بايجان بيجانوۆ قىزىلوردا وبلىسىنداعى «قاراقۇم» كەڭشارىنىڭ ىرگەتاسىن قالاپ, بۇگىندە ۇلكەن اۋىلعا اينالۋىنا ەرەن ەڭبەك سىڭىرگەن بىلىكتى باسشىنىڭ ءبىرى ەدى. ەلدىڭ اتىن ەر شىعارادى دەمەكشى, ديرەكتور رەتىندە ول اۋىلدىڭ ىنتىماعىن ساقتاۋعا ۇيىتقى بولا وتىرىپ, كەڭشاردى وبلىس, رەسپۋبليكا كولەمىندەگى الدىڭعى قاتارلى تابىسى تاسىعان رەنتابەلدى شارۋاشىلىقتار قاتارىنا ەنگىزدى. سونداي-اق شارۋاشىلىق بىرنەشە جىل قاتارىنان اۋىسپالى «قىزىل تۋعا» يە بولدى جانە ۇجىمنىڭ جوعارى كورسەتكىشتەرى ءۇشىن كسرو حالىق شارۋاشىلىعى كورمەسىنىڭ جەڭىمپازى رەتىندە بۇكىل وداققا تانىلدى. ءوزى دە كوپ جىلعى ناتيجەلى ەڭبەگى ءۇشىن «حالىقتار دوستىعى», «ەڭبەك قىزىل تۋ» جانە «قۇرمەت بەلگىسى» وردەندەرىمەن, كوپتەگەن مەدالمەن ماراپاتتالدى.
ەلگە شىنداپ قىزمەت ەتەمىن دەگەن ادامعا ەشتەڭە كەدەرگى ەمەستىگىن بايجان بيجانوۆ كەڭشار ديرەكتورى كەزىندەگى ەڭبەگىمەن ايقىن دالەلدەدى. سوناۋ قيىن-قىستاۋ, ەشقانداي تەحنيكا دامىماعان زاماندا اۋىلعا جىلۋ جۇيەسىن جۇرگىزۋدىڭ ءوزى نەگە تۇرادى؟! وسىنداي ەلگە ەڭبەگى سىڭگەن ازاماتتىڭ ەسىمىن ەلەۋسىز قالدىرۋعا بولمايدى دەپ بىلەمىز. 2017 جىلى جەرگىلىكتى حالىق بايجان بيجانوۆتىڭ 100 جىلدىعى مەن كەڭشاردىڭ 60 جىلدىعىن اتاپ ءوتتى. سول كەزدە ارال اۋدانىنىڭ اباي ەلدى مەكەنىندەگى №59 ورتا مەكتەپكە بايجان بيجانوۆتىڭ ەسىمىن بەرۋ تۋرالى كوتەرىلگەن, كەيىن مەكتەپ ۇجىمى, ارال اۋداندىق ءبىلىم ءبولىمى مەن ونوماستيكا ءبولىمى ماقۇلداپ, وڭ شەشىم العان باستامانىڭ ءالى جۇزەگە اسار ءتۇرى كورىنبەيدى.
شەشىمنىڭ ءالى ورىندالماي كەلە جاتقانىنا قاراپ, ءبىر كەدەرگىلەر كەسە-كولدەنەڭ تۇر ما دەگەن دە الاڭداۋشىلىق بار. قىسقاسى, قانداي جاعداي بولسا دا ءتيىستى ورىندارعا شەشىم تەزىرەك جۇزەگە اسىرىلسا ەكەن دەگەن تىلەك بىلدىرەمىز.
تاعاي اليەۆ,
اۋىل شارۋاشىلىعىنا ەڭبەك سىڭىرگەن زەينەتكەر
قىزىلوردا وبلىسى,
ارال اۋدانى
