كىتاپتا بەلگىلى جۋرناليست, قوعام قايراتكەرى بەيسەن قۇرانبەك بولمىسىنا ەكزيستەنتسيالىق تالداۋ جاسالعان. بەيسەننىڭ ومىرىنەن مىسال كەلتىرە وتىرىپ, ەكزيستەنتسيا, لوگوتەراپيا پسيحولوگياسى ۇعىمدارى كەڭىنەن تۇسىندىرىلەدى. تۋىندىدا ادام بولمىسى, قالاي اشىلدى, قالاي كورىنەدى, ومىردەگى ءمانىن قالاي انىقتايدى دەگەن ءارتۇرلى سۇراقتارعا جاۋاپ بەرىلەدى.
تۇساۋكەسەر بارىسىندا كىتاپ اۆتورى سانجار كەرىمباي «وتباسى حرەستوماتياسى» سەرياسىمەن جارىق كورگەن ەڭبەكتىڭ ەرەكشەلىكتەرىنە توقتالدى.
ونىڭ ايتۋىنشا كىتاپتا ب.قۇرانبەكتىڭ ومىرىنەن ءتۇرلى قىزىقتى دەرەكتەر بەرىلگەن. سونداي-اق وعان فيلوسوفيالىق, ەكزيستەنتسيالىق باعىتتا تالداۋ جاسالادى. بۇل – وقىرمانعا كىتاپتى جاي عانا وقىپ قويا سالماي, ونداعى ايتىلعان ويدىڭ استارىن, سالماعىن ءتۇسىنىپ, ءوزىن تانۋعا, بەيسەندى تانۋعا, بولمىسقا تەرەڭ بويلاۋعا مۇمكىندىك بەرەدى.
سونداي-اق ول بەيسەن قۇرانبەكتىڭ عيبراتتى عۇمىرىنداعى وقيعالار ءبۇتىن ءبىر جاس بۋىنعا تاربيە بەرەرلىك قاسيەتكە يە دەپ سانايدى. سوندىقتان بولار تانىمال ءجۋرناليستىڭ ادامگەرشىلىك قاسيەتىن ۇلگى ەتىپ, وعان ەلىكتەپ, ءوسىپ كەلە جاتقان بالالار بار. بۇل ويىن اۆتور «بەيسەن ەكزيستەنتسيالىق تۇرعىدا تىرشىلىگىن جالعاستىرىپ جاتىر» دەپ تۇيىندەدى.
جيىندا كىتاپتى باسىپ شىعارۋدا تۋىنداعان ماسەلەلەر تۋرالى دا ايتىلدى.
«كىتاپتى دايىنداپ, شىعارۋعا 2-3 ايدىڭ عانا كولەمى كەتتى. مازمۇنىنان بولەك, ەڭ كوپ ۋاقىتتى قاجەت ەتكەن دۇنيە – كىتاپتىڭ مۇقاباسى. وسى ماسەلەدە ۇزاق اقىلداستىق. بىرىنشىدەن, تارتىمدى بولعانىن قالادىق. ەكىنشىدەن, شىعارمانىڭ اتى ايتىپ تۇرعانداي كەيىپكەردىڭ بولمىسىن اشاتىنداي سۋرەت بولۋى قاجەت ەدى. وسى رەتتە مۇقابانىڭ 30-دان استام نۇسقاسى جاسالدى. ولاردىڭ ءبارىن بەيسەن اعامىزدىڭ جۇبايىنا جىبەرىپ, سول كىسىمەن اقىلداسىپ وتىردىق. قازىرگى مۇقابا ۇلگىسىن سول كىسى تاڭدادى. ىشكى تەحنيكالىق جۇمىستارىنا كەلەر بولساق, باتىسقا ستاندارتقا سۇيەنە وتىرىپ, مينيماليزم ءستيلىن قولدانۋعا تىرىستىق», دەدى كىتاپتىڭ ديزاينەرى ارمان عينايات ۇلى.
ايتا كەتەيىك, كىتاپ ەكزيستەنتسيا فيلوسوفياسىنا, لوگوتەراپيا ىلىمىنە قىزىعاتىن وقىرماندارعا ارنالعان.
