بانكتەر بۋكمەكەرلەرگە كومەكتەسىپ وتىر ما؟

350 مىڭ لۋدومان بار

جاقىندا ءماجىلىس دەپۋتاتتارى ءلاززات رامازانوۆا مەن ەكاتەرينا سمىشلياەۆا پرەمەر-ءمينيستردىڭ ورىنباسارى ەرالى توعجانوۆتىڭ اتىنا دەپۋتاتتىق ساۋال جول­داپ, قازاقستاندا 350 مىڭعا جۋىق ادام­نىڭ لۋدومان ەكەنىن جەتكىزدى. ەكو­نو­ميكالىق ساراپشىلاردىڭ ايتۋىنشا, بانكتەر بۋكمەكەرلىك كومپانيالاردىڭ شوتىنا اقشا سالۋعا ىڭعايلى جاعداي قاراستىرىپ قويعان.

«قارجى ينستيتۋتتارى لوگيندەردى تولتىرۋ ءۇشىن نەسيە قاراجاتىن پايدالانۋعا تىيىم سالىپ, 25 جاسقا تولماعان ادامدار ءۇشىن اۋدارىمداردى شەكتەۋى كەرەك. سونداي-اق جۇيەلى تۇردە ستاۆكا قويۋ­مەن اينالىساتىن ازاماتتارعا نەسيە بەرۋ­دى دە توقتاتۋ كەرەك. بۇل ولاردىڭ ويىن­قۇمارلىقپەن كۇرەسكە قوسقان ەلەۋلى ۇلەسى بولار ەدى. دەپۋتاتتار دۇرىس ساۋال جولدادى, ەندى تەك اتالعان تاقىرىپتى دامىتا ءتۇسۋ قاجەت», دەدى ساراپشىلار. 

وسى ويلاردى قورىتا كەلە, بانكتەر بۋكمەكەرلىك كومپانيالارمەن سەرىكتەستىك ورناتۋ ارقىلى ويىنقۇمارلىقتىڭ دامۋى­نا جانە اقشاسىنان ايىرىلىپ, قارىزعا باتقان ازاماتتاردىڭ كوبەيۋىنە «ۇلەس قوسىپ» وتىرعان جوق پا دەگەن ساۋال تۋا­دى. سۇراعىمىزدى بانكتەردىڭ بي اعاسى – قارجى نارىعىن رەتتەۋ جانە دا­مىتۋ اگەنتتىگىنە جولدادىق. ولار ازامات­تىق كودەكستىڭ 749-بابىنىڭ 1-تار­ماعىنا سىلتەمە جاساي وتىرىپ, كليەنتتiڭ اقشانى پايدالانۋ باعىتىن بەلگiلەۋ مەن باقىلاۋعا جانە ونىڭ ءوز قالاۋىنشا اقشاعا بيلiك ەتۋ قۇقىعىنا زاڭداردا كوز­دەلمەگەن شەك قويۋعا بانكتىڭ قۇقىعى جوق ەكەنىن جەتكىزدى.

«بانكتەردىڭ ءموبيلدى قوسىمشالارى ارقىلى بۋكمەكەرلىك كەڭسەلەردىڭ پايداسىنا تولەمدەردى جۇزەگە اسىرۋعا شەكتەۋلەر كليەنتتەرمەن جاسالعان شارت نەمەسە زاڭدار دەڭگەيىندە بەلگىلەنۋى مۇمكىن. قول­دانىستاعى زاڭناماعا سايكەس ويىن بيزنەسى سۋبەكتىلەرىنىڭ قىزمەتى زاڭدى بولىپ سانالادى جانە «ويىن بيزنەسى تۋرالى» قازاقستان رەسپۋبليكاسى زاڭىنىڭ نورمالارىمەن رەتتەلەدى», دەلىنگەن جاۋاپتا.

اگەنتتىكتىڭ حابارلاۋىنشا, قازىر اق­پارات جانە قوعامدىق دامۋ مينيسترلىگى «قازاقستان رەسپۋبليكاسىنىڭ كەيبىر زاڭ­نامالىق اكتىلەرىنە مەملەكەتتىك جاس­تار ساياساتى ماسەلەلەرى بويىنشا وزگە­رىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن ازىرلەگەن. وندا كازينو, ويىن اۆتوماتتارى زالدارى, بۋكمەكەرلىك كەڭسەلەر مەن توتاليزاتورلاردا تولەمدەردى جۇزەگە اسىرۋعا نەمەسە شوتتاردى كرەديتتىك كارتالار ارقىلى تولىقتىرۋعا تىيىم سالۋدى بەلگىلەۋ بولىگىندە «ويىن بيزنەسى تۋرالى» زاڭعا وزگەرىستەر ەنگىزۋ جوسپارلانعان.

«كليەنت قۇقىعىن شەكتەي المايمىز»

Jusan Bank ءموبيلدى قوسىمشاسى­نىڭ ءتۇرلى كاتەگورياسىندا كورسەتىلگەن مىڭنان استام سەرىكتەسپەن ىنتىماقتاستىق ورناتقان.

«بۋكمەكەرلىك كومپانيالارعا تۇسە­تىن ترانزاكتسيالار ۇلەسى بيىل قاڭتاردان 30 ماۋسىمعا دەيىنگى ارالىقتا بۇكىل ترانزاك­تسيا­نىڭ 0,6 پايىزىن قۇرادى. بانك ءوز قىزمەتىن قازاقستان رەسپۋبليكاسىنىڭ بانك قىزمەتى جانە بانكتەر تۋرالى زاڭى اياسىندا جۇزەگە اسىرادى. ءبىز جاۋاپ­كەر­شى­لىكتىڭ بارلىق دەڭگەيىن تۇسىنەمىز جانە بۋكمەكەرلىك كەڭسەلەردى تانىمال ەتۋ ءۇشىن ەشقانداي ماركەتينگتىك بەلسەندىلىك جۇر­گىزبەيمىز. بانك ارقاشان قازاقستان رەس­پۋبليكاسىنىڭ زاڭناماسىن جانە رەتتەۋشى ورگانداردىڭ رەسمي تالاپتارىن ساقتايدى. زاڭناما نەمەسە رەتتەۋشى ورگانداردىڭ تالاپتارى شەڭبەرىندە شەكتەۋلەر ەن­گىزىل­گەن جاعدايدا بانك ءوز جۇمىسىنىڭ رەگلامەنتىنە ءتيىستى وزگەرىستەر ەنگىزەدى», دەلىنگەن بانك جاۋابىندا.

ولاردىڭ حابارلاۋىنشا, Jusan كليەنت­تەرى نەسيە كارتاسى جانە ءبولىپ-تولەۋ كارتاسى, ياعني نەسيە قاراجاتى ەسەبىنەن ويىن بيزنەسى ءۇشىن POS-تەرمينال ارقىلى تولەمدەر جاساي المايدى.

«ويىن بيزنەسى تۋرالى» زاڭعا سايكەس, جەكە تۇلعا ارنايى ءوتىنىش جىبەرۋ ارقىلى ءوزىن بەلگىلى ءبىر مەرزىمگە دەيىن ءباس تىگۋدەن شەكتەي الادى. مۇنداي قۇزىرەتتى بانك پەن بۋكمەكەرلىك كەڭسەنىڭ وزىنە دە بەرۋ قاجەت سياقتى. ياعني كليەنت ۇتىلىسىنىڭ نەمەسە ءباس سوماسىنىڭ شەكتى مولشەرىن بەلگىلەپ, سول مولشەردەن اسىپ كەتكەن كەزدە جەكە تۇلعانى ويىندارعا ءباس تىگۋدەن اۆتوماتتى تۇردە الىپ تاستاۋ. كەيىن ونىڭ بانكتەردە, ميكروقارجى ۇيىمدارىندا نەسيەلەرىنىڭ جابىلعانىنا كوز جەتكىزگەننەن كەيىن بارىپ, قايتادان رۇقسات بەرۋ. شامامەن, وسىنداي ءتارتىپ جۇيەسىن ەنگىزۋگە نە كەدەرگى؟

«ۇتىستاردىڭ ماكسيمالدى سوماسىن نەمەسە كليەنتتىڭ ۇتىس تىگۋىنىڭ سوماسىن بەل­گىلەۋدەگى شەكتەۋلەردى جانە وسى سومادان اسىپ كەتكەن كەزدە جەكە تۇلعانى ويىن­دارعا ستاۆكا جاساۋدان اۆتوماتتى تۇر­دە الىپ تاستاۋدى ويىن ۇيىمىنىڭ ءوزى جۇ­زەگە اسىرۋى كەرەك. بانك تاراپىنان قا­­زىرگى ۋا­قىتتا بۇل شەكتەۋدى ەنگىزۋ مۇم­كىن ەمەس, ويتكەنى بانك كليەنتتىڭ ارەكەت بوس­تان­دىعىن زاڭنامالىق دەڭگەيدە شەك­تەۋ­­گە قۇقىلى ەمەس», دەيدى Jusan باس­شى­­لىعى.

شەكتى سوما – 150 مىڭ تەڭگە

«نۇربانك» اق-نىڭ حابارلاۋىنشا, قارجى ينستيتۋتى پروبلەمالىق نەسيەلەرمەن جۇمىس ىستەۋ كەزىندە قۇمار ويىن­داردىڭ كەسىرىنەن تولەم قابىلەتىن جوعالت­قان قارىز الۋشىلاردى ماقساتتى تۇردە انىقتامايدى. 2022 جىلدىڭ ماۋسىمىندا «نۇربانك» ءموبيلدى قوسىمشاسى ارقىلى بۋك­مەكەرلىك كەڭسەلەردىڭ پايداسىنا جا­سال­عان تولەم كولەمى 3,6 ملن تەڭگەنى قۇ­را­عان.

ء«بىزدىڭ بانك ارقىلى اتالعان باعىتتا تولەم جاساعان ازاماتتار بەلسەندىلىگى جو­عا­رى ەمەس. بىزدە كوممۋنالدىق قىزمەت, ءم­و­بيلدى بايلانىس, ينتەرنەت, كرەديت جانە زايم, تەلەۆيزيا بويىنشا تولەمدەر تانىمال قىزمەت بولىپ سانالادى. قازىرگى ۋاقىتتا زاڭدى بۋكمەكەرلەر قىزمەتى قازاقستان رەسپۋبليكاسىنىڭ زاڭىمەن رەتتەلەدى جانە ليتسەنزيا بەرىلەدى. بۋك­مەكەرلىك كەڭسەلەر مەملەكەتتىك باقىلاۋدا جانە تولەمدەرگە قاتىستى قارجى ينس­تيتۋتتارىمەن ءوزارا بايلانىستا بولادى. ولار مولشەرلەمەلەردى ەسەپكە الۋ ورتالىعىنىڭ يدەنتيفيكاتسياسىنان وتۋگە مىندەتتى», دەلىنگەن بانك مالىمدەمەسىندە.

ۇكىمەت باسشىسىنىڭ ورىنباسارى ەرالى توعجانوۆ ءساۋىر ايىندا ءتيىستى ورگان­دارعا ويىنقۇمارلىق ماسەلەسى بويىنشا بىرقاتار تاپسىرما بەرگەن ەدى. سو­نىڭ ىشىندە ينتەرنەت-كازينونى ۇيىم­داستىرۋشى تۇلعالاردىڭ ءتىزى­مىن بەل­گىلەۋ; بانكتەر مەن تولەم جۇيە­لەرىنە وسى تۇلعالاردىڭ قارجى وپەراتسيالارىن جۇرگىزۋگە تىيىم سالۋ; نەسيە كارتالارىنىڭ كومەگىمەن كازينولاردا, ويىن اۆتوماتتارى زالدارىندا, بۋكمەكەرلىك كەڭسەلەردە جانە توتاليزاتورلاردا تولەمدەردى جۇزەگە اسىرۋعا نەمەسە شوتتاردى تولىقتىرۋعا تىيىم سالۋ سياقتى تاپسىرمالار بار ەدى. «نۇربانك» اتالعان جوسپارلار نەگىزىندە نە ۇكىمەتتەن, نە قارجى نارىعىن رەتتەۋ جانە دامىتۋ اگەنتتىگىنەن تاپسىرما تۇسكەن جوق دەپ حابارلادى.

Home Credit Bank ونلاين بيزنەس دەپارتامەنتىنىڭ ديرەكتورى ستانيسلاۆ تياننىڭ ايتۋىنشا, بانك ويىن بيزنەسىنە اقشا سالۋ بويىنشا شەكتى سوما مولشەرىن بەلگىلەگەن.

ء«بىز بانكتىڭ كليەنتتەرى ەلىمىزدىڭ زاڭناماسىمەن رۇقسات ەتىلگەن قىزمەتتەردىڭ بارلىق ءتۇرىن الۋعا تولىق قۇقىعى بار دەگەن قاعيداتتى ۇستانامىز. سونىمەن قاتار كليەنتتەرىمىزدىڭ قارجىلىق ءال-اۋقا­تىن ويلايمىز. سوندىقتان ءموبيلدى قوسىم­شادا شەكتەۋلەر بار: كليەنت «بۋك­مەكەرلىك كەڭسەلەر» كاتەگورياسى بويىنشا ايىنا 150 مىڭ تەڭگەدەن استام سومادا تولەم جاساي المايدى. بۇل شەكتەۋ قاۋىپسىزدىك دەڭگەيىن كوتەرۋ, سونداي-اق الاياقتىق وپەراتسيالار تاۋەكەلىن تومەندەتۋ ماقساتىندا جاسالدى. قاجەت بولعان جاعدايدا الدىن الۋ شارالارىن قولدانۋ ءۇشىن مۇنداي وپەراتسيالاردىڭ ترانزاكتسيا كولەمىن قاداعالاپ وتىرامىز», دەيدى.

س.تياننىڭ حابارلاۋىنشا, بانك كليەنت­تەرى سوڭعى ۋاقىتتا بۋكمەكەرلىك كەڭسە شوتتارىنا اقشا سالۋدى ازايتا باستاعان.

«بيىل قاڭتاردان ماۋسىمعا دەيىن Home Credit Bank ءموبيلدى قوسىمشاسى ارقىلى بۋكمەكەرلىك كەڭسەلەرگە جاسالعان تولەمنىڭ جالپى كولەمى 2021 جىلدىڭ وسى كەزەڭىمەن سالىستىرعاندا 12 پايىزعا قىسقاردى. قازىرگى كەزدە ونداي كومپانيالار ءۇشىن جاسالعان تولەم ۇلەسى وتە تومەن جانە بۇكىل ترانزاكتسيانىڭ نەبارى 0,04 پايىزىن قۇراپ وتىر», دەيدى دەپارتامەنت باسشىسى.

350 مىڭ ويىنقۇمار – جالعان دەرەك

بۋكمەكەرلىك جانە لوتەرەيالىق بيزنەستى وزدىگىمەن رەتتەيتىن ۇيىمىنىڭ حابارلاۋىنشا, ەلىمىزدە 350 مىڭ ويىنقۇماردىڭ
10 ملن تەڭگە كولەمىندە ورتاشا قارىزى بار ەكەنىن راستايتىن ناقتى دالەل جوق. اتال­عان تسيفرلار نە بەلگىلى عىلىمي جۇمىس, نە بەدەلدى دەرەك كوزى ارقىلى راستالماعان.

«ەگەر كورسەتىلگەن ستاتيستيكاعا سەنىپ, لۋدوماندار سانىن قارىزدىڭ ورتاشا سوماسىنا كوبەيتەر بولساق, بۋكمەكەرلىك كەڭسەلەردىڭ جىلدىق اينالىمىنان ون ەسە كوپ اۋقىمدى سوما شىعار ەدى. وكىنىشكە قاراي, ول ستاتيستيكا ينتەرنەت ارقىلى جەدەل تاراپ, دەپۋتات, قوعام بەلسەندىلەرى جانە جۋر­ناليستەر ءۇشىن ادەپكى دەرەك كوزىنە اينالىپ كەتتى. ستاتيستيكانى مول­شەر­­لەمەلەردى ەسەپكە الۋ ورتالىعى دا ءوز سايتىنا جاريالادى», دەلىنگەن بىزگە ۇسىن­عان جاۋاپتا.

ۇيىم باسشىلىعىنىڭ ايتۋىنشا, ۇيىم­نىڭ مىندەتى – زاڭسىز ويىن رەسۋرس­تا­رىمەن كۇرەسۋ, قۇمار ويىندارعا تاۋەل­دىلىكتەن زارداپ شەگەتىن ازاماتتارعا كو­مەكتەسۋ جانە قۇمار ويىندارىنىڭ زيانىن بولدىرماۋ. 2019 جىلى ۇيىم مادەنيەت جانە سپورت مينيسترلىگىمەن بىرلەسە وتىرىپ, 250-دەن استام وفشورلىق جانە زاڭسىز رەسۋرستاردى بۇعاتتاعان.

«2021 جىلى ءبىزدىڭ ۇيىم ويىنعا تاۋەلدىلىكتى ەمدەۋ ءۇشىن ارنايى جەكە كلينيكالارمەن ىنتىماقتاستىقتى باس­تادى. سونداي-اق اقشانى جىلىستاتۋعا جانە تەرروريزمدى قارجىلاندىرۋعا قارسى كۇرەس سالاسىندا قارجىلىق مونيتورينگ اگەنتتىگىمەن بىرلەسكەن ءىس-شارالاردى جۇر­گىزەدى. مۇندا ۇيىم ءوز قۇزىرەتى شە­گىندە ۇيىم مۇشەلەرىن جانە جالپى ءباس تىگۋشىلەر قاۋىمداستىعىن باقىلايدى. بانكتەردىڭ ءموبيلدى قوسىمشاسى مەن بۋكمەكەرلەردىڭ بىرلەسكەن جۇمىسىنان ەشقانداي پروبلەما كورمەيمىز. ويىن بيزنەسىندە زاڭسىز جۇمىس ىستەيتىن ۇيىم­دار مەن كومپانيالار بار – بۇل ويىن قىز­مەتتەرىنىڭ زاڭسىز نارىعىنىڭ قالىپ­تاسۋىنا ىقپال ەتەدى. بۋكمەكەرلىك كەڭ­سەلەردىڭ بانكتىك قوسىمشالارمەن تىكەلەي جۇمىس ىستەۋى بۋكمەكەرلىك كەڭسەلەر جۇمى­سى­نىڭ اشىقتىعىنا ىقپال ەتەدى. نارىق­تىڭ زاڭدىلىعى مەن اشىقتىعى بارلىق قاتىسۋشىنىڭ ءوز تۇتىنۋشىلارى الدىندا جاۋاپتى بولاتىنىن بىلدىرەدى», دەيدى.

ۇيىم مالىمەتىنشە, جىل باسىنان­ بەرى بۋك­مەكەرلىك قاۋىمداستىق 30 ملرد تەڭ­گەدەن استام سالىق تولەگەن. ولار بۋك­مەكەرلىك كەڭسەلەر قىزمەتىنىڭ قارىشتاپ دامۋى وتاندىق سپورتتىڭ ورىستەۋىنە جول اشىپ جاتىر دەگەن وي ايتادى:

«زاڭسىز نارىقتىڭ تومەندەۋى ليتسەنزياسى بار بۋكمەكەرلىك كەڭسەلەردىڭ كىرىسىنىڭ ارتۋىنا الىپ كەلەدى. سونداي-اق بۋكمەكەرلىك كەڭسەلەر قازاقستانداعى ەڭ ءىرى فۋتبول, حوككەي, باسكەتبول, كيبەرسپورت كوماندالارىنا, ءارتۇرلى سپورت ءتۇرى بو­يىن­شا تۋرنيرلەرگە قارجىلىق دەمەۋشىلىك جا­ساي­تىنىن اتاپ وتكەن ءجون. وسىنىڭ ءبارى بالالار مەن جاسوسپىرىمدەر سپورتىنىڭ دامۋىنا, ولاردىڭ حالىقارالىق ارەنادا ءساتتى ونەر كورسەتۋىنە ىقپال ەتەدى. سوڭعى جىلدارى بۋكمەكەرلىك كومپانيالار ءىرى سپورتتىق ترانسلياتسيالاردى ساتىپ الىپ, ونى تەلەارناعا ۇسىنىپ, حالىقتىڭ جاھاندىق سپورت مەرەكەسىن تاماشالاۋىنا جاعداي جاساۋدا».

ولاردىڭ ايتۋىنشا, 2019 جىلى ءباس تىگۋگە بايلانىستى كليەنتتىڭ ءوز-ءوزىن شەكتەۋ تەتىگى ەنگىزىلدى. سونداي-اق بۋكمەكەرلىك قاۋىمداستىق حالىقارالىق پراكتيكادا كەڭىنەن قولدانىلاتىن «ويىن جاۋاپكەرشىلىگى» ينسترۋمەنتتەرىنىڭ نەگىزگى بولىگىن قولدانا باستاعان.

كرەديتى بار ادام ءباس تىگە المايدى

ماقالا باستالعالى دىمىمىزدى قۇرتقان وسى اڭگىمە ەدى. كرەديتى بار ادامعا ءباس تىگۋگە رۇقسات ەتىلمەسىن. ارنايى بازا ارقىلى ونىڭ ويىندارعا ءباس تىككەنىن انىقتاۋ دا قيىندىق تۋدىرماسا كەرەك. ادامنىڭ ءباس تىگىپ, قيراي ۇتىلىپ, ءسويتىپ, وتباسىن قيىن جاعدايعا قالدىرىپ, بانك الدىندا دا تولەم قابىلەتىنەن جۇرداي بولۋى قارجى ينستيتۋتىنا كەرەك پە؟ سوندىقتان بانكتەر بۋكمەكەرلىك كەڭسەلەر شوتىن تولىقتىرۋ تەتىكتەرىنە شەكتى مولشەر بەكىتۋى نەمەسە ءبىرجولا توقتاتۋى كەرەك شىعار؟

ءبىزدىڭ ساۋالىمىزعا جاۋاپ بەرگەن مادەنيەت جانە سپورت مينيسترلىگىنىڭ تۋريزم يندۋسترياسى كوميتەتى مۇنداي تالاپتىڭ جاقىن ارادا زاڭعا ەنگىزىلۋى مۇمكىن ەكەنىن حابارلادى.

«مينيسترلىك مۇددەلى ورگاندارمەن بىرلەسىپ, اعىمداعى زاڭ جوبالاۋ جۇمىستارى شەڭبەرىندە زاڭناماعا مىنالاردى كوزدەيتىن تۇزەتۋلەردى ەنگىزۋ باعىتىندا جۇمىستار پىسىقتالۋدا:

- سوت اكتىسىنىڭ نەگىزىندە قازاقستان رەسپۋبليكاسىنىڭ اۋماعىندا قىزمەتى زاڭسىز دەپ تانىلعان ويىن بيزنەسىن شەتەلدىك ۇيىمداستىرۋشىلاردىڭ ارنايى تىزبەسىن جۇرگىزۋ بويىنشا مادەنيەت جانە سپورت مينيسترلىگىنىڭ قۇزىرەتىنە ەنگىزۋ;

- قازاقستاننىڭ بانكتەرى مەن تولەم جۇيەلەرىنە اتالعان تىزبەدە تۇرعان تۇلعا­لار­دىڭ پايداسىنا قارجى وپەراتسيا­لارىن جۇرگىزۋگە تىيىم سالۋدى بەلگىلەۋ;

- بۇقارالىق اقپارات قۇرالدارىن نەمەسە تەلەكوممۋنيكاتسيا جەلىلەرىن پاي­دالانا وتىرىپ جاسالعان ينتەرنەت-كازي­نونى ۇيىمداستىرۋشىلار ءۇشىن جاۋاپ­كەر­شىلىك­تى بەلگىلەۋ ارقىلى جۇزەگە اسىرىلادى.

قازىرگى ۋاقىتتا, اتالعان تۇزەتۋلەر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى (بۇدان ءارى – زاڭ جوباسى) شەڭبەرىندە قاراستىرىلىپ, پارلامەنت ءماجىلىسىنىڭ قاراۋىندا جاتىر.

سونىمەن قاتار زاڭ جوباسى بويىنشا ءماجىلىستىڭ جۇمىس توبىندا, ونىڭ ىشىندە ۇلتتىق بانك, قارجى نارىعىن رەتتەۋ جانە دامىتۋ اگەنتتىگى, قارجى نارىعىن رەتتەۋ جانە دامىتۋ قاۋىمداستىعى, قازاقستان قارجىگەرلەرى مەن ەكىنشى دەڭگەيلى بانكتەردىڭ (Kaspi Bank, Halyk Bank جانە ت.ب.) وكىلدەرىنىڭ قاتىسۋىمەن كازينودا, ويىن اۆتوماتتارى زالدارىندا, بۋكمەكەرلىك كەڭسەلەردە جانە توتاليزاتورلاردا كرەديتتىك كارتالار كومەگىمەن تولەمدەردى جۇزەگە اسىرۋعا نەمەسە شوتتاردى تولىقتىرۋعا تى­يىم سالۋدى بەلگىلەۋ بويىنشا بۇرىن ۇسىنىلعان تۇزەتۋدى تالقىلاۋ بارىسىندا مۇنداي نورمانى الىپ تاستاۋ تۋرالى شەشىم قابىلدانىپ, كرەديتتەر بويىنشا مەرزىمى ەداۋىر مەرزىمى وتكەن بەرەشەگى بار قارجىلىق جاعدايى قيىن ادامداردى قۇمار ويىندارعا جانە ءباس تىگۋگە قاتىسۋعا جىبەرۋگە تىيىم سالۋدى كوزدەيتىن بالامالى تەتىك رەتىندە ۇسىنىلدى», دەلىنەدى ۆەدومستۆو جاۋابىندا.

سونىمەن قاتار مينيسترلىك قازىرگى ۋاقىتتا بۋكمەكەرلىك كەڭسەلەردىڭ جارناماسىن شەكتەۋ ماسەلەسىن دە قاراستىرىپ جاتقاندارىن مالىمدەدى.

ەشكىم دە دايار كليەنتتەن ايىرىلعىسى كەلمەيدى. سوندىقتان بانكتەردى تۇسىنەمىز. بىراق ولار زاڭ وزگەرسە, ءبىز دە وزگەرەمىز دەپ وتىر. بۋكمەكەرلىك قاۋىمداستىقتىڭ پارمەنى قاتتى ەكەنىن دە سەزەمىز. سپورتقا, ترانسلياتسياعا دەمەۋشىلىك ەتىپ وتىرعان سوڭ ءسوزى ءوتىمدى بولادى دا. تارازىنىڭ ءبىر جاعىن ءوز قولىمىزبەن باسۋعا حاقىلى ەمەسپىز. ءبارىن نارىق سۇزگىسى رەتتەۋگە ءتيىس. بىراق «توقپاعى كۇشتى بولسا, كيىز قازىقتىڭ دا جەرگە كىرەرىن دە» ەستەن شىعارا المايمىز.