رەسمي مالىمەتكە سۇيەنسەك, قازىرگى تاڭدا ەلوردادا 163 مىڭنان اسا بيزنەس سۋبەكتىسى جۇمىس ىستەيدى. ياعني ەلوردانىڭ ءاربىر ءۇشىنشى تۇرعىنى شاعىن جانە ورتا بيزنەس سالاسىندا ەڭبەك ەتەدى. قالانىڭ شاعىن جانە ورتا بيزنەس سۋبەكتىلەرى ەلدەگى ءدال وسى سەكتورعا تيەسىلى جۇمىستار مەن قىزمەتتەردىڭ 20 پايىزىن ءوندىرىپ وتىر. بۇل رەتتە بيزنەس سۋبەكتىلەرىنىڭ ءونىم شىعارۋ كولەمى 50 ەسە وسكەن.
ناقتى سەكتوردا جاڭا وندىرىستەردى جانە الەۋمەتتىك نىسانداردى ىسكە قوسۋ جىل سايىن 20 مىڭنان اسا جاڭا جۇمىس ورنىن قۇرۋعا ىقپال ەتەدى. ونىڭ ىشىندە شاعىن جانە ورتا بيزنەستىڭ كورسەتكىشى شامامەن 70 پايىزعا تەڭ. بۇل تۇرعىنداردىڭ ءال-اۋقاتىنا دا وڭ اسەر ەتەتىنى ايتپاسا دا تۇسىنىكتى. وسىنىڭ ناتيجەسىندە, شاھارداعى ورتاشا ايلىق اتاۋلى جالاقى 27 ەسە ءوسىپ, 340,5 مىڭ تەڭگەگە جەتتى. جۇمىسسىزدىق دەڭگەيى 3 ەسە قىسقاردى. بۇگىندە جۇمىسسىزدىق دەڭگەيى 1998 جىلعى 13 پايىزدان 4,6 پايىزعا دەيىن قىسقاردى.
استانا ەسەبىنەن مەملەكەتتىك بيۋدجەتكە تۇسەتىن تۇسىمدەر 106 ەسە ۇلعايعان. 1998-2022 جىلدار ارالىعىندا استانادان مەملەكەتتىك بيۋدجەتكە تۇسكەن كىرىستەردىڭ جيىنتىق ءتۇسىمى 13,4 ترلن تەڭگەنى قۇرادى. ونىڭ 10 ترلن تەڭگەسى نەمەسە 74,6 پايىزى رەسپۋبليكالىق بيۋدجەتكە باعىتتالدى. سوندا الىنعان ترانسفەرتتەردىڭ ءاربىر 1 تەڭگەسىنە ەلوردا رەسپۋبليكالىق بيۋدجەتكە 3 تەڭگە كىرىس قايتارىپ وتىر. 2015 جىلدان باستاپ نۇر-سۇلتان رەسپۋبليكالىق بيۋدجەتتىڭ دونور-وڭىرلەرىنىڭ قاتارىنا ەنگەنى ءمالىم. سول ۋاقىتتان بەرى ەل قازىناسىنا 200 ملرد تەڭگە اۋدارعان.
استانا العاش قۇرىلعان ساتتەن باستاپ ەسەپتەسەك, قالانىڭ جالپى وڭىرلىك ءونىمى 327,5 ەسە, ياعني 25,7 ملن تەڭگەدەن 8,4 ترلن تەڭگەگە دەيىن وسكەن. 1997 جىلدان باستاپ ونەركاسىپ ءوندىرىسىنىڭ كورسەتكىشى 94 ەسە ۇلعايعان. ءدال وسى جىلدان باستاپ قالا ەكونوميكاسىنا شامامەن 12 ترلن تەڭگە ينۆەستيتسيا تارتىلعان. وتاندىق ينۆەستيتسيالاردىڭ اعىنى ءۇش ەسە, ال شەتەلدىك ينۆەستيتسيالاردىڭ اعىنى جەتى ەسە ءوستى. قالادا شەتەل ينۆەستيتسياسىنا ەلىمىزدە بالاماسى جوق جاڭا جوعارى تەحنولوگيالىق وندىرىستەر قۇرىلدى. وتكەن جىلدىڭ قورىتىندىسى بويىنشا ينۆەستيتسيالاردىڭ رەكوردتىق كولەمى تىركەلدى. ءبىر جىلدىق كورسەتكىش العاش رەت 1,2 ترلن تەڭگەدەن اسىپ ءتۇستى. استانانىڭ ينۆەستيتسيالىق تارتىمدى قالاعا اينالعانىن وسىدان-اق اڭعارۋعا بولادى.
نۇر-سۇلتان قالالىق كاسىپكەرلەر پالاتاسى ۇسىنعان مالىمەتكە سۇيەنسەك, ەلوردانىڭ بيزنەس سەكتورىندا ايەلدەردىڭ ۇلەسى قوماقتى. استاناداعى بيزنەستىڭ 47 پايىزىنا ايەلدەر جەتەكشىلىك ەتىپ وتىر. 2022 جىلعى 1 قاڭتارداعى دەرەككە سۇيەنسەك, استانادا 191 مىڭنان اسا كاسىپكەرلىك سۋبەكتىسى تىركەلگەن. سونىڭ 77 مىڭنان استامىن ارۋلار باسقارىپ وتىر. ناقتىراق ايتساق, 58 225 جەكە كاسىپكەرلىكتىڭ, 19 386 جاۋاپكەرشىلىگى شەكتەۋلى سەرىكتەستىكتىڭ جۇمىسىنا ايەلدەر باسشىلىق ەتەدى.
– سوڭعى ءۇش جىلدىڭ قورىتىندىسى بويىنشا نۇر-سۇلتان قالاسىندا بيزنەستى دامىتۋدىڭ وڭ ديناميكاسى بايقالادى. شاعىن جانە ورتا بيزنەس سۋبەكتىلەرىنىڭ سانى جىل سايىن ارتىپ كەلەدى. سونىمەن قاتار ايەلدەردىڭ بەلسەندىلىگى دە ءبىلىنىپ وتىر. ولار تاماقتانۋ, مەكتەپكە دەيىنگى ءبىلىم بەرۋ ۇيىمدارى, ءبىلىم بەرۋ جانە وقۋ ورتالىقتارى, سۇلۋلىق سالاسى سەكىلدى باعىتتاردا كوپتەپ شوعىرلانعان. مىسالى, «باستاۋ-بيزنەس» جوباسى اياسىندا 2021 جىلى 1 312 قاتىسۋشى وقىتىلدى. ونىڭ 935-ءى نەمەسە 71,2 پايىزى – ايەل. جوبانىڭ 585 قاتىسۋشىسى گرانتقا يە بولدى. ونىڭ 476-ى نەمەسە 82 پايىزى كاسىپكەر ايەلدەردىڭ ۇلەسىندە, – دەيدى نۇر-سۇلتان قالالىق كاسىپكەرلەر پالاتاسىنىڭ ديرەكتورى بەيسەن جولبولديەۆ.
«قاراپايىم زاتتار ەكونوميكاسى» مەملەكەتتىك باعدارلاماسىن جۇزەگە اسىرۋ اياسىندا ەلوردادا 74,15 ملرد تەڭگەنىڭ 48 جوباسى ماقۇلداندى. ونىڭ ىشىندە 7 جوبا كاسىپكەر ايەلدەرگە تيەسىلى. ولار بويىنشا قارجىلاندىرۋدىڭ جالپى سوماسى 2,16 ملرد تەڭگەنى قۇراعان.
ءبىر كەزدەرى ەلوردا مەملەكەتتىك قىزمەتشىلەردىڭ قالاسى دەلىنەتىن. ال قازىر استانا كاسىپكەرلەردىڭ شاھارىنا اينالدى. باس قالادا بيزنەس باستاۋعا, ونىڭ نارىعىندا تۇراقتاپ قالۋعا نيەتتى جاندار كوپ. وسى ورايدا جاستاردىڭ دا بيزنەستەگى بەلسەندىلىگىن ەرەكشە اتاپ وتكەن دۇرىس. ارماندار ورىندالىپ, يگىلىكتى يدەيالار جۇزەگە اساتىن ەلوردا ەكونوميكاسى ەلدىڭ قۋاتىن ەسەلەپ وتىر.
