اتىراۋ قالاسىنىڭ №2 سوتىندا پارا الۋ فاكتىسى بويىنشا ەڭبەك ينسپەكتورىنا قاتىستى قىلمىستىق ءىس قارالدى.
سوت وتىرىسىندا مىناداي جايت انىقتالعان. اتىراۋ وبلىسىنىڭ مەملەكەتتىك ەڭبەك ينسپەكتسياسىنىڭ ينسپەكتورى ب. كوميسسيا توراعاسى رەتىندە جشس-ءنىڭ قىزمەتكەرى ۇشىراعان جازاتايىم وقيعاعا قاتىستى ارنايى تەكسەرۋ جۇرگىزگەن.
«2021 جىلعى 24 قاراشادا ب. جشس ديرەكتورىنىڭ ورىنباسارىن وزىنە شاقىرىپ, تەكسەرۋ ناتيجەلەرى بويىنشا جشس كىنالى ەكەنىن, قىلمىستىق جاۋاپكەرشىلىككە تارتۋ ءۇشىن قۇجاتتاردى پوليتسياعا جىبەرەتىنىن ايتقان. ونى جاۋاپتىلىقتان بوساتۋ ءۇشىن پارا رەتىندە 1 500 000 تەڭگە سۇراعان. سىبايلاس جەمقورلىققا قارسى قىزمەتتىڭ قىزمەتكەرلەرى ەڭبەك ينسپەكتورى ب.-نى 2021 جىلعى 25 قاراشادا ءوزىنىڭ جۇمىس ورنىندا اقشا الۋ كەزىندە ۇستاعان», دەپ حابارلادى №2 سوتتىڭ ءباسپاسوز قىزمەتى.
كورسەتىلگەن ءمان-جايلار مەن سوتتالۋشىنىڭ كىناسى جابىرلەنۋشىنىڭ, كۋالاردىڭ ايعاقتارىمەن, جەدەل تەرگەۋ ارەكەتتەرىنىڭ ناتيجەلەرىمەن, بەينەكامەرالاردىڭ جازبالارىمەن, سوت ساراپتامالارىنىڭ قورىتىندىلارىمەن دالەلىن تاپتى.
وسىعان بايلانىستى سوت ب.-نى قر قىلمىستىق كودەكسى 366-بابىنىڭ 2-بولىگىمەن كىنالى دەپ تانىدى. سوت جازانى جەڭىلدەتەتىن جاعداي رەتىندە سوتتالۋشىنىڭ جاس بالالارى بارىن ەسكەرە وتىرىپ, ب.-عا 3 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى.
سوتتالۋشى ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى.
سوت ۇكىمى زاڭدى كۇشىنە ەنگەن جوق.
