زەينەتكەردىڭ ءىز-ءتۇسسىز جوعالعانى تۋرالى تۋىستارى 12 شىلدە كۇنى كەشكە ايىرتاۋ اۋدانىنىڭ پوليتسيا بولىمىنە حابارلاعان. جاسىنا بايلانىستى اجەي كەي-كەزدە ەسىن جوعالتىپ جۇرگەن. ىزدەۋ ءىس-شارالارىنا پوليتسەيلەردەن بولەك, توتەنشە جاعدايلار قىزمەتىنىڭ اۋداندىق ءبولىمىنىڭ قىزمەتكەرلەرى, ورمانشىلار, اكىمدىكتىڭ ەرىكتىلەرى جانە جەرگىلىكتى تۇرعىندار – قىزمەتتىك جانە جەكە كولىكتەرىمەن جالپى 70-تەن استام ادام شىققان. ولار اۋىلدى, جاقىن ماڭداعى ورمانداردى تەكسەرگەن. ىزدەۋ جۇمىسى تۇندە دە جۇرگىزىلدى. كەلەسى كۇنى تۇسكە قاراي ىزدەۋدەگى ءبىر توپ جوعالعاندى تاۋىپ الدى. اپتاپ ىستىقتان السىرەگەن اجەي جەردە جاتقان, ول شامامەن اۋىلدان 4 كم قاشىقتىقتا انىقتالدى. بىرنەشە جۇتىم سۋدان ەسىن جيعان. پوليتسەيلەر بۇل تۋرالى بىردەن ابىرجىپ وتىرعان تۋىستارىنا حابارلاعان, ولار دا ىزدەۋ جۇمىسىنا قاتىسقان بولاتىن. كوپ ۇزاماي زەينەتكەر امان-ەسەن ۇيىنە ورالدى.
– ىزدەۋ ءىس-شارالارىنا كومەكتەسكەن بارلىق ادامدارعا العىس بىلدىرەمىز. كىشكەنە كەشىككەن جاعدايدا سوڭى قايعىلى اياقتالۋى مۇمكىن ەدى. بەيجاي قارامايتىن ادامداردىڭ قاتىسۋى اۋماقتى بارىنشا اۋقىمدى قامتۋعا جانە ءىز-ءتۇسسىز جوعالعاننىڭ جۇرگەن جەرىن تەز ارادا انىقتاۋعا مۇمكىندىك بەردى, – دەدى اۋداندىق پوليتسيا ءبولىمىنىڭ باستىعى مارات سەركەشەۆ.
