1979 جىلى ءال-فارابي اتىنداعى قازاق ۇلتتىق ۋنيۆەرسيتەتىن ءبىتىرىپ, ماسكەۋدەن 125 شاقىرىم جەردەگى «بىرىككەن يادرولىق فيزيكا ينستيتۋتىنا» سىرتتاي اسپيرانتۋراعا تۇسەدى. شاكىرت بويىنداعى قۇلشىنىستى, عىلىمعا دەگەن قىزىعۋشىلىقتى بايقاعان ۇستازدارى ونى عىلىممەن اينالىسۋعا باۋليدى. ۇستازدارىنىڭ ەڭبەگى زايا كەتپەي, 1988 جىلى بىرىككەن يادرولىق زەرتتەۋلەر ينستيتۋتىنىڭ پروفەسسورى ۆ.گ.ماحانكوۆتىڭ جەتەكشىلىگىمەن پ.لۋمۋمبا اتىنداعى حالىقتار دوستىعى ۋنيۆەرسيتەتىندە «تەوريالىق جانە ماتەماتيكالىق فيزيكا» ماماندىعى بويىنشا كانديداتتىق ديسسەرتاتسيا قورعايدى. ارينە, قازىر ايتا سالۋ وڭاي بولعانىمەن, ول كەزدە رەسەيلىك عالىمداردىڭ الدىندا عىلىمي تۇجىرىمىڭدى دالەلدەۋ تاباندىلىقتى, قايسارلىقتى تالاپ ەتكەنى انىق.
عىلىم مەن ءبىلىم سالاسىنا 40 جىلدان استام ۋاقىتىن سارپ ەتكەن ءراتباي مىرزاقۇلوۆتىڭ ەسىمى وتاندىق عىلىم كوشباسشىلارىنىڭ ءبىرى رەتىندە اتالادى. بۇل جەتىستىككە جەتۋ جولىندا 2002 جىلى ءال-فارابي اتىنداعى قازاق ۇلتتىق ۋنيۆەرسيتەتىندە «تەوريالىق فيزيكا» ماماندىعى بويىنشا دوكتورلىق ديسسەرتاتسياسىن قورعادى. الىس-جاقىن شەتەلدىك جوو-لاردا وقىتۋشىلىق قىزمەت ەتتى. اتاپ ايتساق, اقش-تىڭ كاليفورنيا ۋنيۆەرسيتەتى, جاپونيا, ءۇندىستان, باتىس ەۋروپا, رەسەيدىڭ جەتەكشى عىلىمي ورتالىقتارى مەن ۋنيۆەرسيتەتتەرىندە جيناقتاعان تاجىريبەسى مەن جۇمىس ىستەگەن جىلدارى عالىم ءومىرىنىڭ جارقىن بەلەستەرى دەسەك, قاتەلەسپەيمىز.
ر.مىرزاقۇلوۆ 2006 جىلدان باستاپ ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «جالپى جانە تەوريالىق فيزيكا» كافەدراسىنىڭ مەڭگەرۋشىسى, 6D060400-فيزيكا ماماندىعى بويىنشا PhD ديسسەرتاتسيا قورعاۋ جونىندەگى ديسسەرتاتسيالىق كەڭەستىڭ توراعاسى, «تەوريالىق فيزيكا ەۋرازيا حالىقارالىق ورتالىعى» عىلىمي-زەرتتەۋ ينستيتۋتىنىڭ نەگىزىن قالاۋشى جانە ديرەكتورى قىزمەتىن اتقارىپ كەلەدى. عالىم 2010 جىلى جاراتىلىستانۋ عىلىمدارى سالاسىنداعى ۇزدىك عىلىمي زەرتتەۋلەرى ءۇشىن ق.ساتباەۆ اتىنداعى سىيلىقتىڭ يەگەرى اتاندى, تىنىمسىز ىزدەنىسى مەن تالاپشىلدىعىنىڭ ناتيجەسىندە مەملەكەتتىك عىلىمي ستيپەنديانىڭ 6 دۇركىن يەگەرى بولدى. سونداي-اق ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىقتىڭ لاۋرەاتى اتاندى.
بي-فاتيما ەرالحانقىزى,
ل.ن.گۋميلەۆ اتىنداعى ەۇۋ ستۋدەنتى
نۇر-سۇلتان
