ورتالىق پاندەمياعا بايلانىستى 2020 جىلدان بەرى ساۋدا-ساتتىقتى توقتاتقان. ال جىل باسىنان بەرى كولىك ارقىلى تەك 1 مىڭ توننا عانا جۇك وتكەن. جالپى, «قورعاس» شىحو جۇمىسىن جانداندىرۋ باعىتىندا ينۆەستيتسيالىق جوبالاردى قولعا الۋ كوزدەلىپ وتىر. وعان قوسا, «قازپوشتا» اق اۋماعى 3 مىڭ شارشى مەترلىك حالىقارالىق پوشتا الماسۋ ورنىن سالماقشى. وندا كوممەرتسيالىق جۇكتى قابىلداۋ, سۇرىپتاۋ, ساقتاۋ, ءتيىستى ورىنعا دەيىن جەتكىزىپ بەرۋ ماسەلەسى تولىقتاي قاراستىرىلعان.
«قورعاس – شىعىس قاقپاسى» ارنايى ەكونوميكالىق ايماعىندا بىرەگەي قۇرعاق پورت پەن لوگيستيكا جانە وڭدەۋ ونەركاسىبى جۇمىس ىستەۋدە. نەگىزىنەن, قۇرعاق پورتتىڭ جىلدىق قۋاتتىلىعى جوعارى. كونتەينەر اينالىمىن 540 مىڭ دفە-گە دەيىن جەتكىزۋگە قاۋقارلى. ماسەلەن, وتكەن 6 ايدىڭ ىشىندە 4,2 ملرد تەڭگەدەن اسا تابىس تاپقان.
قازىر ارنايى ەكونوميكالىق ايماققا ينۆەستيتسيا سالۋعا نيەت بىلدىرگەندەر كوپ. جوبالاردىڭ جالپى قۇنى 500 ملرد تەڭگە بولاتىن 28 قاتىسۋشى تىركەلىپ, 18 جەر ۋچاسكەسىن الدى. اراسىندا كاسىبىن ىلگەرىلەتىپ جاتقاندار دا بار. سونىڭ ءبىرى – Elite baby production كومپانياسى.
جۋىردا عانا ىسكە قوسىلعان كاسىپورىن بالالارعا ارنالعان جورگەكتەر مەن گيگيەنالىق ونىمدەر شىعارا باستادى. ال «SSA Feed Mills» جشس جىلىنا 60 مىڭ تونناعا دەيىن قۇراماجەم دايىنداۋدا. جوباعا 4,7 ملرد تەڭگە قارجى جۇمساعان. بۇدان بولەك, ارنايى ەكونوميكالىق ايماقتا جۇزەگە اساتىن تىڭ جوبالار دا تانىستىرىلدى.
باسشىلىقتىڭ ايتۋىنشا, بولاشاقتا حالىقارالىق وندىرىستىك قالا سالۋ جوسپاردا بار. وندا 5 مىڭ ادام جۇمىس ىستەيتىن بولادى. سونىمەن قاتار 17 ملرد تەڭگەگە اتلانتيكالىق اقسەركە وسىرەتىن زاۋىت اشۋ كوزدەلىپ وتىر. ناقتىراق ايتقاندا, ايماقتىڭ ەكونوميكالىق الەۋەتى زور. ءتىپتى جۇك جانە جولاۋشى تاسىمالىنا ارنالعان اۋەجاي دا قاراستىرىلعان. بۇل رەتتە, اكىمدىك جەر ماسەلەسىن شەشىپ بەرۋگە ىقپال ەتپەك.
تەمىر جول ارقىلى جۇك تاسىمالىن «التىنكول» ستانساسى دا قامتاماسىز ەتۋدە. جىل باسىنان بەرى قىتايدان 1 200-گە جۋىق جۇك جانە جولاۋشىلار پويىزى كەلىپ, كورشى ەلگە وسىنشا كولەمدە پويىز وتكەن. تاۋلىگىنە ورتاشا ەسەپپەن مۇندا 900-دەي كونتەينەر قابىلدانادى. ستانساداعى جۇكتەر قىتايدان ەۋروپاعا, پارسى شىعاناعى ەلدەرىنە جانە ورتالىق ازياعا جونەلتىلۋدە.
«نۇر جولى» اۆتوموبيل وتكىزۋ پۋنكتىندە پرەزيدەنت تاپسىرماسىنا سايكەس, كولىكتەردى ەلەكتروندى كەزەككە قويۋ جۇيەسى قولعا الىنعان. سونىڭ ناتيجەسىندە كۇنىنە بەكەت ارقىلى وتەتىن اۆتوكولىك سانى 90-عا دەيىن ءوستى. ەڭ باستىسى, وسى ءادىس ارقىلى سالاداعى بارلىق الىپساتارلىق سحەما تولىعىمەن جويىلدى.
جەتىسۋ وبلىسى
