سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, جول-كولىك اپاتى 19 شىلدە كۇنى رەسپۋبليكالىق ماڭىزداعى «چەليابى-ءنوۆوسىبىر» اۆتوجولىنىڭ 645 شاقىرىمىندا بولعان. م.جۇماباەۆ اۋدانىنىڭ قاراقوعا اۋىلى ماڭىندا رەسەيلىك وتباسى مىنگەن «Toyota Corolla» اۆتوكولىگىن وسى اۋداننىڭ «Toyota Land Cruiser» اۆتوكولىگىن مىنگەن 35 جاستاعى تۇرعىنى سوققان.
«ەر ادام رۋلگە ماس كۇيدە وتىرعان, ءبىر مەزەت جولدىڭ قارسى باعىتىنا شىعىپ كەتىپ, كەپ قالعان كولىكپەن بەتپە-بەت سوقتىعىسقان. «Toyota Corolla»-نىڭ جولاۋشىسى رەسەي ازاماتشاسى وقيعا ورنىندا قايتىس بولدى, ونىڭ 7 جاسار ۇلى اۋرۋحاناعا جاتقىزىلدى. «Toyota Land Cruiser» جۇرگىزۋشىسى ۋاقىتشا قاماۋدا ۇستاۋ يزولياتورىنا قامالدى», دەلىنگەن حابارلامادا.
ەر ادام 7 جىلعا باس بوستاندىعىنان ايىرىلۋى مۇمكىن.
«كولىكتى ماس كۇيدە باسقارۋ, اسىرەسە, جوعارى جىلدامدىقپەن ءجۇرى قايعىلى جاعدايلارعا اپارىپ سوعۋى مۇمكىن. رەسپۋبليكالىق جولدارداعى قوزعالىس كەزىندە جۇرگىزۋشىلەر بارىنشا ساق بولۋى ءتيىس. جول-كولىك وقيعالارى كوپ جاعدايدا الىس جولعا شىققان جۇرگىزۋشىنىڭ شارشاۋىنان, باسىپ وزۋ, بۇرىلۋ, جىلدامدىقتى اسىرۋ سياقتى مانەۆرلەردى جاساعان كەزدە بولاتىنىن ەسكە سالامىز», دەيدى سقو پد جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى الەكساندر روزباح.
