مۋزەي قىزمەتكەرلەرىنىڭ ايتۋىنشا, ساماۋرىندار ءبىر-بىرىنە ۇقسامايدى. ويتكەنى بۇل بۇيىمنىڭ كولەمى دە ءارتۇرلى, جاسالۋى دا وزگەشە. سونىڭ ىشىندە ويۋ-ورنەگىمەن ەرەكشەلەنەتىن ساماۋرىننىڭ ءبىر عاسىرعا جۋىق تاريحى بار. ونى XIX عاسىردىڭ ۇزدىك تۋىندىسى دەۋگە بولادى.
ءبىر قاراعاندا, كادىمگى ساماۋرىندار سەكىلدى بولعانمەن, تۇرباسىنىڭ ءوزى اسەم ورنەكپەن بەزەندىرىلگەن. سۋ قۇياتىن رەزەرۆۋارىنا مەتالل تۇتىك ورناتىلعان. سارى جەزدەن جاسالعان بۇيىمنىڭ بيىكتىگى – 28 سم, تۇرباسىنىڭ ولشەمى – 23ح8,5 سم.
بۇل – كونەدەن جەتكەن جادىگەر. ونى نۇر-سۇلتان قالاسىنىڭ تۇرعىنى, قازاقستان سۋرەتشىلەر جانە ديزاينەرلەر وداعىنىڭ مۇشەسى, زەرگەر, ۇستا بەرىك ءالىباي تاپسىرىپتى. ول ساماۋرىندى استانادا وتكەن ەكسپو-2017 حالىقارالىق كورمەسىندە اۋعانستان حالىقتارىنىڭ انتيكۆارلىق زاتتارى پاۆيلونىنان ساتىپ العان.
ونەر يەسىنىڭ ايتۋىنشا, ساماۋرىندى 1930-جىلدارى تاعدىردىڭ تالكەگىمەن ورتالىق ازيادان كوشىپ بارعاندار تۇتىنعان. سوعان قاراعاندا, بۇل ساماۋرىننان مىڭعىرعان مالى بار ءبىر باي جانتايىپ جاتىپ شاي ءىشتى مە ەكەن؟
اتىراۋ وبلىسى
