«قازمۇنايگاز» ۇق اق باسقارما توراعاسى ماعزۇم مىرزاعاليەۆتىڭ مالىمەتىنشە, قازاقستاننىڭ نارىعىندا پوليپروپيلەن كوپ قولدانىلمايدى. قازىرگى قاجەتتىلىك شامامەن 45-50 توننانىڭ شاماسىن قۇرايدى. سول سەبەپتەن جاڭا ءونىمنىڭ باسىم بولىگى شەتەلگە ەكسپورتتالادى.
– بۇل مۇنايلى وڭىردەگى ەڭ ءىرى زاۋىتتىڭ ءبىرى بولماق. زاۋىت اشىلعاننان كەيىن 500-دەن اسا جاڭا جۇمىس ورنى قۇرىلادى. جىلىنا 500 مىڭ توننا پوليپروپيلەن شىعارىلادى, – دەيدى م.مىرزاعاليەۆ.
KPI جشس باسقارما توراعاسىنىڭ ءبىرىنشى ورىنباسارى دامير ءاشىموۆتىڭ دەرەگىنە سۇيەنسەك, بۇل – قۇرىلىسى ەرەكشە زاۋىت. ونىڭ قۇرىلىسىن 2008 جىلى قۇرىلعان KPI جشس جۇرگىزگەن. قۇرىلىس جۇمىستارىنا الەمنىڭ 15 ەلىنەن ەڭ بىلىكتى 100-دەن اسا ينجەنەر-مامان تارتىلعان. ويتكەنى اتالعان جوبا قۋاتى مەن تەحنولوگيالىق جابدىقتالۋى جونىنەن الەمدەگى جەتەكشى ون زاۋىتتىڭ قاتارىنا ەنىپ وتىر. مۇنى تاۋەلسىز قازاقستاندا مۇناي-گاز حيمياسى سالاسىندا قولعا الىنعان العاشقى زاۋىت دەۋگە بولادى. زاۋىت اۋماعى 3,5 مىڭ گەكتاردى الىپ جاتقان ارنايى «ۇلتتىق يندۋستريالدى مۇنايحيميالىق تەحنوپارك» ارنايى ەكونوميكالىق ايماعىندا بوي كوتەردى.
– ماقسات – ەلىمىزدە مۇناي حيمياسى كلاستەرىن قالىپتاستىرىپ, قوسىمشا قۇنى جوعارى, ەكسپورتقا باعىتتالعان ونىمدەر شىعارۋ. وسى ارقىلى ونەركاسىپ سالاسىن ارتاراپتاندىرۋعا ارنالعان پوليمەر ءوندىرىسىن جولعا قويۋ كوزدەلىپ وتىر. زاۋىتتا «تەڭىز» كەن ورنىنان جەتكىزىلەتىن پروپاننان پوليپروپيلەن وندىرىلەدى. بۇل – پلاستيكالىق جىپتەر, قۇبىرلار, پلەنكالار, سومكەلەر, مەديتسينا جانە وزگە سالالارداعى ونىمدەردى شىعارۋعا قاجەتتى نەگىزگى شيكىزات كوزى, – دەيدى د. ءاشىموۆ.
ونىڭ مالىمەتىنە قاراعاندا, جاقىندا اتالعان زاۋىتتىڭ تەحنولوگيالىق قوندىرعىلارىنا پروپان بەرۋ باستالدى. ەندى كومپانيا ىسكە قوسۋ-رەتتەۋ جۇمىستارىنىڭ ەكىنشى كەزەڭى – پروپاندى دەگيدرلەۋ رەاكتورلارىنا كاتاليزاتوردى جۇكتەۋگە كىرىسەدى.
زاۋىتتىڭ تەحنولوگياسى اقش, گەرمانيا, فرانتسيا, رەسەي, قىتاي, جاپونيا, كورەيا ەلدەرىنەن جەتكىزىلدى. جوبا قۇرىلىسىن جۇرگىزۋگە Siemens, MAN, SGS, Air Liquide, Mitsubishi سەكىلدى الەمدەگى كوشباسشى كومپانيالاردىڭ ماماندارى قاتىستى. قوندىرعىلار مەن جابدىقتاردى دايىنداۋشى زاۋىتتاردىڭ باس ينجەنەرلەرى جوعارى تەحنولوگيالىق جابدىقتاردى ىسكە قوسۋ, وپەراتورلاردى جاڭا جابدىقتارمەن جۇمىس ىستەۋگە وقىتۋ ءۇشىن اتىراۋعا ارنايى كەلدى. جوباعا جۇمىسقا تارتىلعان جەرگىلىكتى ماماندار شەتەلدەردە بىلىكتىلىگىن ارتتىرۋ كۋرستارىنان وتكەن.
جاڭا زاۋىت اتىراۋ قالاسىنان سولتۇستىك-شىعىسقا قاراي 33, قاراباتان تەمىر جول بەكەتىنەن سولتۇستىككە قاراي 9 شاقىرىم قاشىقتا ورنالاسقان. ۋچاسكە قولدانىستاعى تەمىر جولعا (9,2 شاقىرىم), اۆتوموبيل جولىنا (6,3 شاقىرىم), سۋ قۇبىرى مەن ەلەكتر جەلىسىنە, تاسىمالداۋعا ارنالعان وزگە دە ينفراقۇرىلىمدارعا جاقىن ورنالاسقان. قۇرىلىس الاڭىن تاڭداۋ مەن ۋچاسكەلەردى جوسپارلاۋ كەزىندە حالىقارالىق ستاندارتتار, ينجەنەرلىك-تەحنيكالىق تاجىريبەگە سايكەس بارلىق قاۋىپسىز قاشىقتىق ەسكەرىلگەن.
اتىراۋ وبلىسى
