردا • 05 تامىز، 2022

تجد سۋعا ءتۇسۋ كەزىندەگى قاۋىپسىزدىك ەرەجەلەرىن ءتۇسىندىردى

ەلوردالىق تجد رۇقسات ەتىلمەگەن جاعاجايلاردا سۋعا شومىلۋ قاۋپى تۋرالى ەسكەرتىپ، دەمالۋشىلاردى قاۋىپسىزدىك ەرەجەلەرىن ساقتاۋعا شاقىرادى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

ايانا توعانبەك

ستاتيستيكاعا سايكەس سۋدا قازا بولۋ جاعدايلارىنىڭ 80%-عا جۋىعى جابدىقتالماعان جانە تىيىم سالىنعان ورىنداردا شومىلۋ، سونداي-اق الكوگولدىك ماساڭ كۇيدە سۋعا ءتۇسۋ سەبەبىنەن بولادى. سۋدا قاۋىپسىز دەمالۋ ادامنىڭ ءوزىن-ءوزى ۇستاۋ تارتىبىنە بايلانىستى.

ءوزىڭىزدى جانە وتباسىڭىزدى قورعاۋ ءۇشىن مىناداي ۇسىنىستاردى ورىنداۋ قاجەت:

1. تەك ارنايى بولىنگەن ورىنداردا، جابدىقتالعان جاعاجايلاردا شومىلىڭىز، قاۋىپتى جاعدايدا ءسىز قۇتقارۋشىنىڭ مامانداندىرىلعان كومەگىن الا الاسىز. قالادا شومىلۋعا رۇقسات ەتىلگەن ورىندار: ورتالىق جاعاجاي، «تري پەسكاريا» جانە «استانالىق اۋلا» دەمالىس ورىندارى.
2. ماس كۇيدە شومىلماڭىز. بۇل – سۋداعى ادام ءولىمىنىڭ نەگىزگى سەبەبى.
3. قايىقتارعا جاقىن جۇزبەڭىز.
4. قايىقتار مەن باسقا دا ءجۇزۋ قۇرالدارىن پايدالانۋ ەرەجەلەرىن ساقتاڭىز: ولارعا شامادان تىس كۇش تۇسىرمەڭىز، شايقاماڭىز، ولاردان سۋعا سەكىرمەڭىز، قايىققا قاجەت بولعان جاعدايدا الدىنان نەمەسە ارت جاعىنان كوتەرىلۋ كەرەك. ەسىڭىزدە بولسىن، قايىقتا وتىرعانداردىڭ اراسىندا ءبىر ادام جۇزە الماۋى مۇمكىن.
5. جۇزە الماعان جاعدايدا ۇرلەمەلى ماتراستاردى، كامەرالاردى، تاقتالاردى قولدانباڭىز. ءتىپتى اقىرىن سوققان جەل ولاردى جاعادان الىس الىپ كەتۋى مۇمكىن.
6. ەگەر ءسىز جۇزە الماساڭىز، سۋعا تەك بەلبەۋ ارقىلى ءتۇسىڭىز.
7. شومىلۋعا ارنالعان ورىنداردا ارنايى ورناتىلعان قورشاۋلاردان اسىپ جۇزبەڭىز. بۇل – ەسكەرتۋ بەلگىسى. ۇزاق ءجۇزۋ – بۇل گيپوتەرميا، بۇلشىقەتتىڭ شامادان تىس جۇمىسى، دەنەنىڭ قۇرىسىپ قالۋى، ال ونىڭ سوڭى ولىمگە اكەلۋى مۇمكىن.
8. سۋدا ەرسى ارەكەتتەر جاساماڭىز. سۋعا مالتىپ، ءجۇزىپ جۇرگەندەرگە تاپ بەرمەڭىز، وزگەلەردى قورقىتپاڭىز.
9. جالعان اپات سيگنالدارىن بەرمەڭىز.
10. بالالاردى ەرەسەكتەردىڭ قاراۋىنسىز قالدىرماڭىز.