اتالعان شارانى ەلىمىزدىڭ ۇلتتىق كينونى قولداۋ مەملەكەتتىك ورتالىعى جانە قىرعىزستاننىڭ مادەنيەت, اقپارات, سپورت جانە جاستار ساياساتى مينيسترلىگى كينەماتوگرافيا دەپارتامەنتى ۇيىمداستىرادى.
سونىمەن قاتار وعان ت. وكەەۆ اتىنداعى «قىرعىزفيلم» ۇلتتىق كينوستۋدياسى, قىرعىزستاننىڭ كينەماتوگرافيستەر وداعى مەن ش. ايتماتوۆ اتىنداعى كينو ءۇيى قولداۋ كورسەتەدى.
ۇلتتىق كينونى قولداۋ مەملەكەتتىك ورتالىعىنىڭ ءبولىم باسشىسى اسەل ىرىستىڭ ايتۋىنشا, كينوورتالىق بيىل قازاقستاندىق كينو كۇندەرىن 15 شەت مەملەكەتتە وتكىزۋدى ۇسىنىپ وتىر.
«بىشكەك – ەلىمىزدىڭ كينو كۇندەرى وتەتىن العاشقى قالا. وسىعان بايلانىستى «الا-توو» كينوتەاترىندا بولات قالىمبەتوۆتىڭ «مۇقاعالي» جانە ايجان قاسىمبەكتىڭ «وت» فيلمدەرى ۇسىنىلادى. ءار كارتينانى ونى تۇسىرگەن كوماندا تانىستىرادى. ءبىزدىڭ نەگىزگى ماقساتىمىز – ىسكەرلىك بايلانىستى دامىتۋ جانە وتاندىق فيلمدەردى حالىقارالىق دەڭگەيگە شىعارۋ. سونداي-اق بىرلەسكەن جوبالاردى ىسكە اسىرۋ ءۇشىن سەرىكتەستەر مەن ينۆەستورلاردى تارتۋ», دەپ اتاپ ءوتتى اسەل ىرىس.
«مۇقاعالي» كينوكارتيناسىندا كورنەكتى اقىننىڭ ءومىرىنىڭ سوڭعى جىلدارى باياندالعان. فيلم 25-ءشى تاللين كينوفەستيۆالىندە تاۋەلسىز قازىلار القاسىنىڭ ارنايى سىيلىعىن يەلەنگەن.
ال, «وت» ءفيلمىنىڭ الەمدىك پرەمەراسى بىلتىر پۋسانداعى حالىقارالىق كينوفەستيۆالدە ءوتتى. سونداي-اق كارتينا گەرمانياداعى «Film Festival Cottbus» جانە سينگاپۋرداعى «Singapore International Film Festival» كينوفەستيۆالدەرىندە ۇسىنىلدى. تۋىندىدا باستى ءرولدى سومداعان تولەپبەرگەن بايساقالوۆ سوچي, لوس-انجەلەس جانە سينگاپۋر كينوفەستيۆالدەرىندە ماراپاتقا يە بولدى.
سونىمەن قاتار «وت» كينوفيلمى مينسكىدە وتكەن ء«لىستاپاد» حالىقارالىق كينوفەستيۆالىندە «ۇزدىك رەجيسسەرلىك جۇمىس» جانە «ۇزدىك مۋزىكا» نوميناتسيالارىندا جۇلدە الدى. قىرعىز رەسپۋبليكاسىنداعى قازاقستاندىق كينو كۇندەرى اياسىندا ۇلتتىق كينونى قولداۋ مەملەكەتتىك ورتالىعىنىڭ تۇساۋكەسەرى وتەدى.
ءىس-شاراعا قاتىسۋ تەگىن.
