وقيعا 13 شىلدە كۇنى, پريرەچەنسك اۋىلىنداعى وزەن جاعاسىندا ورىن العان.
«قارماعىما بالىق ىلىنبەگەندىكتەن, جينالىپ ۇيگە قايتقالى جاتقانمىن. سول ساتتە جاعادان ون مەتردەي جەردە سۋدا ەكى بالانى كوردىم. مەن ولارعا ءۇن قاتىپ, قول بۇلعادىم, جاۋاپ بەرمەدى. ەكىنشى رەت ايقايلاسام دا ءۇنسىز. سول كەزدە بالالاردىڭ سۋ جۇتىپ قويعانىن ءتۇسىندىم. سۋعا سۇڭگىپ, بالالارعا قاراي ءجۇزدىم. ءجۇزىپ بارا جاتىپ ءۇشىنشى بالانى كوردىم. الدىمەن بىرەۋىن, سوسىن ەكىنشىسىن جاعاعا شىعاردىم. وسى كەزدە كوزىمنىڭ قيىعىمەن ءۇشىنشىسىن كورىپ تۇردىم. ول سۋدىڭ استىنا كەتتى. مەن ونىڭ سوڭىنان سۇڭگىپ كەتتىم. سول ساتتە بالا سۋدىڭ تۇبىنە باتىپ كەتكەن ەكەن. ونى جاعاعا شىعارىپ, مەديتسينالىق العاشقى كومەك كورسەتە باستادىم», دەپ باياندايدى اندرەي.
بۇگىنگى كۇن باتىرىنىڭ ايتۋىنشا, ءبىرىنشى قۇتقارىلعان ەكى بالا تەز ەسىن جيىپ, وزىنە كەلگەن. ال ءۇشىنشى ءجاسوسپىرىم مۇلدەم تىنىستاماعان.
«مەن ءار سەكۋندتىڭ ماڭىزدى ەكەنىن ءتۇسىندىم, سوندىقتان بالالاردى قۇتقارۋ ءۇشىن قولىمنان كەلگەننىڭ ءبارىن جاسادىم. سوڭعىسىنا جاساندى تىنىس جاساپ, جۇرەك تۇسىن ۋقالادىم. ءبىر بۇيىرىنە اۋدارىپ, ارقاسىنان قاعا باستادىم. سول كەزدە بالانىڭ وكپەسىندەگى سۋ شىعىپ, دەم الا باستادى. مەن سول ساتتە عانا وزىمدەگى ۇلكەن جەڭىلدىكتى سەزىندىم! ەكى قولىم قوبالجىعاننان دىرىلدەپ كەتتى», دەدى ەر ازامات.
ايتا كەتەيىك, كوپ ۇزاماي جەدەل جاردەم قىزمەتكەرلەرى كەلىپ, بالالاردى اۋرۋحاناعا جەتكىزگەن. قازىر ولاردىڭ دەنساۋلىعىنا قاۋىپ ءتونىپ تۇرعان جوق. دارىگەرلەر اۋىل تۇرعىنىنىڭ دەر كەزىندە جانە ساۋاتتى ارەكەتىنىڭ ارقاسىندا عانا بالالار امان قالعانىن ايتتى. بەلگىلى بولعانداي, قۇتقارىلعان ۇل بالالار ءبىر ءۇيدىڭ پەرزەنتى. ەكەۋى جەتى جاسار ەگىزدەر, ال ۇلكەن اعاسى توعىز جاستا.
اتا-اناسىنىڭ ايتۋىنشا, اعايىندىلار ەشقاشان ۇلكەندەرسىز وزەنگە بارماعان. ولار بۇل جولى وزدەرىنەن جاسى ۇلكەندەۋ دوستارىمەن بارعانىن ايتىپتى. جۇگىرىپ كەلە جاتقان اعايىندىلاردىڭ ءبىرى سۋعا قۇلاپ قالادى. ونى اعىس الىپ كەتە باستاعان كەزدە, ەگىزدەر وعان كومەكتەسۋ ءۇشىن سۋعا تۇسكەن ەكەن.
