«زەردە» حولدينگى وبەكتيۆتى جانە سۋبەكتيۆتى سەبەپتەرگە بايلانىستى اقپاراتتىق كوممۋنيكاتسيالىق تەحنولوگيالار سالاسىن دامىتۋدىڭ تولىققاندى ينستيتۋتى رەتىندە قالىپتاسا المادى. بۇگىندە «زەردە» حولدينگى دەربەس تابىس اكەلمەيدى جانە ءوز كەزەگىندە مەملەكەتتەن ەلەكتروندىق ۇكىمەتتىڭ اقپاراتتىق-كوممۋنيكاتسيالىق ينفراقۇرىلىمى وپەراتورىنىڭ فۋنكتسيالارىن جۇزەگە اسىرۋعا تاپسىرىستار الاتىن «ۇلتتىق اقپاراتتىق تەحنولوگيالار» اق-نىڭ ديۆيدەندتەرى ەسەبىنەن قارجىلاندىرىلادى», دەپ جازىلعان مينيسترلىكتىڭ ءباسپاسوز قىزمەتى تاراتقان مالىمەتتە.
ياعني, حولدينگ بۇعان دەيىن شىعىنمەن جۇمىس ىستەپ كەلگەن. ۆەدومستۆو وسى ۋاقىتقا دەيىن IT-قاۋىمداستىق تاراپىنان حولدينگ قىزمەتىنە بايلانىستى ايتىلعان سىنداردى ورىندى دەگەن ۇستانىمدا.
«حولدينگ قىزمەتى, بيۋدجەتتەن بولىنەتىن قاراجات كولەمى جانە «ۇات» اق-نىڭ قارجىلىق جاعدايى, باسقارۋشى حولدينگ پەن ەنشىلەس ۇيىمداردىڭ جۇمىسىنا كەتەتىن قاراجات كولەمى IT-قوعامداستىق پەن باقىلاۋ ورگاندارىنىڭ ءادىل سىنىنا ءتۇستى. 2021 جىلى «زەردە» حولدينگى تابىسىنىڭ ۇلعايۋىنا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ەلەكتروندىق ۇكىمەتتى زەرتتەۋگە بەرگەن تاپسىرىس اسەر ەتتى. بۇل «زەردە» حولدينگىنە وڭ تابىس اكەلۋگە مۇمكىندىك بەردى, بىراق جىلدىڭ قورىتىندىسى بويىنشا حولدينگ قىزمەتى قايتادان شىعىنعا اكەپ سوقتى. 2016-2021 جىلدار كەزەڭىندە حولدينگتىڭ جيناقتالعان شىعىنى 7 ملرد تەڭگە بولدى», دەلىنگەن مينيسترلىك دەرەگىندە.
ەسكە سالا كەتەيىك, بۇعان دەيىن تسيفرلىق دامۋ ءمينيسترى باعدات مۋسين «زەردە» حولدينگىن تاراتۋدى ۇسىنعان ەدى.
