تيك-توك پەن ينستاگرام جەلىسىنەن كوز ايىرمايتىن بىلايعى جۇرتتىڭ بۇل اۋەندى ەستىمەۋى مۇمكىن ەمەس. ەگەر مۇنىڭىز جالعان دەسەڭىز, «يۋ-تۋب» جەلىسىنە Sway دەپ جازىڭىز. «ە, وسى ما؟» دەپ انگە ىلەسىپ اۋدەم جەرگە دەيىن تەربەلىپ باراسىز. ۇيلەسىمدى ۇنىمەن ءۇيىرىپ اكەتەتىن شىرايلى شىعارما 50-ءىنشى جىلداردىڭ باسىندا جارىققا شىققان. ودان بەرى دۇنيە نەشە رەت قۇبىلدى, سان مارتە ساۋىسقان سايرادى, بۋلىعىپ بۇلبۇل بۇلاق كەزدى, بىراق سول مۋزىكانىڭ داۋىسى ءالى دە جاڭعىرىپ تۇر. و, عانيبەت! ومىرشەڭ ولەڭ جازساڭىز اجالدىڭ دا قولى قىسقا ەكەن-اۋ... ءبىزدىڭ ءشامشى, نۇرعيسا, ەسكەندىر جازعان سۇلۋ اۋەندەر حالىقتىڭ قۇلاعىندا ماڭگىگە بوزتورعايداي شىرىلداپ جاتپاق. بۇل ۋاقىتتىڭ دارمەنسىزدىگى ەمەس, دانەكەرلىگى. عاسىردان دا ۇزاق عۇمىر…
شىن مانىندە, اتالعان ءاننىڭ نەگىزگى اتاۋى Quien sera, ياكي «كىم ەكەن؟». اتى-ءجونى جالپاق جۇرتقا بەيتانىس پابلو بەلتران رۋيس ەسىمدى مەكسيكالىق كومپوزيتور جازعان. بۇل ونىڭ ونەردەگى ىرىمالدى قادامى ەدى. ايتسە دە باستاۋىنا ساتتىلىك سەرىك بولعانداي. 1953 جىلى ءاننىڭ يسپان تىلىندەگى نۇسقاسى تىڭدارماندى ەلەڭ ەتكىزدى. ارتىنان اعىلشىن تىلىنە اۋدارىپ, اككى ونەرپاز دين مارتين دۇنيەنى ءدۇر سىلكىندىردى.
دين – الدەبىر سەبەپتەرمەن امەريكاعا قونىس اۋدارعان يتاليالىقتاردىڭ ۇرپاعى. ساياسي تۇرعىدان جەرگىلىكتى جۇرت ونى ەكىنشى ساناتتاعى اق ناسىلدىلەرگە جاتقىزادى. ول ازداي, كەۋدەسىنەن يتەرىپ, كوپشىلىك ورتادا كەمسىتە سويلەيدى. سوندىقتان ول الىپ يمپەرياعا ءسىڭىسىپ, ءوز ورىنىن تابۋ ءۇشىن نەگە دە بولسا دايىن تۇردى. دينو پول كروچەتتي ء(ديننىڭ شىن اتى) 1930-1940 جىلدار ارالىعىندا نە ىستەمەدى دەرسىز؟! زاڭسىز الكوگولدى سۋسىن ساتتى, رينگكە شىعىپ توبەلەستى دە, ەڭ اقىرى كازينودا كرۋپەر بولدى... بۇل باسبۇزار ارەكەت ونىڭ انشىلىك تالانتتىڭ تانىتىپ, Rat Pack دەپ اتالاتىن كومپانيانىڭ مۇشەسى بولعانعا دەيىن جالعاستى. بۇل بەيۋاق كوڭىل كوتەرۋشىلەر مەن گەدونيستەر قوعامىن فرەنك سيناترا مەن سەم دەۆيس باسقاردى. ەكەۋى دە ونەرگە جاقىن جاندار ەدى. سودان دا بولار ءديننىڭ تالابىن شىڭداپ, ونەرىن ورىستەتەدى.
شوۋ-بيزنەس الەمىندە دين كوپ فۋنكتسيالى ادام بولدى. تەك ءانشى عانا ەمەس, تابىستى ازىلكەش ءارى ءتاپ-ءتاۋىر اكتەر رەتىندە تانىلدى. بۇل ونىڭ كانونعا اينالعان «تەربەل» ءانىنىڭ اعىلشىن تىلىندەگى نۇسقاسىن ورىنداۋعا جول اشتى. ول وزىنە ءتان قالىپتا تسينيزم مەن ماحاببات تۋرالى ءان ايتقان كەزدە بيكەشتەردى ازعىرۋعا ەمەس, جاي عانا سەرىگى بولۋعا تىرىساتىنىن جەتكىزدى. سىرتقى سىمباتى مەن سەرىلىگى تالاي سۇلۋدى ەستاڭدى ەتكەنى ەلگە بەلگىلى اڭگىمە-تۇعىن. ونسىز دين دين بولا ما!؟.
شىعارمانى اعىلشىن تىلىنە تارجىمالاعان اقىن نورمان گيمبەل ءماتىندى وزگەرتىپ, ءوز نۇسقاسىندا جازىپ شىققان ەكەن. تۇپنۇسقاعا مۇلدە ۇقسامايدى. قالامگەر تانىمال كينوكارتينالاردىڭ ساۋندترەگىنە تالاي ءسوز جازعان, ءتىپتى سول ءۇشىن ەكىنىڭ-بىرىنە بۇيىرا بەرمەيتىن وسكار جۇلدەسىن دە يەلەنگەن. عانيبەتى سول, كۇللى الەم ءاندى نورماننىڭ نۇسقاسىندا قابىلدادى. 1954 جىلى دين ءمارتيننىڭ ورىنداۋىندا اقش حيت-پارادىندا 15-ءشى, ۇلىبريتانيادا 6-شى ورىنعا دەيىن كوتەرىلدى. مۇنىڭ ءوزى ۇلكەن جەتىستىك.
ەلۆيس پرەسلي ءديندى دورەكىلەۋ دجازدىڭ پاتشاسى دەپ ەسەپتەپ, ءستيلىن مۇزعا تەڭەدى. Newsweek جۋرنالى «مەنمەندىك ونىڭ شىعارماشىلىق بولمىسىنا ودان ءارى ءدام قوستى» دەپ جازادى. ونىڭ جۇزىندەگى جۇمباق مىسقىل, كوركەم كەكەسىن, العاۋسىز اجۋا ارۋلاردى الىستان-اق ارباپ الدى. ونىڭ كيىم كيىسى دە, ءجۇرىس-تۇرىسى دا قۇپياعا تولى, ءتىپتى وزىمشىلدىگى ءۇشىن ەشقانداي جاۋاپكەرشىلىك ارقالامايتىنى دا تالعامىنا شەك كەلتىرتپەيدى. جاسىرىن جاراتىلىسى جانكۇيەرلەرىنىڭ ءىشىن پىستىرمايتىن ەدى.
ايتپاقشى, بەلگىلى رەجيسسەر الەكساندر زاتسەپيننىڭ «الماس قول» كينوكارتيناسىندا «قۇشتارلىق جانارتاۋى» مۋزىكاسىنىڭ جىزىلۋىنا «تەربەل» ءانى تۇزدىق بولعان. بۇل اۋەن تۇڭعىش رەت كەڭەس وكىمەتىنىڭ ەكرانىنا اشىق بيلەگەن ارۋدىڭ جاعىمسىز ارەكەتىن اكەلدى. ال ءانشىنىڭ ءوزى:
«يتاليالىقتار وتە تالانتتى كەلەدى. قازىرگى انشىلەردىڭ ءومىربايانىن الساڭىز, ولاردىڭ 90 پايىزى يتاليان ءزاۋزاتى. مۇنىڭ ءبارى ولاردىڭ كومەيىمەن ەمەس, جۇرەگىمەن ءان ايتاتىندىعىنان» دەپ, كەربەزدەنە سويلەيدى. بۇل دا ءديننىڭ تاكاپپارلىعىنان تۋعان پىكىر ەمەس, ساحناداعى كەيىپ-كەسكىنىنە ءتان تىركەس. شلياپاسىن قايىرىپ الىپ قىجىرتا سويلەگەندە ونىڭ الدىنان تەرىس اينالىپ كەتە المايسىز. قايتا قيعاش قالىبى وزىنە قۇيىپ-قويعانداي جاراسادى. وركوكىرەك ونەرپازدىڭ ءزىلسىز ءازىلى مەن ادەمى ءانى ءالى تالاي شىرقالاتىنىنا كۇمان جوق.
