ۇكىمەت • 05 تامىز، 2022

ومان مەن باحرەينگە تىكەلەي رەيستەر اشۋ قاجەت – ءاليحان سمايىلوۆ

31 رەت كورسەتىلدى

پرەمەر-مينيستر ءاليحان سمايىلوۆ قازاقستانعا رەسمي ساپارمەن كەلگەن پارسى شىعاناعىنداعى اراب مەملەكەتتەرىنىڭ ىنتىماقتاستىعى كەڭەسىنىڭ باس حاتشىسى نايەف فالاح مۋباراك ءال-حادجرافپەن كەزدەستى، دەپ حابارلايدى Egemen.kz ۇكىمەتتىڭ رەسمي سايتىنا سىلتەمە جاساپ.

تاراپتار ساۋدا-ەكونوميكالىق، ينۆەستيتسيالىق، كولىك-لوگيستيكالىق سالالارداعى، ەنەرگەتيكا جانە اگروونەركاسىپتىك سەكتورداعى ىنتىماقتاستىق ماسەلەلەرىن تالقىلادى. قر پرەمەر-ءمينيسترى قازاقستان ۇيىم ەلدەرىمەن ستراتەگيالىق سەرىكتەستىكتى ودان ءارى نىعايتۋعا مۇددەلى ەكەنىن اتاپ ءوتتى.

«بىزدە ساۋدا جانە ينۆەستيتسيالىق ىنتىماقتاستىقتى دامىتۋدىڭ الەۋەتى زور. قازاقستان بارلىق ينۆەستورلار ءۇشىن قولايلى ىسكەرلىك احۋالدى ودان ءارى قامتاماسىز ەتۋگە دايىن. سوندىقتان وسى مۇمكىندىكتى پايدالانا وتىرىپ، كەڭەس ەلدەرىنىڭ ىسكەر توپتارىن بىرلەسكەن جوبالاردى ىسكە اسىرۋعا شاقىرامىن»، دەدى ءاليحان سمايىلوۆ.

ۇكىمەت باسشىسى قازاقستان پارسى شىعاناعى ەلدەرىنە جوعارى ساپالى ۇن، مايلى داقىلدار جانە باسقا دا اۋىل شارۋاشىلىعى داقىلدارىن جەتكىزۋدى ۇلعايتۋعا، سونداي-اق ترانزيت سالاسىنداعى ءوزارا ءىس-قيمىلدى، ونىڭ ىشىندە ترانسكاسپي حالىقارالىق كولىك باعدارىن دامىتۋ ەسەبىنەن نىعايتۋعا دايىن ەكەنىن اتاپ ءوتتى. بۇل رەتتە ءاليحان سمايىلوۆ مەملەكەتارالىق بايلانىستاردى ودان ءارى دامىتۋ ءۇشىن ۇشۋ گەوگرافياسىن كەڭەيتۋ ماسەلەسىن پىسىقتاۋ، ونىڭ ىشىندە قازاقستاننان ومان مەن باحرەينگە تىكەلەي رەيستەر اشۋ قاجەت ەكەنىن ايتتى. ءوز كەزەگىندە نايەف فالاح مۋباراك ءال-حادجراف قر پرەزيدەنتى قاسىم-جومارت توقاەۆتىڭ جاقىندا ساۋد ارابياسىنا جاساعان ساپارى اراب ەلدەرىمەن قارىم-قاتىناستى نىعايتۋعا ۇلكەن ۇلەس قوسقانىن اتاپ ءوتتى.

«پارسى شىعاناعى ەلدەرىنىڭ قازاقستانعا ينۆەستيتسيا سالۋ بويىنشا كوپ جوسپارلارى بار. ىنتىماقتاستىقتىڭ ءوزارا ءتيىمدى باعىتتارىن ايقىنداۋ ءۇشىن بىرلەسكەن بيزنەس-فورۋمدار ۇيىمداستىرۋ قاجەت دەپ سانايمىز. اتاپ ايتقاندا، ءبىز ەنەرگەتيكا، اۋىل شارۋاشىلىعى جانە ءبىلىم بەرۋ سالالارىنداعى سەرىكتەستىكتى دامىتۋعا مۇددەلىمىز»، دەدى پارسى شىعاناعىنداعى اراب مەملەكەتتەرىنىڭ ىنتىماقتاستىعى كەڭەسىنىڭ باس حاتشىسى.

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار