مۇناي سالاسىندا جاڭا قۇرىلعان زاۋىت نەگىزى 3 كەزەڭدى باستان وتكەرمەك. ونىڭ ءبىرىنشىسى – رەاگەنتتەر مەن ءتۇرلى قوسپا شىعارۋ. ودان سوڭ جىلدىڭ سوڭىنا قاراي ءونىم تۇرلەرىن كوبەيتىپ, جاڭا قوندىرعىلار قويىلادى. ال كەلەر جىلى تولىق قۋاتتىلىققا شىعادى دەپ جوسپارلانعان.
«قازمۇنايحيم» جشس-نا تيەسىلى ءوندىرىس ورنى قازاقستاندا مۇناي-حيميا ونىمدەرىن تولىق تسيكلمەن وندىرەتىن العاشقى زاۋىت رەتىندە تانىلىپ وتىر. قوسپالار ديزەلدى وتىندار شىعارۋ كەزىندە جانە شاعىن كولەمدە وندىرىلەتىن حيميالىق زاتتاردىڭ وندىرىسىندە قولدانىلادى. جىلىنا 30 مىڭ توننا رەاگەنت پەن مۇناي-حيميا قوسپالارىن شىعارىپ, ونىمەن ەلىمىزدىڭ مۇناي ءوندىرۋشى جانە مۇناي وڭدەۋشى كاسىپورىندارىن تولىق قامتاماسىز ەتپەك. ودان ارتىلعان ءونىمدى ەكسپورتقا باعىتتاۋ كوزدەلگەن.
– وڭىرىمىزدەگى جۇزەگە اسىرىلىپ جاتقان تەحنولوگيالىق ۇدەرىس زاماناۋي الەمدىك ەكونوميكا جاعدايىندا جىلدام شەشىم قابىلداۋعا مۇمكىندىك بەرەدى. زاۋىت ونىمدەرى نارىقتىڭ سۇرانىسىنا تولىقتاي ساي. جاڭا ءوندىرىس ورنى مەملەكەت, بيزنەس جانە عىلىمنىڭ ءوزارا ارەكەتتەستىگىن ءىس جۇزىندە دالەلدەپ وتىر. وسىنداي جوبالاردى جۇزەگە اسىرۋ ارقىلى ءوندىرىس سالاسىندا تەرەڭ زەرتتەۋلەر جۇرگىزۋگە بولاتىنىن بايقادىق, – دەدى پاۆلودار وبلىسىنىڭ اكىمى ابىلقايىر سقاقوۆ.
اتاپ وتەرلىگى, بۇل – وتاندىق كاسىپكەرلەرمەن مۇناي-حيميا سالاسىندا تولىق تسيكلدا ىسكە اسىرىلىپ جاتقان العاشقى جوبا. ونىڭ عىلىمي ويدىڭ كومەگىمەن ىسكە اسىرىلىپ جاتقاندىعى دا قۋانتادى. جەرگىلىكتى ءوندىرىس ماماندارى بۇل بيزنەس پەن عىلىمنىڭ ءوزارا بىرلەسۋىنىڭ جارقىن ۇلگىسى دەپ باعالايدى.
جوباعا تارتىلعان ينۆەستيتسيالاردىڭ جالپى سوماسى 2,5 ملرد تەڭگەنى قۇراعان. قازىرگى كەزدىڭ وزىندە مۇندا 30 تۇراقتى جۇمىس ورنى اشىلدى. كاسىپورىن ديرەكتورى الەن كەنجەباەۆتىڭ ايتۋىنشا, اعىمداعى جىلدىڭ سوڭىنا تامان جوعارى تەمپەراتۋرالى سينتەز قوندىرعىسىنىڭ قۇرىلىسى جوسپارلانۋدا.
ء«وندىرىس ورنىنداعى قۇرال-جابدىقتار تەحنولوگيالىق رەگلامەنتتەرگە ساي ورناتىلعان. ەلىمىزدەگى ەكولوگيالىق كودەكس تالاپتارىن نەگىزگە الا وتىرىپ, كەلەشەكتە كاسىپورىنداعى ءوندىرىس ەكولوگيالىق باقىلاۋدا بولادى. جالپى, نىسان تۇرعىزىلماي تۇرىپ, كوپشىلىك تىڭداۋلار وتكىزىلىپ, زاۋىتتىڭ قورشاعان ورتا مەن ادامدار ومىرىنە قاۋپى بار-جوقتىعىنا قاتىستى مەملەكەتتىك ەكولوگيالىق ساراپتاما جۇرگىزىلگەن. بارلىق زەرتتەۋلەردىڭ ناتيجەسى وڭ شىقتى. ءتورت سكۆاجينا قازىپ, جەر-استى سۋلارىن قاداعالاۋعا الدىق. تەحنولوگيالىق پروتسەسىمىز قورشاعان ورتاعا ەش زيانىن تيگىزبەيدى دەپ سەنىممەن ايتا الامىز», دەدى ول.
زاۋىت باسشىسى, سونداي-اق پاۆلودار وبلىسىنىڭ مۇناي-حيميا سالاسى بويىنشا ەلىمىزدە كوش باستاپ كەلە جاتقان ايماقتاردىڭ ءبىرى ەكەنىن اتاپ ءوتتى.
ءوندىرىس ورنى جەرگىلىكتى تورايعىروۆ ۋنيۆەرسيتەتىمەن كەلىسىمشارتقا وتىرىپ, ءبىلىم بەرۋ مەكەمەسىنىڭ جەتەكشى عالىمدارىمەن بىرلەسە جۇمىس ىستەۋدى ماقسات تۇتىپ وتىر. سەبەبى بۇگىنگى تاڭدا كاسىپورىنداعى جۇمىسشىلاردىڭ دەنىن جاستار قۇرايدى. مۇندا جاس مامانداردى وقىتۋ ىسىنە ەرەكشە كوڭىل بولىنبەك.
«پاۆلودار» ارنايى ەكونوميكالىق ايماعىندا كوپتەگەن كاسىپورىنداردىڭ جۇمىسى جاندانىپ كەلە جاتقانىن ايتۋ كەرەك. اۋماقتا بارلىعى 18 ءوندىرىس ورنى قىزمەت ەتىپ تۇر. بۇل جەردە زاۋىتتاردان شىعاتىن وندىرىستىك قالدىقتار مەن سارقىندى سۋلاردى تازارتۋ ءۇشىن كارىزدىك تازارتۋ جۇيەسى سالىنۋدا. قازىرگى كۇنى نىساننىڭ نەگىزگى كورپۋس عيماراتى سالىنىپ, بيولوگيالىق رەزەرۆۋار جابدىقتارىن ورناتۋ بويىنشا جۇمىستار اياقتالۋعا جاقىن.
مۇرات قاپان ۇلى,
جۋرناليست
پاۆلودار وبلىسى
