ۆەدومستۆو باسشىسى تامارا دۇيسەنوۆا زەينەت جاسىن 58 جاسقا دەيىن تومەندەتۋ بويىنشا قازاقستان ايەلدەر قوزعالىسىنىڭ وكىلدەرىمەن بەسىنشى كەزدەسۋ وتكىزدى.
كەلىسسوز بارىسىندا مينيستر ارنايى جۇمىس توبى بەلسەندىلەردىڭ ۇسىنىستارىن جان-جاقتى زەرتتەگەنىن, سونداي-اق زەينەتاقىمەن قامسىزداندىرۋ جۇيەسىن جەتىلدىرۋ بويىنشا ۇسىنىلاتىن تاسىلدەر تۋرالى حابارلادى.
كەزدەسۋگە قوعامدىق قوزعالىس وكىلدەرى مايكەن بيگارستانوۆا, مارينا باچاەۆا, ولگا سميرنوۆا, گۇلنار سمايىلحانوۆا, جانار جيبەگەنوۆا, ءلايلا وسپانوۆا, قارلىعا احمەتبەكوۆا جانە ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى ازيزا شۋجەەۆا قاتىستى.
جيىندا تامارا دۇيسەنوۆا بەلسەندىلەردىڭ ۇسىنىسىن مينيسترلىك جانىنان قۇرىلعان ارنايى جۇمىس توبى جان-جاقتى زەرتتەگەنىن ايتتى. بۇل رەتتە تومەندەگى فاكتورلار ەسكەرىلدى:
- 1998 جىلعى 1 قاڭتارعا دەيىن, ياعني جيناقتاۋشى جۇيە ەنگىزىلگەنگە دەيىن جيناقتالعان ەڭبەك ءوتىلى ءۇشىن الىناتىن ىنتىماقتى زەينەتاقى جۇيەسى مولشەرىنىڭ كەمۋى;
- ەكونوميكانىڭ ءتۇرلى سەكتورلارىنداعى جاسى 50-دەن اسقان ايەلدەردىڭ تابىس دەڭگەيى;
- ايەلدەردىڭ زەينەت دەمالىسىنا ەرتە شىققان كەزدەگى زەينەتاقىسىنىڭ بولجامدى مولشەرى, ولاردىڭ تابىسى جانە جيناقتاۋشى زەينەتاقى جۇيەسىنە قاتىسۋ ءوتىلى.
مينيستر ەڭبەك ءوتىلى جوق جانە بۇگىندە جيناقتاۋشى زەينەتاقى جۇيەسىنە قاتىسپايتىن قازاقستاندىقتار ءۇشىن 50+ جاسىندا زەينەتكە ەرتە شىعۋ لايىقتى تولەمدى قامتاماسىز ەتپەيتىنىن اتاپ ءوتتى. بۇل رەتتە قولدانىستاعى زاڭناماعا سايكەس ازاماتتارعا زەينەتكە ەرتە شىعۋ قۇقىعى بەرىلەدى. وسىلايشا زەينەتاقى قورىندا زەينەتاقى جيناقتارى 55 جاسقا (ەرلەر) جانە 52,5 جاسقا (ايەلدەر) تولعاندا جەتكىلىكتى بولعان كەزدە قازاقستاندىقتار زەينەتاقى اننۋيتەتىن راسىمدەي الادى (زەينەت جاسىنا جەتكەنگە دەيىن زەينەتاقى جيناقتارىنان تولەم الۋ قۇقىعى). زياندى ەڭبەك جاعدايلارىندا جۇمىس ىستەيتىن ازاماتتار زەينەتاقى اننۋيتەتىن 40 جاستان باستاپ پايدالانا الادى, بۇل رەتتە وسىنداي شارتتار بويىنشا تولەمدەر 50 جاستان باستالادى.
تامارا دۇيسەنوۆا قوزعالىس بەلسەندىلەرىنە ازاماتتاردى زەينەتاقىمەن قامتاماسىز ەتۋدى جەتىلدىرۋ ماقساتىندا مينيسترلىك ازىرلەگەن جاڭا تاسىلدەر جونىندە دە ايتىپ بەردى.
«بىرىنشىدەن, ءبىز بازالىق جانە ىنتىماقتى زەينەتاقى تاعايىنداۋ كەزىندە پارامەترلەردى وزگەرتۋ تۋرالى باستاما كوتەردىك. قازىر ءبىزدىڭ ۇسىنىستارىمىز باسقا دا مۇددەلى مەملەكەتتىك ورگانداردا قارالادى, ەگەر ولار قولداۋ تاپسا – بۇل كەلەسى جىلدان باستاپ بيۋدجەتتەن تولەنەتىن زەينەتاقى تولەمدەرىنىڭ مولشەرىن ۇلعايتۋعا مۇمكىندىك بەرەدى. جۇمىس ىستەپ جۇرگەن جانە بولاشاقتا قۇرمەتتى دەمالىسقا شىعاتىن زەينەتكەرلەر دە وڭ اسەرىن تيگىزەدى. ەكىنشىدەن, ءبىز «كۇمىس جاس» جوباسىنىڭ تەتىكتەرىن زەينەت جاسىنا دەيىنگى ايەلدەردىڭ جۇمىسپەن قامتىلۋىن قامتاماسىز ەتۋ ءۇشىن قايتا قاراستىرامىز. اتاپ ايتقاندا, ءبىز جوباعا قاتىسۋ مەرزىمىن 3 جىلعا دەيىن ۇلعايتۋدى جوسپارلاپ وتىرمىز جانە ايەلدەردى جۇمىسقا ورنالاستىرۋ ءۇشىن بيۋدجەت قاراجاتى ەسەبىنەن ولاردىڭ جالاقىسىن ءىشىنارا سۋبسيديالاي وتىرىپ, ارنايى باعىتتاردى قاراستىرامىز. بۇل ولاردىڭ زەينەتكە شىققانعا دەيىن جيناقتاۋشى زەينەتاقى جۇيەسىنە بارىنشا بەلسەندى قاتىسۋىنا مۇمكىندىك بەرەدى. بۇل اسىرەسە ەڭبەك ءوتىلى از جانە زەينەتاقى قورىندا جيناعى از ايەلدەر ءۇشىن وتە ماڭىزدى», دەدى مينيستر.
قوزعالىس وكىلدەرى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى ازىرلەگەن تاسىلدەردى وڭ باعالادى. كەزدەسۋ سوڭىندا تامارا دۇيسەنوۆا ازاماتتاردى زەينەتاقىمەن قامسىزداندىرۋ جۇيەسىن جەتىلدىرۋ بويىنشا جۇمىس جالعاساتىنىن اتاپ ءوتتى.
