كەزدەسۋ بارىسىندا ابايدىڭ «جيدەباي-ءبورىلى» مەملەكەتتىك ادەبي-مەموريالدىق قورىق-مۋزەيىندە بەلگىلى اقىن, حالىقارالىق «الاش» ادەبي سىيلىعىنىڭ لاۋرەاتى, فيلولوگيا عىلىمدارىنىڭ كانديداتى, الماتىداعى س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىنىڭ باسشىسى ادىلعازى قايىربەكوۆتىڭ «ابايعا اپارار جول» اتتى شىعارماشىلىق كەشى ءوتتى. اقىن ءوزىنىڭ سىنىپتاس دوستارىنىڭ الدىندا شىعارماشىلىق ەسەبىن بەردى. ءا.قايىربەكوۆتىڭ ومىرباياندىق ورنەكتەرىنە قۇرىلعان وسكەمەندەگى وبلىستىق جاسوسپىرىمدەر مەن بالالار كىتاپحاناسى ازىرلەگەن «كەستەلى ءسوزدىڭ شەبەرى» اتتى ادەبي-رافت كورسەتىلدى. كەشتە ءسوز العان اباي مۋزەيىنىڭ ديرەكتورى, قازاقستان رەسپۋبليكاسىنىڭ ەڭبەك سىڭىرگەن قايراتكەرى تۇردىقۇل شاڭباي شىعارماشىلىق يەسى تۋرالى جىلى لەبىزىن ءبىلدىرىپ, سەمەيدەگى اباي مۋزەيى مەن الماتىداعى س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنى اراسىنداعى ءداستۇرلى شىعارماشىلىق بايلانىستارعا توقتالدى. شارادا «ابايدىڭ ولەڭى», «سۇيەمىن سەنى, سەمەيىم» (ەكەۋىنىڭ دە ءسوزى ءا.قايىربەكوۆتىكى, ءانى كەنتاۋ نازاربەكتىكى) سىندى اندەر ورىندالىپ, اقىن جەرلەستەرىنىڭ الدىندا ءوزىنىڭ ءار جىلدار بەلەسىندە جازىلعان ولەڭدەرى مەن بالالىق شاق باللادالارىن وقىپ, تىڭدارماندارىن ءتانتى ەتتى. ءا.قايىربەكوۆ اباي مۋزەيىنىڭ كىتاپحانا قورىنا ءوزىنىڭ ون تومدىق شىعارمالار جيناعى مەن «جانداۋا», «نازقوڭىر», «بورتوستاعان», «مۇسىرەپوۆتىڭ حاتحاناسى» كىتاپتارىن تابىستادى.
ادەبي-سازدى كەشكە اقىننىڭ سىنىپتاستارى, سەمەي قالاسىنىڭ زيالى قاۋىم وكىلدەرى مەن جىرعا جانى قۇشتار جاس جەتكىنشەكتەر قاتىستى. ەرتەڭىنە ارمانداستار-سىنىپتاستار جيدەبايعا بارىپ, اباي مەن شاكارىمنىڭ توپىراعىنا ءتاۋ ەتىپ, اق كۇمبەز كەسەنەلەرىن كورىپ, رۋحتارىنا تاعزىم جاساپ قايتتى.
نازگۇل التاەۆا
