ماماندار كەڭەس جۇرگىزىپ, دياگنوستيكا, ەم-شارا جاساپ, العاشقى مەديتسينالىق كومەك كورسەتۋمەن شۇعىلدانۋدا. كەڭەستىك-دياگنوستيكالىق پويىزدىڭ ماماندارى مۇمكىندىگىنشە كوپ پاتسيەنت قابىلداپ, تەكسەرىپ, ەم تاعايىنداپ, قاجەت بولسا اۋداندىق, وبلىستىق اۋرۋحانالارعا جىبەرۋگە تىرىسۋدا.
پويىزداعى كەڭەسشى-دارىگەرلەردىڭ ايتۋىنشا, ەمدەلۋشىلەردىڭ كوبى تەراپەۆت دارىگەرگە جۇگىنگەن. بالالار دارىگەرىنە كەزەككە تۇرۋشى كوپ. وفتالمولوگ پەن حيرۋرگكە تەكسەرىلۋشىلەر سانى ارتقان. پويىزدا ەكگ, ۋدز جانە فليۋوروگرافيا اپپاراتتارى بار.
مامانداندىرىلعان مەديتسينالىق پويىزدا كىشىگىرىم حيرۋرگيالىق وپەراتسيالار دا جاسالۋدا. پويىزداعى جوعارى ساناتتى وفتالمولوگ دارىگەر ساكەن كاكپەنوۆ: «مەن مۇنداي ساپارعا ءبىرىنشى رەت شىعۋىم ەمەس. ءۇش جىل بۇرىن «جاردەم» مەديتسينالىق پويىزىمەن ەلدى ارالاپ, قىزمەت كورسەتكەنمىن. ول كەزدە وڭتۇستىك وڭىرلەردە بولعانبىز. شالعاي اۋىلدارداعى كورۋ قابىلەتى ناشارلاعان بىرنەشە ادامعا كومەكتەسىپ, ريزاشىلىعىن ەستىپ, ۇمىتىلماس ساتتەردى باستان وتكەردىم. ءبىز گلاۋكوما جانە كاتاراكتا سياقتى اۋرۋلاردى ەرتە انىقتاپ, حيرۋرگيالىق جولمەن ەمدەۋ ارقىلى كورۋ قابىلەتىن جاقسارتۋدىڭ ماڭىزدىلىعىن تۇسىندىك. مەديتسينالىق پويىزدىڭ جۇمىس تاجىريبەسى ۇنايدى. ەل اراسىندا قانداي سىرقاتتار بارىن باعامدايمىز. ولارعا قانداي كومەك كورسەتۋ كەرەگىن سارالايمىز. سىرقاتتاردىڭ ورىن الۋ سەبەپتەرىن انىقتايمىز. سول ارقىلى الدىن الۋ شارالارىن جاسايمىز», دەدى.
جەتىسۋ ءوڭىرىن ارالاپ جۇرگەن پويىز بۇگىنگە دەيىن 1 007 ادامعا قىزمەت كورسەتكەن. كوبىنە دارىگەرلىك ناقتاما قويىلىپ, ەم-شارا جاسالىپ, ءدارى-دارمەك تاعايىندالدى. ءبىرازى جەرگىلىكتى اۋرۋحانالارعا جاتقىزىلدى. «سالاماتتى قازاقستان» مەديتسينالىق پويىزى جەتىسۋ وبلىسىنان كەيىن شىعىس قازاقستان, اباي, پاۆلودار, اقمولا, سولتۇستىك قازاقستان, قوستاناي وبلىستارىنا جول تارتپاق.
جەتىسۋ وبلىسى
