سقو سانيتاريالىق-ەپيدەميولوگيالىق باقىلاۋ دەپارتامەنتى ءباسپاسوز قىزمەتىنىڭ مالىمەتىنشە, وپيستورحوز – ادامنىڭ ۇيقى بەزىن, ءوت جولدارىن جانە باۋىرىن زاقىمدايتىن تابيعي-وشاقتىق قۇرت اۋرۋى. ءپارازيتتىڭ تاسىمالداۋشىسى ادام جانە ءۇي جانۋارلارى – يت پەن مىسىق بولۋى مۇمكىن. پارازيت ادام اعزاسىندا ونداعان جىلدار بويى ءومىر سۇرەدى. سالدارىندا وپيستورحتار باۋىر وبىرىن تۋدىرۋى مۇمكىن.
«اۋرۋ قوزدىرعىشى - ۇلكەندىگى 1 سم بولاتىن وپيستورح قۇرتى نەمەسە ءسىبىر سورعىشى, ونىڭ جۇمىرتقاسى وتە ۇساق بولادى. قۇرتتىڭ جۇمىرتقاسى مەن دەرناسىلى قورشاعان ورتاعا ءتوزىمدى كەلەدى: توپىراق ۇستىندە قۇرت جۇمىرتقالارى 10 كۇنگە دەيىن, ال سۋ ايدىندارىندا 2 جىلعا دەيىن ساقتالادى. دەرناسىلدەرى 12 گرادۋستا 1 ايعا دەيىن, بالىقتاعى تۇزدىڭ مولشەرى 10% بولعاندا 37 كۇنگە دەيىن, قاقتالعان بالىقتا 20 كۇنگە دەيىن ساقتالادى. بالىقتى ىستىقتاي قاقتاۋ دەرناسىلدى جويادى, ال سۋىقتاي قاقتاۋ ولاردىڭ ءومىر سۇرۋىنە اسەر ەتپەيدى», دەيدى سقو سانيتاريالىق-ەپيدەميولوگيالىق باقىلاۋ دەپارتامەنتى ينفەكتسيالىق جانە پارازيتتىك اۋرۋلاردى ەپيدەميولوگيالىق باقىلاۋ ءبولىمىنىڭ باس مامانى سالتانات بەكۋموۆا.
ايتۋىنشا, ادامعا ينفەكتسيا شيكى, جەتكىلىكتى قۋىرىلماعان جانە ازداپ تۇزدالعان, كەپتىرىلگەن بالىقتى جەگەندە جۇعادى.
«وندا وپيستورحيس گەلمينتتەرىنىڭ دەرناسىلدەرى بولادى. وپيستورحيس دەرناسىلدەرى نەگىزىنەن تۇقى تەكتى – ياز, ەلەتس, شاباق, ەۋروپالىق پلوتۆا, ۆوبلا, لين, كراسنوپەركا, سازان جانە تابان, تۇقى, موڭكە بالىقتارىندا كەزدەسەدى. ءبىر بالىقتا 7 مىڭعا دەيىن دەرناسىل بولۋى مۇمكىن. زاقىمدالعان بالىقتى ايىرا المايسىز, ويتكەنى دەرناسىلدەر تەك ميكروسكوپپەن عانا كورىنەدى», دەيدى مامان.
ايانا توعانبەك
