مامانداردىڭ ايتۋىنشا, اپپاراتتار جەتىسۋ وبلىسىندا جاڭا تۋعان سابيلەردىڭ ءومىرى مەن دەنساۋلىعىن ساقتاپ قالۋعا ۇلكەن كومەك بولماق. تەراپيالىق گيپوتەرميانى نارەستە ءومىرىنىڭ العاشقى ساعاتتارىندا قولدانعان ءتيىمدى. بۇل مي جاسۋشالارىنىڭ جۇمىسىن قالپىنا كەلتىرۋگە ەرەكشە جاعداي تۋعىزادى. ءدال تەمپەراتۋرالىق اسەر قان اعىنىن تۇزەتۋگە جانە نارەستەنىڭ باس ميىنىڭ جاسۋشالارى مەن زاقىمدانعان بولىكتەرىنىڭ قالپىنا كەلۋىن باقىلاۋعا مۇمكىندىك بەرەدى. امپليتۋدالىق ەلەكترەنتسەفالوگرافيا مونيتورى دارىگەرلەرگە ەم بارىسىن قاداعالاپ وتىرۋعا جانە ءتيىمدى تۇزەتۋگە كومەكتەسەدى.
ورتالىق جىل سايىن جەتىسۋ وڭىرىندەگى اۋدان, قالالاردان شامامەن 6 مىڭداي جۇكتى ايەلدى قابىلدايدى. بارلىق كۇردەلى جاعدايلاردا سىرقاتتار وسى مەكەمەگە جىبەرىلەدى.
ء«بىز Samruk-Kazyna Trust قورى مەن AYALA قورىنا كوپ راحمەت ايتامىز. بىرنەشە جىل بويى گيپوتەرميا اپپاراتى مەن ەەگ مونيتورىنا قول جەتكىزە المادىق. ءبىزدىڭ دارىگەرلەر بۇل قۇرىلعىمەن قالاي جۇمىس ىستەۋ كەرەكتىگىن بىلەدى. جىل سايىن ءبىز وسىنداي 250-گە جۋىق بالاعا قولدا بار قۇرالدارمەن كۇتىم جاسايمىز. ەندى ءبىزدىڭ ماماندارعا زاماناۋي مەديتسينالىق اپپاراتتار كومەكتەسەتىن بولادى. بۇل ءبىزدىڭ وبلىسىمىزداعى سابيلەر ءولىم-ءجىتىمى كورسەتكىشتەرىن جانە تۋىلعاننان اسفيكسياسى بار بالالاردىڭ مۇگەدەكتىك قاۋپىن تومەندەتەتىنىنە سەنىمدىمىن», دەيدى الماتى وبلىسى پەريناتالدىق ورتالىعىنىڭ ديرەكتورى قانات جۇماشەۆ.
2017 جىلى AYALA قورى قازاقستاندا العاش رەت اۆتوماتتى گيپوتەرميانى سىناقتان وتكىزدى. تالدىقورعاننىڭ پەريناتالدىق ورتالىعىندا «باسقارىلاتىن گيپوتەرميا» جوباسى شەڭبەرىندە قور بەرگەن توعىزىنشى اپپاراتتىق كەشەن ورناتىلىپ وتىر. 5 جىل ىشىندە گيپوتەرميا قوندىرعىلارى ەلىمىزدە 210-نان اسا بالانىڭ جانىن ساقتاپ قالعان. اعىمداعى جىلدىڭ قازان ايىنىڭ سوڭىنا دەيىن Samruk-Kazyna Trust دەمەۋشىلىك قولداۋىمەن AYALA قايىرىمدىلىق قورى ورال, وسكەمەن, اقتاۋ جانە شىمكەنت قالالارىنىڭ پەريناتالدىق ورتالىقتارىندا گيپوتەرميانىڭ اپپاراتتىق كەشەندەرىن ورناتۋدى جوسپارلاپ وتىر.
«ەلىمىزدىڭ بولاشاعى ءۇشىن ءاربىر بالانىڭ ءومىرىن ساقتاۋ ماڭىزدى. بيىل ءبىز نارەستەلەر ءولىم-ءجىتىمىنىڭ دەڭگەيى مەن بالالار رەانيماتسياسىن الدىڭعى قاتارلى مەديتسينالىق تەحنيكامەن قامتاماسىز ەتۋ ماسەلەسى وتكىر تۇرعان 5 ايماق ءۇشىن جابدىقتار ساتىپ الۋعا قارجىلاي قولداۋ كورسەتتىك. قازىرگى زامانعى اپپاراتتار تالدىقورعان قالاسىنىڭ وبلىستىق پەريناتالدىق ورتالىعىنىڭ دارىگەرلەرىنە بالالار ءومىرىن ودان ءارى ساقتاپ قالۋعا كومەكتەسەدى دەپ ۇمىتتەنەمىز», دەيدى Samruk-Kazyna Trust الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا.
AYALA قق پرەزيدەنتى ايدان سۇلەيمەنوۆانىڭ ايتۋىنشا, قور جۇمىسىنىڭ باستى ماقساتى – بالا ءولىمى مەن مۇگەدەكتىگىن ازايتۋ ىسىندە مەملەكەتكە جاردەمدەسۋ. بۇل ءۇشىن قاراجات جيناۋ مەن دەمەۋشىلەردى تارتۋ ارقىلى قور بالالار رەانيماتسياسىن زاماناۋي مەديتسينالىق جابدىقتارمەن قامتاماسىز ەتەدى جانە قازاقستاندىق نەوناتولوگ دارىگەرلەردىڭ بىلىكتىلىگىن ارتتىرۋعا كومەكتەسەدى. ء«ومىر سىيلايىق», «باسقارىلاتىن گيپوتەرميا» جوبالارى مەن باسقا دا باستامالار اياسىنداعى جۇمىس بارىسىندا قور جالپى سوماسى 2 ملرد تەڭگەگە قازاقستاندىق 67 دەنساۋلىق ساقتاۋ مەكەمەسىنە 1 100-دەن اسا رەانيماتسيالىق مەديتسينالىق جابدىقتاردى تاپسىردى. وسى جابدىقتار مەن دارىگەرلەر تەگىن كۋرستاردا بىلىكتىلىگىن ارتتىرۋ كەزىندە العان بىلىمدەرىنىڭ ناتيجەسىندە قازاقستاندا 200 مىڭنان اسا بالا امان قالدى.
اتاپ وتسەك, تالدىقورعانداعى وبلىستىق پەريناتالدىق ورتالىق 150 توسەككە ارنالعان, سونىڭ 10-ى پاتولوگيا جانە شالا تۋعان نارەستەلەردى ەمدەۋ بولىمشەسىندە ورنالاسقان. وندا 34 دارىگەر مەن 126 ورتا مەديتسينا قىزمەتكەرى جۇمىس ىستەيدى.
جەتىسۋ وبلىسى
