فەستيۆالدىڭ امباسسادورى – Street workout قوزعالىسىنىڭ نەگىزىن قالاۋشىلاردىڭ ءبىرى ايتىم جاكۋپوۆتىڭ ايتۋىنشا, ماقسات – بۇقارالىق سپورتتى دامىتۋ, جاستاردى سالاماتتى ومىرگە باۋلۋ. سول سەبەپتەن وعان قاتىسۋشىلاردىڭ جىنىسىنا دا, جاسىنا دا شەكتەۋ قويىلمادى. قاتىسۋعا نيەت بىلدىرگەندەردىڭ ءبارى تىركەلدى.
قاتىسۋشىلاردىڭ اراسىندا 6 جاسار ەكى ءبۇلدىرشىن بار. ونىڭ ءبىرى – يبراگيم اسقار ۇلى تۋرنيككە 15 رەت تارتىلىپ, كورەرمەن ىقىلاسىنا بولەندى. ال ەكىنشىسى – ءابدىراحمان ەسەنجان 8 مارتە تارتىلىپ, سپورتقا بەيىم ەكەنىن كورسەتتى. اتىراۋلىقتاردىڭ اراسىنان ەڭ جاسى ۇلكەن قاتىسۋشىلاردىڭ لەگىن باستاعان 64 جاستاعى زەينەتكەر باقتىعالي قاراكوزوۆ جاستاردىڭ قۇلشىنىسىن وياتتى.
– تۋرنيككە تارتىلۋ – جاس تالعامايتىن سپورت ءتۇرى. زەينەتكەر بولسام دا تۋرنيككە تارتىلۋدى ءالى تاستاماي كەلەمىن. بۇل جارىسقا جاستاردى جىگەرلەندىرۋ, قۇلشىنىسىن ارتتىرۋ ءۇشىن قاتىستىم, – دەيدى باقتىعالي قاراكوزوۆ. جىگىتتەرمەن بىرگە تۋرنيككە ءبىر بويجەتكەن تارتىلدى. ول – 17 جاسار دانا ءابدىروۆا. ونىڭ ەسىمى تەك اتىراۋلىقتارعا عانا ەمەس, ازيا قۇرلىعىنا دا تانىمال. بالا كۇنىنەن دزيۋدو سپورتىمەن اينالىسادى. بيىلعى ساۋىردە دزيۋدوشى ارۋ تاشكەنت قالاسىندا وتكەن ازيا كۋبوگىنىڭ يەگەرى اتانعان ەدى.
ال جاقىندا تايلاند ەلىنىڭ استاناسى – بانگكوك قالاسىندا جالاۋى جەلبىرەگەن ازيا چەمپيوناتىندا 57 كيلو سالماقتا سىنعا ءتۇستى. بۇل دودانىڭ فينالىندا ءۇندىستان بالۋانى لينتوي چانامبامنان ۇتىلىپ, ازيا چەمپيوناتىنىڭ كۇمىس جۇلدەگەرى اتاندى. بىراق تۋرنيككە تارتىلۋ تاتامي شەبەرىنە وڭاي بولمادى.
اتىراۋلىق جىگىتتەر تۋرنيككە 4 917 مارتە تارتىلدى. ونىڭ ىشىندە ەڭ ۇزدىك ناتيجە امانگەلدى ۋتەپوۆتىڭ ەنشىسىنە جازىلدى. ول تۋرنيككە ەكىنشى كەزەڭدە 33 مارتە تارتىلىپ, 80 كيلوعا دەيىنگى سالماق كاتەگورياسىندا ۇزدىك دەپ تانىلدى. ال 32 رەت تارتىلعان تيموفەي حۆان مەن اقجول ساليحادين 18-35 جاس توبىندا 65 كيلوعا دەيىنگى سالماقتا بىردەي ناتيجە كورسەتتى.
«Tartyl Fest» سپورت فەستيۆالىندە 9 سالماق كاتەگورياسى بويىنشا ءبىرىنشى ورىن يەلەنگەن جەڭىمپازدارعا 200 مىڭ تەڭگەنىڭ سەرتيفيكاتى مەن نۇر-سۇلتان قالاسىندا 8 قىركۇيەكتە وتەتىن گراند-فينالعا جولداما بەرىلدى. ەكىنشى ورىن جۇلدەگەرلەرىنە 100 مىڭ تەڭگەنىڭ, ءۇشىنشى ورىنعا يە بولعاندارعا 50 مىڭ تەڭگەنىڭ سەرتيفيكاتى تاپسىرىلدى.
اتىراۋ وبلىسى
