Scalerator باعدارلاماسى – ەل پرەزيدەنتىنىڭ 2025 جىلعا قاراي IT-ەكسپورتتى 500 ملن دوللارعا دەيىن ۇلعايتۋ جونىندەگى تاپسىرماسىن ىسكە اسىرۋ جولىنداعى تاعى ءبىر قادام.
«باعدارلامانىڭ ءبىرىنشى لەگىنىڭ ناتيجەلەرى تاڭعالدىردى. وتكەن جىلعى باعدارلاما تۇلەكتەرى كانادا, اقش, كيپر, ءۇندىستان, ۆەتنام, سينگاپۋر, مالايزيا, ساۋد ارابياسى, قىتاي, وزبەكستان, قىرعىزستان, ۋكراينا, بەلارۋس نارىقتارىندا كەلىسىمشارت جاساپ, سەرىكتەستەرمەن كەلىسسوزدەر جۇرگىزۋدە. بۇل قازاقستاندا باسەكەگە قابىلەتتى IT-ونىمدەر قۇرىلىپ جاتقانىن تاعى دا دالەلدەيدى, ال ءبىزدىڭ مىندەتىمىز – جاس كومپانيالاردىڭ جوبالارىن الەمگە تانىستىرۋعا جانە حالىقارالىق دەڭگەيدە ءتيىمدى كەلىسسوزدەر جۇرگىزۋگە ۇيرەتۋ», دەپ اتاپ ءوتتى Astana Hub دامۋ جانە ەكسپورت جونىندەگى باسقارۋشى ديرەكتورى اباي ابسامەت.
باعدارلاماعا قاتىسۋ تەگىن. IT-كومپانيالار ءۇشىن بۇل ءوز بيزنەسىن حالىقارالىق ساراپشىمەن تالقىلاۋ, دامۋ جوسپارىن ازىرلەۋدىڭ جانە شەتەلدىك ساتۋ مەن پايدانى ۇلعايتۋدىڭ ناقتى مۇمكىندىگى. ءاربىر قاتىسۋشى كومپانيا ءوسۋ نۇكتەلەرى مەن تيىمدىلىكتى ارتتىرۋ جولدارىن انىقتاي الادى, ەڭ باستىسى, ءوزىن حالىقارالىق نارىقتا تانىتادى. بۇل وتاندىق يننوۆاتسيالىق ونىمدەردىڭ ەكسپورتىن ۇلعايتۋ بويىنشا قويىلعان مىندەتكە قول جەتكىزۋگە ىقپال ەتەدى.
بيىلعى وقۋ باعدارلاماسى سولتۇستىك جانە وڭتۇستىك امەريكا, ەۋروپا نارىقتارىنا شىعۋ بويىنشا قۇزىرەتتىلىكتى ارتتىرۋعا باعىتتالعان. ول ماركەتينگ, PR, ساتۋ, ديزاين, قارجى, پيتچينگ, قۇقىقتانۋ, سالىقتار, زياتكەرلىك مەنشىك جانە باسقا سالالارداعى ساراپشىلاردان ترەكينگ پەن جەكە كەڭەستەردەن تۇرادى. سونىمەن قاتار ساباق بارىسىندا ستارتاپتار بيزنەس بويىنشا سەرىكتەستەردى ءتيىمدى ىزدەۋدى, كليەنتتەردى تارتۋدى جانە ءونىمدى نارىقتا بەلسەندى جىلجىتۋدى ۇيرەنەدى.
