ءبىلىم سايىسىنداعى جاعىمدى جاڭالىق ماتەماتيكادان IMO-2022 حالىقارالىق وليمپياداسىنىڭ ناتيجەسىنە قاتىستى بولدى. ۇلتتىق قۇراما 174 ۇپاي جينادى, بۇل – ەلىمىزدىڭ وسى وليمپياداعا قاتىسۋ تاريحىنداعى رەكوردتىق كورسەتكىشى. IMO – الەمدەگى ەڭ بەدەلدى پاندىك وليمپيادالاردىڭ ءبىرى. وقۋ-اعارتۋ ءمينيسترى اسحات ايماعامبەتوۆ وليمپيادالاردا جۇلدە العان وقۋشىلار مەن ولاردىڭ پەداگوگ-تالىمگەرلەرىنە تولەمدەر بەلگىلەنەتىنىن جەتكىزدى.
«پرەزيدەنتتىڭ تاپسىرماسى بويىنشا ءدال وسىنداي وليمپيادالاردا جۇلدە العان وقۋشىلار مەن ولاردىڭ پەداگوگ-تالىمگەرلەرىنە تولەمدەر بەلگىلەپ, وقۋشىلارعا ۇبت-نى تاپسىرماي-اق وتاندىق جوو-عا تۇسۋگە بولاتىنداي جاعداي جاساعانىمىزدى اتاپ وتكىم كەلەدى. ماتەماتيكادان وليمپياداعا قاتىسقان 6 وقۋشىنىڭ بارلىعى دا جۇلدەلى ورىندارعا يە بولدى. ولار 3 كۇمىس, 3 قولا مەدال جەڭىپ الدى. كۇمىس مەدال يەگەرلەرى – تاير ساتۋبالدين, فەتۋللاح سام, ميرون يۋركەۆيچ, قولا مەدال العاندار – ادىلەت زاۋىتحان, ادىلەت ءابۋ, يۋري تەن. زياتكەرلىك سايىسقا 104 ەلدەن بارلىعى 589 وقۋشى قاتىستى, سونىڭ ىشىندە قىتاي, اقش, وڭتۇستىك كورەيا, جاپونيا, ۇلىبريتانيا, يتاليا, كانادا جانە ت.ب. ەلدەر بار. وقۋشىلارىمىز الەمدىك ەسەپتە 17-ورىنعا تۇراقتادى», دەپ مالىمدەگەن ۆەدومستۆو باسشىسى جۇلدەگەرلەردى جەڭىسىمەن قۇتتىقتادى.
وسى جارىستان سوڭ ارتىنشا ۇلتتىق قۇرامانىڭ قورجىنى تاعى دا مەدالدارمەن تولىقتى. وزات وقۋشىلارىمىز فيزيكادان حالىقارالىق وليمپيادادا (IPhO) 1 التىن جانە 4 كۇمىس مەدال جەڭىپ الدى. ەلىمىزدىڭ نامىسىن قورعاعان 5 وقۋشى 75 ەلدەن كەلگەن 368 جاسوسپىرىممەن سىنعا ءتۇستى. وتكەن جىلى قازاقستاندىق كوماندا 5 كۇمىسكە يە بولعان ەدى. بيىل ناتيجە الدەقايدا جاقساردى. ۇلتتىق قۇراما قورجىنىنا التىندى دانيل شاتوحين جانە كۇمىس مەدالدى ەرسۇلتان پىتەباي, ۆلاديمير ليم, دىنمۇحاممەد راحىمجانوۆ, ريزابەك الپامىس اكەلدى.
