سقو بويىنشا ەكولوگيا دەپارتامەنتىنىڭ مالىمەتىنشە, وقيعاعا بايلانىستى بۇگىن, 20 شىلدە كۇنى جامبىل اۋدانىنداعى ايتۋار اۋىلىنىڭ ماڭىنداعى سولەنوە كولىنە دەپارتامەنت وكىلدەرى, ەسىل وبلىسارالىق باسسەيندىك ينسپەكتسياسى, سقو اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى, جامبىل اۋدانىنىڭ ۆەتەريناريالىق قىزمەتى, بالىق شارۋاشىلىعىنىڭ عىلىمي-وندىرىستىك ورتالىعىنىڭ قىزمەتكەرلەرى باردى. جۇمىس توبى سۋ قويماسىنىڭ جاعالاۋىن تەكسەردى. كوزبەن شولۋ بارىسىندا 400 كگ مولشەرىندە پەلياد, تۇقى, موڭكە بالىعى ولگەنى انىقتالدى.
زەرتحانالىق تالداۋ جۇرگىزۋ ءۇشىن سۋ سىنامالارى مەن ولگەن بالىق الىندى. كولدى «ۆودولەي-2017» جشس جالعا الىپ, بالىق شارۋاشىلىعىمەن اينالىسىپ جاتىر. سەرىكتەستىك جۇمىسشىلارى سۋ ايدىنىن ولگەن بالىقتان تازارتىپ, ولەكسەنى جويدى. ازىرگە بالىقتىڭ نەدەن قىرىلعانى بەلگىسىز.
