دەپارتامەنت باستىعىنىڭ ورىنباسارى, ازاماتتىق قورعاۋ پولكوۆنيگى اسحات ەرجانوۆتىڭ مالىمەتىنە سۇيەنسەك, وتكەن جىلى 28 ادام سۋعا باتىپ كەتكەن. جۇرگىزىلگەن تالداۋعا سايكەس سۋعا كەتۋدىڭ بىرنەشە سەبەبى انىقتالىپ وتىر. ماسەلەن, ءتورت ادام تىيىم سالىنعان جەردە سۋعا تۇسكەن. سۋعا قۇلاپ كەتكەن 10 ادام كەرى شىقپاي قالعان. ماس كۇيدە سۋعا تۇسكەن ءتورت ادام ءجانتاسىلىم ەتكەن. ال ەرەسەكتەردىڭ قاراۋىنسىز جۇرگەن 10 بالا سۋعا باتىپ كەتتى. قۇتقارۋشىلار التى ادامدى سۋدان الىپ شىقتى. ونىڭ ىشىندە ءتورت بالا بار.
– ءبىزدىڭ ماقساتىمىزدىڭ ءبىرى – جاز مەزگىلىندە سۋ ايدىندارىنداعى ادام ءولىمىنىڭ الدىن الۋ. وسى ماقساتتا توتەنشە جاعدايلار دەپارتامەنتى وكىلدەرى پوليتسيا قىزمەتكەرلەرىمەن, جەرگىلىكتى اكىمدىك وكىلدەرىمەن بىرلەسكەن كۇندەلىكتى ۇگىت-ناسيحات جۇمىستارىن جۇرگىزىپ كەلەدى. وعان كۇن سايىن 273 ادام, 44 اۆتوكولىك پەن ءجۇزۋ قۇرالدارى تارتىلادى. سۋعا ءتۇسۋ ماۋسىمى باستالعالى بەرى اتىراۋ قالاسىنداعى, جىلىوي مەن قۇرمانعازى اۋدانىنداعى ءۇش سۋدان قۇتقارۋ ستانساسىندا جەدەل-قۇتقارۋ جاساعىنىڭ قىزمەتكەرلەرى تاۋلىك بويى كەزەكشىلىكتى اتقارىپ جاتىر. بيىل وبلىستاعى سۋ ايدىندارىنىڭ 238 ۋچاسكەسىنە سۋعا تۇسۋگە تىيىم سالىندى. سۋعا تۇسۋگە رۇقسات ەتىلگەن, تىيىم سالىنعان ورىندار 2gis قوسىمشاسىنا ەنگىزىلدى. وقىس وقيعانىڭ الدىن الۋ ءۇشىن تۇرعىندار نازارىنا قاراپايىم قاعيدالاردى ۇسىندىق. ماسەلەن, «سۋعا تۇسۋگە تىيىم سالىنادى» دەگەن بەلگىسى بار اۋماقتا سۋعا تۇسۋگە, ءجۇزۋ شەكاراسى كورسەتىلگەن قالقىما بەلگىلەردى كەسىپ وتۋگە, كەمەگە, قايىققا, باسقا دا قۇرالدارعا جاقىنداۋعا بولمايدى. بۇعان قوسا ماس كۇيىندە تەكسەرىلمەگەن, ارنايى جابدىقتالماعان اۋماقتا سۋعا تۇسۋگە, جۇزۋگە ارنالماعان زاتتارمەن جۇزۋگە تىيىم سالىناتىنىن ەسكەرۋ قاجەت. قايىقتاردان, جاعاجايلاردان, بەكەتتەردەن, وسى ماقساتتارعا بەيىمدەلمەگەن باسقا دا ورىنداردان سۋعا سەكىرمەۋ كەرەك. سۋ قويماسىندا قاۋىپسىزدىك بەلگىلەرىن ءوز بەتىنشە الىپ تاستاۋعا, بۇلدىرۋگە نەمەسە ورناتۋعا تىيىم سالىنادى, – دەيدى اسحات ەرجانوۆ.
ونىڭ ايتۋىنا قاراعاندا, بيىل سۋعا كەتۋدىڭ العاشقى دەرەگى 22 قاڭتاردا تىركەلگەن. اتىراۋ قالاسىندا تۇراتىن 9 جاسار بالا «پەرەتاسكا» كانالىندا مۇز استىنا ءتۇسىپ كەتىپ, شىعا الماي قالعان. ءبىر كۇننەن سوڭ ونىڭ ءمايىتى سۋدان تابىلدى.
ال 21 ساۋىردە قىزىلقوعا اۋدانىنىڭ تاسشاعىل اۋىلىنان 21 جاستاعى جىگىت مال ىزدەۋگە شىعىپ, ءىز-ءتۇزسىز جوعالعان. اۋەلى ونىڭ ءمىنىپ كەتكەن اتىنىڭ ولەكسەسى ويىل وزەنىنەن شىقتى. كەيىن جاس جىگىتتىڭ وزەنگە باتىپ كەتكەنى انىقتالدى. جىلىوي اۋدانىنىڭ جەم اۋىلدىق وكرۋگىندە 4 ماۋسىمدا 2009 جىلعى ءجاسوسپىرىم ارنايى جابدىقتالماعان جەردە سۋعا ءتۇسىپ, باتىپ كەتتى. توتەنشە جاعدايلار دەپارتامەنتىنىڭ قىزمەتكەرلەرى 16 ماۋسىمدا «اتىراۋ» دەنەشىنىقتىرۋ-ساۋىقتىرۋ كەشەنى ماڭىنداعى جاعاجايدا اتا-اناسىنىڭ قاراۋىنسىز سۋعا ءتۇسىپ جۇرگەن 20-دان استام كامەلەتكە تولماعان بالانى انىقتادى.
جىل باسىنان بەرى وڭىردەگى سۋ ايدىندارىندا 14 ادامنىڭ سۋعا باتىپ كەتكەنى انىقتالىپ وتىر. ونىڭ ىشىندە كامەلەتكە تولماعان بەس بالا بار. ماسەلەن, اتىراۋ قالاسىندا – 2, جىلىوي اۋدانىندا – 2, قىزىلقوعا اۋدانىندا – 2, قۇرمانعازى اۋدانىندا – 2, يندەر اۋدانىندا – 2, ماحامبەت اۋدانىندا 4 ادام سۋعا كەتتى.
– ستاتيستيكاعا سايكەس سۋ ايدىندارىنداعى جازاتايىم وقيعالاردىڭ 95 پايىزى ماس كۇيىندە سۋعا ءتۇسۋدىڭ, ءجۇزۋ قابىلەتىن اسىرا باعالاۋدىڭ سالدارىنان بولادى. ال بالالار اراسىندا وقىس وقيعاعا تەنتەكتىك پەن اتا-انالاردىڭ سالعىرتتىعى سەبەپكەر ەكەنىن جاسىرا المايمىز. بۇعان قوسا سۋعا تۇسكەن كەزدە دەنساۋلىقتىڭ كۇرت ناشارلاۋى مەن بۋىننىڭ قۇرىسۋى سەكىلدى سەبەپتەر دە اسەر ەتەتىنى بار, – دەيدى دەپارتامەنت باستىعىنىڭ ورىنباسارى ا.ەرجانوۆ.
بيىل اتىراۋ قالاسىنىڭ اۋماعىندا 28 جاعاجايعا سۋعا تۇسۋگە تىيىم سالىندى. مۇنداي جاعاجايلار جۇمىسكەر, قىزىلبالىق, دامبى, تالعايران, گەولوگ, تومارلى, اقساي, اقجار, پەرەتاسكا, ەركىنقالا, قاراوزەك, بەرەكە ەلدى مەكەندەرىندە, بالىقشى شاعىن اۋدانىنداعى ستاديون تۇسىندا, بەيبارىس كوشەسى ارقىلى وتەتىن كوپىر ماڭىنداعى ەسكى پاروم, كوكارنا اۋىلىنداعى 5-وتكەلدە, رەمبازا, اۆانگارد شاعىن اۋداندارىندا, ب.نىسانباەۆ, م.حالەلوۆ, ءو.اتامباەۆ, تەمىرحانوۆ كوشەلەرىندە, كوتتەدجنىي قالاشىعى مەن سوكولينسك كانالىندا ورنالاسقان. سوعان قاراماستان تۇرعىندار سۋ ايدىندارىنىڭ ارنايى جابدىقتالماعان تۇسىندا سۋعا ءتۇسۋدى توقتاتار ەمەس. كوپشىلىگى مۇنداي ارەكەتتىڭ سوڭى ورنى تولماس وكىنىشكە ۇرىندىرارىن ەسكەرمەيدى.
ماسەلەن, 31 شىلدەدە ماحامبەت اۋدانىنىڭ اكىمى ورتاقشىل اۋىلىنا بارىپ, جايىق وزەنىنە سۋعا تۇسكەن. بىراق سۋدان كەرى شىقپاي قالدى. جەرگىلىكتى اتقارۋ ورگانىندا تاجىريبە جيناعان اكىم 40 جاسقا ەندى تولار ەدى. الايدا اجالى سۋدان بولىپ, تاعدىرى كىلت ءۇزىلدى. ونىڭ ارنايى جابدىقتالماعان جەردە سۋعا تۇسكەنى انىقتالىپ وتىر.
اتىراۋ وبلىسى
