سۋرەتكەردىڭ ىشكى الەمىنە ۇڭىلسەڭىز, ءسىز دە ساعىمعا وراناسىز. كوز الدىڭىزدا جىلدار جۇيتكي جونەلەدى. ءسىز ۋاقىتقا ىلەسە المايسىز, ماڭگىلىك قانشا قۋالاساڭىز دا جەتكىزبەيتىن ەلەس... شەبەرحاناداعى مىڭ بوياۋدىڭ ارقايسىسى وزگە عالامشاردىڭ ءتۇر-ءتۇسىن, كەسكىن-كەلبەتىن بەدەرلەپ تۇرعانداي. اۆتور – جالعىز, كەيىپكەر كوپ, ياكي عاسىردىڭ ەركىنە باعىندىرعان قىلقالام شەبەرىنە دارالىق ينستينگ بەرىلگەن.
بۇل – تىلەۋجان باتانوۆ. عاجايىپ سۋرەتشى ءھام سكۋلپتور. ونىڭ ابستراكتسياعا تولى كارتينالارى كەز كەلگەن ينتەرەرگە, ءتىپتى بەيمالىم تاريحي وقيعالارعا سىيىپ كەتەدى. ونىڭ ابستراكتسيونيزمگە اۋەستىگى سونشا, قولتاڭباسىندا ارت-دەكو مەن ءمينيماليزمنىڭ ەستەتيكالىق باستاۋى تۇر. ەگەر ءسىز ءۇيىڭىزدى بەزەندىرۋ ءۇشىن كەسكىندەمە ساتىپ العىڭىز كەلسە, ابستراكتسيا كەز كەلگەن زاماناۋي ستيل ءۇشىن ەڭ جاقسى تاڭداۋ بولىپ قالا بەرمەك. بۇل رەاليزمنەن قاشۋدىڭ امالى ەمەس, قايتا ونى بيىككە كوتەرۋ. مۇنى سۋرەتشى جاقسى تۇيسىنگەن.
ماسەلەن, سۋرەتكەردىڭ ءبىز ۇسىنعان كارتيناسىنا نازار سالىڭىزشى. قىران قۇس, قىش ىدىستار, اتتى ادام, شام, دومالانعان دۇنيە ءبارى-ءبارى الىستان مۇنارتادى, ولار ءار ءداۋىردىڭ بەلگىلەرى, بىراق كەنەپكە كەنەتتەن قونباعان. اۆتوردىڭ ويلاۋ ءورىسى اسپاندى تۇتاستاي ءبىر جارىقتىڭ شەڭبەرىنە بايلاپ, وتكەن مەن بۇگىنگىنىڭ اراسىنا شەكارا قويمايدى. شىعارمانىڭ ەرەكشەلىگى دە وسىندا.
ءيا, ءبىر قاراعاندا تۋىندىدان رەاليستىك مانەر كورە المايمىز. كەنەپكە قۇددى فۋتۋريزم مەن كۋبيزم رۋحى قونعان سەكىلدى. ينتەرەرى وتە باي, دەرەكسىز دە ەمەس. ابستراكتسيانى ءوزىنىڭ ساندىلىگىمەن جانە دەكورىنىڭ كوپتىگىمەن تاريحي ستيلگە سايكەس كەلتىرىلگەن. مۇندا شەكسىزدىكتەن بولەك, مەزگىلدەردىڭ ۇيلەسىمى, ەسكىلىككە كوزقاراس, بولاشاققا دەگەن بايلام بار. سۋرەتكەردىڭ كارتيناعا اتاۋ قويا الماعانى سودان دا بولار. ءبۇتىن دۇنيەنى ءبىر سوزبەن سيپاتتاۋ مۇمكىن بە؟!
