«حالىقارالىق ينستيتۋتتار الەمدىك ەكونوميكا قارقىنى باسەڭدەيدى دەگەن بولجام ايتۋدا. سوعان سايكەس ينفلياتسيا جاپپاي ءوسۋى مۇمكىن. وڭىرلىك داعدارىستىڭ ۇزاققا سوزىلىپ بارا جاتقانىن بايقاپ وتىرمىز. ءتىپتى, بۇل احۋال جاھاندىق توقىراۋعا ۇشىراتادى دەگەن قاۋىپ بار. وسىنداي جاعدايدا ۇكىمەتتىڭ جانە ۇلتتىق بانكتىڭ نەگىزگى مىندەتى – ينفلياتسيانى تۇراقتاندىرىپ, ازاماتتاردىڭ تابىسىن ارتتىرۋ بولۋعا ءتيىس. سونداي-اق جاڭا جۇمىس ورىندارىن اشۋ قاجەت», دەدى پرەزيدەنت ءوز سوزىندە.
قاسىم-جومارت توقاەۆتىڭ ايتۋىنشا, قازىر ينفلياتسيانىڭ شارىقتاپ كەتۋى ەڭ كۇردەلى ماسەلە بولىپ وتىر. وعان قوسا باعانىڭ وسۋىنە ازىق-ت ۇلىك ينفلياتسياسى دا ەداۋىر اسەر ەتتى. قازىر ونىڭ دەڭگەيى 19,2 پايىزعا جەتتى. ال ازىق-ت ۇلىكتىڭ كەيبىر ءتۇرى بىردەن 80 پايىزعا قىمباتتادى.
«ۇكىمەتتىڭ باعانى تۇراقتاندىرۋعا باعىتتالعان شارالارى ءتيىمسىز بولىپ شىقتى. ۇكىمەت ينفلياتسيانى ەسكى ءادىس-تاسىلمەن توقتاتقىسى كەلەدى. ونىڭ وزىندە بيۋدجەتتەن قوسىمشا قاراجات ءبولىپ, باعانى جاساندى تۇردە عانا رەتتەپ وتىر. ياعني, قىمباتشىلىقتىڭ سەبەبىمەن ەمەس, سالدارىمەن كۇرەس ءجۇرىپ جاتىر. ال, شىن مانىندە, كەرىسىنشە بولۋى كەرەك. ۇكىمەت بار جاۋاپكەرشىلىكتى وڭىرلەرگە ارتىپ قويدى. ولار اكىمشىلىك رەسۋرستى پايدالانىپ, دۇكەندەردى ارالاپ ءجۇر, باسقا تاسىلدەر جانە جاڭا يدەيالار جوق. مۇنداي جۇمىس ەشقاشان ءتيىمدى بولعان ەمەس. ءبىر سوزبەن ايتقاندا, نارىق زاڭدىلىعىنا ساي كەلەتىن جاڭا ۇستانىم جوق», دەدى مەملەكەت باسشىسى.
