ماسەلەن, رەسەي شەكاراسىنا دەيىن قاتىنايتىن تاس جول جانىنداعى بازاردا ەڭ ءوتىمدىسى – قوي. بازار اۋلاسىنا سىيماعان ساتۋشىلار مالىن دالادا ساۋدالاپ تۇر. بۇل بازاردا ساتىلىمعا شىعارىلعان قوي باتىس قازاقستان وبلىسىنان, اتىراۋدىڭ قىزىلقوعا, قۇرمانعازى, يندەر, جىلىوي اۋداندارىنان اكەلىنگەن. بازاردا تۇساق ءۇشىن 60-65 مىڭ تەڭگە سۇرايدى. ەرتە تۋعان قوزىنىڭ ەڭ تومەنگى باعاسى – 35 مىڭ تەڭگە. قاساپشىلار ءبىر قويدى ءۇش مىڭ تەڭگەگە سويىپ بەرەدى.
ءىرى قارانىڭ باعاسى 370 مىڭ تەڭگەدەن باستالادى. بۇل – ءۇش جاسار وگىزدىڭ باعاسى. ال ۇرعاشى سيىردىڭ ەڭ ارزانى 400 مىڭ تەڭگە تۇرادى. ء«وزىم باققان وگىزدى ساتۋعا اكەلدىم. شامامەن 350 كەلى تارتاتىنىنا سەنىمدىمىن. سالماعىنا, قوڭىنا بايلانىستى 700 مىڭ تەڭگەگە ساتامىن. بۇدان تومەن باعاعا بەرە المايمىن», دەيدى يندەر اۋدانىنان كەلگەن ەر ادام.
مۇنايلى شاھاردىڭ ورتالىق بولىگىنە تاياۋ ورنالاسقان «تۋما» بازارىنداعى باعا وزگەلەرىنەن قىمباتتاۋ كورىندى. مۇندا قوزىنى 40 مىڭ تەڭگەگە ساتىپ الۋعا بولادى. ءىرى قوي 100 مىڭ تەڭگەگە باعالانىپ تۇر. ال سەمىز ىسەك ءۇشىن 120 مىڭ تەڭگە سۇرايتىندار بار. بۇل بازاردا ءار قويدى سويۋ باعاسى – ءتورت مىڭ تەڭگە.
– جىل سايىن قۇربان ايت كۇندەرى مال باعاسى نەگە كۇرت قىمباتتايتىنىن تۇسىنبەيمىن. ساۋاپ جينايتىن كۇندەرى مۇنى رەتتەيتىن تەتىك جوق پا؟ ءبىر ىسەكتى 120 مىڭ تەڭگەگە ساتىپ الۋ مۇمكىن ەمەس, – دەيدى قالا تۇرعىنى نۇرحان تاجىعالي ۇلى.
اتىراۋ وبلىسى
