بىرنەشە كۇننەن بەرى ەلەك وزەنى مەن اقتوبە, قارعالى سۋ قويماسى بويىندا پاترۋلدىك پوليتسيا باتالونىنىڭ ات-كاۆالەريالىق بولىمشەسى كەزەكشىلىك اتقارىپ, رۇقسات ەتىلمەگەن جانە بەلگىلەنبەگەن ورىنداردا شومىلىپ جۇرگەندەرگە بىردەن ايىپپۇل سالىپ جاتىر.
سۋ ايدىندارىندا باقىلاۋدى كۇشەيتۋگە قالادا 19 شىلدە كۇنى كەشكىلىك ۋاقىتتا ءتورت ادامنىڭ سۋعا كەتۋى سەبەپ بولدى. اقتوبە قالاسى ورلەۋ اۋىلىنداعى 16 جانە 18 جاستاعى اعايىندى جىگىتتەر كەشكىلىك ەلەك وزەنىنە باتىپ كەتىپ, قۇتقارۋشىلار 1,8-2 مەتر تەرەڭدىكتەن ولاردىڭ دەنەسىن الىپ شىقتى. سول كۇنى قالا شەتىندەگى كوممۋنالدىق جاعاجايعا قاراما-قارسى بەتتە, رۇقسات ەتىلمەگەن ورىندا شومىلعان 19 جانە 20 جاستاعى ەكى قالا تۇرعىنى دا سۋعا كەتكەن. قۇتقارۋشىلار مارقۇمداردىڭ دەنەسىن جاعالاۋدان 40 مەتر جەردە, 5 مەتر تەرەڭدىكتەن تاپتى. 6 شىلدەدە العا اۋدانى تامدى ەلدى مەكەنىنىڭ جانىنداعى وزەنگە ەرەسەكتەرمەن بىرگە شومىلىپ جۇرگەن التى جاستاعى ءسابي باتىپ كەتتى. شىلدەنىڭ باسىندا ىرعىز اۋدانى اقشي ەلدى مەكەنىندە 4-5 جاستاعى ءۇش بالدىرعان ەرەسەكتەردىڭ باقىلاۋىنسىز اۋىلدان ەكى شاقىرىم جەردەگى وزەنگە كەلگەندە, اعىس ولاردى اعىزىپ الىپ كەتكەن. قايعىلى وقيعالارعا نەگىزىنەن وزەن بويىندا كەز كەلگەن جەرگە شومىلۋ نەمەسە ماس كۇيىندە سۋعا ءتۇسۋ, بالالاردىڭ ءوز بەتىمەن سۋ ايدىندارىنا كەلۋى سەبەپ بولعان. بيىل جاز باستالعالى ون ەكى ادام سۋعا كەتسە, ولاردىڭ التاۋى كامەلەت جاسىنا جەتپەگەن. رۇقسات ەتىلمەگەن جەرلەردە شومىلىپ, سۋعا كەتە جازداعان سەگىز ادام قۇتقارىلسا, ونىڭ ۇشەۋى – بالا.
اقتوبە وبلىسىندا سۋعا تۇسۋگە رۇقسات ەتىلگەن 72 ورىن بەكىتىلگەن. وبلىس ورتالىعىندا ءبىر اكۆاپارك, ءبىر كوممۋنالدىق جانە 16 جەكەمەنشىك جاعاجاي بار. تجد ماماندارى سۋ ايدىندارىنداعى قاۋىپسىزدىك ەرەجەلەرىن ساقتاپ, تەك رۇقسات ەتىلگەن ورىندارعا عانا سۋعا تۇسۋگە كەڭەس بەرگەنىمەن, وعان قۇلاق اسپايتىندار كوپ. ىستىق كۇندەردىڭ باستالۋىمەن جۇزدەگەن قالا تۇرعىندارى جۇمىس كۇندەرى جانە دەمالىس كۇندەرى سۋدان شىقپايدى. باسى اشىق ماسەلە – بەلگىلەنبەگەن جانە جابدىقتالماعان جەرلەردە سۋعا شومىلۋ, قاراپايىم ەرەجەلەردى ساقتاماۋ جازاتايىم وقيعالارعا سوقتىرىپ جاتىر. بالالار باقىلاۋسىز وزەن جاعالاپ كەتەدى. اقتوبە وبلىستىق تجد باس مامانى اسلان نۇرلان ۇلىنىڭ ايتۋىنشا, جاعاجايلاردىڭ تۇگەلگە جۋىعى جەكەمەنشىك ورىندار. ال شاعىن جانە ورتا كاسىپكەرلىك نىساندارىن تەكسەرۋگە ءۇش جىل ءموراتوريدىڭ جاريالانۋىنا بايلانىستى تجد قىزمەتكەرلەرى جەكەمەنشىك جاعاجايلارعا ەمىن-ەركىن كىرە المايدى, تەك ارىز-شاعىم تۇسكەندە عانا بارادى. توتەنشە جاعدايلار دەپارتامەنتىنىڭ ارنايى قۇتقارۋ جاساعى بار, ەلەك وزەنىندە ەكى, اقتوبە سۋ قويماسىندا ءبىر قۇتقارۋ بەكەتى ورنالاسقانىنا قاراماستان, ولار وزەندەر بويىن تۇگەل باقىلاي المايدى. الاڭداتارلىق ماسەلە – تجد قۇتقارۋ جاساعىندا ماماندار جەتىسپەيدى. «شتات بويىنشا 65 بىرلىك بولۋى كەرەك, بىراق بىزدە قۇتقارۋشىلار تاپشى», دەيدى اسلان نۇرلان ۇلى.
شومىلۋ ماۋسىمىندا ءاربىر جاعاجاي قىزمەتىنىڭ ءوز قۇتقارۋشىلارى بولادى. ەرەجە بويىنشا 75 مەترلىك جاعاجايدا ەكى قۇتقارۋشى كەزەكشىلىكتە تۇرسا, ولاردىڭ قولدارىندا مىندەتتى تۇردە قايىعى, قۇتقارۋ ارقانى مەن شەڭبەرى بولۋعا ءتيىس. تجد ماماندارى ءساۋىر-مامىر ايلارىندا سۋعا شومىلۋ ماۋسىمىندا قاۋىپسىزدىك ەرەجەلەرىن ساقتاۋعا بايلانىستى ينتەراكتيۆتى دارىستەر وتكىزدى جانە مەكتەپتەر باسشىلىعى اتا-انالار چاتتارىنا نۇسقاۋلىقتار جىبەرگەن ەدى. ويتكەنى كوپتەگەن بالا ءجۇزۋ بىلمەيدى, جازعى كانيكۋل كەزىندە بىرنەشە بالانىڭ توپتاسىپ, اتا-انا قاراۋىنسىز وزەنگە بارۋ وقيعالارى جىلما-جىل قايتالانىپ كەلەدى.
بىلتىر اقتوبە قالاسىندا 15 ادام سۋعا كەتىپ قايتىس بولدى. وكىنىشتىسى ونىڭ تورتەۋى – بالا. اقتوبە وبلىستىق پد جەرگىلىكتى پوليتسيا ءبولىمىنىڭ باستىعى اردانا سايماعامبەتوۆتىڭ ايتۋىنشا, پوليتسيا قىزمەتكەرلەرى توتەنشە جاعدايلار ماماندارىمەن بىرلەسە جازعى لاگەرلەردە دەمالىپ جاتقان بالالارعا ءتۇسىندىرۋ جۇمىستارىن جۇرگىزدى. قالاداعى, العا, مۇعالجار, حرومتاۋ, ويىل اۋدانىنداعى لاگەرلەرگە بارىپ, ءورت قاۋىپسىزدىگى مەن سۋعا تۇسۋدەگى ساقتىق شارالارىن ساقتاۋ جونىندە ماعلۇمات بەرىلدى. «لاگەرلەر جەكە بولسا دا, بالالاردىڭ قاۋىپسىزدىگى ءۇشىن ەش كەدەرگى بولماۋعا ءتيىس. ءبىز ءاربىر لاگەردەگى قىزمەتكەرلەردىڭ ءتىزىمىن الىپ, اسپاز, كۇزەتشى, تاربيەشىلەردىڭ قۇجاتتارىن تەكسەرىپ شىقتىق», دەيدى اردانا سايماعامبەتوۆ.
پوليتسيا قىزمەتكەرلەرى مەن توتەنشە جاعداي دەپارتامەنتى ماماندارىنىڭ بىرلەسكەن رەيدتىك جۇمىستارىنا قاراماستان, شومىلۋعا رۇقسات ەتىلمەگەن جەرلەردە ىشىمدىك ءىشىپ, سۋعا سۇڭگيتىندەر قاتارى ازايماي وتىر.
اقتوبە وبلىسى
