ءۇشارال جانە ءۇرجار اۋەجايلارىنىڭ جاساندى ۇشۋ-قونۋ جولاقتارىن رەكونسترۋكتسيالاۋ جۇمىستارى جالعاسۋدا. بۇل شارالار الاكول كولىنىڭ جاعالاۋىن اۋە كولىگىمەن قامتاماسىز ەتۋ ماقساتىندا قولعا الىنعان.
اتاپ ايتقاندا, ۇشۋ-قونۋ جولاقتارى مەن پەرروندى قايتا جاڭارتۋ, جارىق-سيگنالدىق جابدىق پەن پەريمەترلىك قورشاۋدى ورناتۋ كوزدەلگەن. جالپى اۋەجايلارداعى قايتا جوندەۋ جۇمىستارى قاۋىپسىزدىك پەن ساپا ستاندارتتارىنىڭ دەڭگەيىن ارتتىرۋعا باعىتتالعان.
جوندەۋ جۇمىستارىن جەتىسۋ جانە اباي وبلىستارىنىڭ اكىمدىكتەرى جۇرگىزۋدە. ەستەرىڭىزگە سالا كەتەيىك, جەرگىلىكتى اتقارۋشى ورگاندار قايتا جوندەۋ بويىنشا جۇمىستاردى جازعى دەمالىس ماۋسىمنىڭ باستالۋىنا دەيىن اياقتاۋدى جوسپارلاعان بولاتىن. الايدا, مەردىگەرلىك ۇيىمدار تاراپىنان جۇمىستىڭ ۋاقىتىلى ورىندالماۋىنا بايلانىستى نىسان كورسەتىلگەن مەرزىمدە تاپسىرىلماعان. وسى رەتتە قر يدم باسشىسى قايىربەك وسكەنباەۆ ءۇشارال جانە ءۇرجار اۋەجايلارىندا ءجۇرىپ جاتقان قۇرىلىس-مونتاجداۋ جۇمىستارىن جىلدامىراق اياقتاۋدى تاپسىردى.
ءۇشارال جانە ءۇرجار اۋەجايلارىنا سۋبسيديالاناتىن رەيستەردى ۇيىمداستىرۋ ماسەلەسىنە كەلەتىن بولساق, قر يندۋستريا جانە ينفراقۇرىلىمدىق دامۋ مينيسترلىگى تاراپىنان اتالعان راسىمدەر الدىن الا جۇرگىزىلگەن. ياعني, ءتيىستى قاراجات ءبولىنىپ, رەيستەردى جۇزەگە اسىراتىن اۆياكومپانيالار انىقتالدى.
وسىلايشا, وتكىزىلگەن كونكۋرس قورىتىندىسى بويىنشا «SCAT» اۆياكومپانياسى ءۇشارال – الماتى جانە ءۇشارال – نۇر-سۇلتان باعىتتارىندا تاسىمالداۋشى بولىپ تانىلدى. رەيستەر اۋە كەمەلەرىندە جازعى ماۋسىمدا ءار باعىت بويىنشا اپتاسىنا 14 رەيس جيىلىگىمەن, قالعان ۋاقىتتا 7 رەيس ورىندالاتىن بولادى. بيلەتتىڭ قۇنى تيىسىنشە 15 مىڭ تەڭگە جانە 16 مىڭ تەڭگەنى قۇرايدى.
سونداي-اق ءۇشارال-تالدىقورعان باعىتى بويىنشا «جەتىسۋ» اۆياكومپانياسى جازعى ماۋسىمدا 28 رەيس جيىلىگىمەن, قالعان كەزەڭدە 14 رەيس ورىندايتىن بولادى. رەيس «L-410» ۇشاقتارىندا جۇزەگە اسىرىلادى, بيلەت قۇنى – 8 مىڭ تەڭگە.
ءۇرجار – الماتى جانە ءۇرجار – نۇر-سۇلتان باعىتىندا جاريالانعان كونكۋرس قورىتىندىسى بويىنشا تاسىمالداۋشى بولىپ «يۋجنوە نەبو» اۆياكومپانياسى تانىلدى. رەيستەر «ان-24» اۋە كەمەلەرىندە جازعى ماۋسىمدا ءار باعىت بويىنشا اپتاسىنا 10 رەيس جيىلىگىمەن, قالعان ۋاقىتتا 5 رەيس ورىندالاتىن بولادى. بيلەت قۇنى سايكەسىنشە 14-16 مىڭ تەڭگە.
جەرگىلىكتى اتقارۋشى ورگانداردىڭ اقپاراتىنا سايكەس, ءۇشارال اۋەجايىن قايتا جاڭارتۋ جۇمىستارى 20 شىلدەدە, ال ءۇرجار اۋەجايىنداعى جۇمىستار تامىز ايىنىڭ باسىندا مارەسىنە جەتەدى دەپ جوسپارلانعان.
ايتا كەتەرلىگى, ۆەدومستۆو باسشىسى ق.وسكەنباەۆتىڭ تاپسىرماسى بويىنشا ءۇشارال جانە ءۇرجار اۋەجايلارىندا قايتا جوندەۋ جۇمىستارى جۇرگىزىلىپ جاتقان كەزدە الاكول كولىنىڭ جاعالاۋىنا كولىكتىڭ باسقا تۇرلەرىنە دەگەن قولجەتىمدىلىكتى قامتاماسىز ەتۋ ءۇشىن جولاۋشىلار تاسىمالدايتىن پويىزداردىڭ سانى ارتتى.
