قوعام • 03 شىلدە، 2022

ءموبيلدى ينتەرنەتتى تۇتىناتىندار كوبەيدى

29 رەت كورسەتىلدى

الەم بويىنشا ينتەرنەتتى پايدالانۋشىلار سانى 4،9 ملرد ادامدى قۇراپ وتىر. بۇل – 2022 جىلدىڭ باسىنداعى دەرەك. دەمەك الەم حالقىنىڭ ۇشتەن ەكىسى ينتەرنەتكە قوسىلعان. سوڭعى 10 جىلدا پايدالانۋشىلار سانى 2،2 ەسە وسكەنىن اتاپ وتكەن ءجون.

ينتەرنەت ادامدار اراسىنداعى قا­رىم-قاتىناسقا، تاۋار تىزبەكتەرى مەن لو­گيستيكالىق اعىنعا، اقپارات الما­سۋعا جانە جالپى ءومىردىڭ بارلىق اسپەكتىلەرىنە اسەر ەتەتىنى بەلگىلى. ول ارقىلى الەم دە بەلسەندى تۇردە وزگەرىپ كەلەدى. دۇنيەجۇزىلىك جەلىنىڭ اسەرىنەن جەكە تۇتىنۋشىلار دا، ءىرى ەكونوميكالار دا العا باسۋدا.

ينتەرنەتتى پايدالانۋشىلار سانى وسكەن سايىن پايدالانىلاتىن ترافيك كولەمى دە ارتاتىنى تۇسىنىكتى. ءبىر پايدالانۋشى تۇتىناتىن ينتەرنەت ترافيگىنىڭ كولەمى دە ءوسىپ كەلەدى. ماسەلەن، 2022 جىلدىڭ ءبىرىنشى توقسانىندا بۇل كورسەتكىش 11،781 گب-تى قۇرادى. ال 2021 جىلدىڭ ءتورتىنشى توقسانىندا 9،885 گب بولعان ەدى.

Ranking.kz-ءتىڭ ەسەبىنشە، ءموبيلدى ينتەرنەت ترافيگىن تۇتىنۋ قازاقستاندا دا ارتىپ كەلەدى. Beeline-نىڭ قازاق­ستانداعى جەلىسىندە 2021 جىلى ءبىر پاي­دا­لانۋشىعا شاققانداعى ترافيكتىڭ كولەمى ۇشتەن بىرگە وسكەن. وپەراتوردىڭ دەرەك­تەرىنە سۇيەنسەك، وتكەن جىلدىڭ ءتورتىنشى توقسانىندا ءبىر پايدالانۋشى تۇتىنعان ترافيك كولەمى 14،1 گب-قا جەتتى. بۇل ءبىر جىل بۇرىنعى كەزەڭمەن سالىستىرعاندا 28،2 پايىزعا جوعارى.

Kcell-ءدىڭ دە كورسەتكىشتەرى وسكەن. دالىرەك ايتساق، 2020 جىلدىڭ ءتورتىنشى توقسانىمەن سالىستىرعاندا بىلتىر ءدال وسى كەزەڭدەگى ءوسىم 18،3 پايىزدى قۇ­رادى. سوندا ءبىر پايدالانۋشى 11،6 گب تۇتىنعان.

ايتا كەتەرلىگى، قازاقستاننىڭ كور­سەتكىشى الەمدەگى ورتاشا دەڭگەيدەن ايتارلىقتاي جوعارى. قازاقستان ءموبيلدى ينتەرنەت ترافيگىن كوپ تۇتىناتىن توپ-15 ەلدىڭ قاتارىنا كىرەدى. وسىلايشا، 2021 جىلدىڭ ءتورتىنشى توقسانىنىڭ قورىتىندىسى بويىنشا قازاقستاندا ءبىر پايدالانۋشىعا شاققاندا ءموبيلدى ينتەرنەت ترافيگىن تۇتىنۋ 14،4 گب-تى قۇرادى. بۇل الەمدەگى ورتاشا ماننەن 46 پايىزعا جوعارى. سونىمەن قاتار اتالعان كورسەتكىش تۇركيا (13،6 گب)، سينگاپۋر (13 گب)، يتاليا (12 گب)، گرەكيا (6،2 گب)، بەل­گيا (5،4 گب) سەكىلدى ەلدەردىڭ دەڭ­گەيى­نەن ارتىق.

قازاقستاندا ينتەرنەت-ترافيكتى تۇتىنۋ كولەمىنىڭ جوعارىلىعى تۇرعىندار ءۇشىن دۇنيەجۇزىلىك جەلىنىڭ قول جەتىمدى ەكەنىن كورسەتەدى. بۇل ەل ەكونوميكاسىن تابىستى تسيفرلاندىرۋدىڭ نەگىزگى فاكتورلارىنىڭ ءبىرى ەكەنى دە تۇسىنىكتى. ءموبيلدى ينتەرنەت تاريفتەرىنىڭ قولجەتىمدىلىگى قازاقستاندىقتارعا بار­لىق جەردە جۇمىس ىستەۋگە، وقۋعا نەمەسە ويىن-ساۋىق كونتەنتىن پايدالانۋعا مۇم­كىندىك بەرەدى. بۇل رەتتە ينتەرنەت باعاسى قىمبات ەلدەردىڭ پايدالانۋشىلارى وزدەرىن بارىنشا شەكتەيتىنىن دە ۇمىتپاۋ كەرەك. ماسەلەن، ولار بەينەلەردى كورۋدە، اۋىر فايلداردى جۇكتەۋدە جانە ءموبيلدى ترافيكتىڭ ەداۋىر كولەمىن تۇتىناتىن باسقا دا وپتسيالاردى پايدالانۋدا وزدەرىن شەكتەۋگە ءماجبۇر.

اتاپ وتەرلىگى، ترافيكتى تۇتىنۋ كولە­مى وسسە دە، قازاقستانداعى ءموبيلدى ينتەرنەت باعاسى ارزانداي تۇسۋدە. ادەت­تە، حالىقارالىق تاجىريبەگە سۇيەن­سەك، مۇنداي جاعدايدا باعا قىمباتتاۋعا ءتيىس ەدى. ماسەلەن، 2021 جىلدىڭ قورىتىن­دىسى بويىنشا 1 گب ينتەرنەت ترافيگىنىڭ ورتاشا باعاسى 110،5 تەڭگەنى قۇرادى. بۇل 2020 جىلعا قاراعاندا 9،7 پايىزعا تومەن. سونىمەن قاتار سەكتورداعى باعانىڭ ارزانداۋى ءبىرىنشى جىل ورىن الىپ وتىرعان جوق. مىسالى، 2017 جىلى 1 گب ءۇشىن ورتاشا باعا 234،1 تەڭگەنى قۇراعان ەدى.

سونداي-اق دىبىستىق قوسىلۋ مينۋتتارىنىڭ قۇنى دا تومەندەۋدە. ايتالىق، 2021 جىلى كورسەتكىش ورتا ەسەپپەن 1،19 تەڭگەنى، 2020 جىلى – 1،2 تەڭگەنى، 2019 جىلى – 1،34 تەڭگەنى، 2018 جىلى – 1،41 تەڭگەنى قۇرادى.

بۇكىل الەم بويىنشا ينتەرنەتكە قول جەت­كىزۋ قۇنى، ادەتتە، ەلدىڭ اۋدانىنا تىكە­لەي بايلانىستى ەكەنى ءمالىم. ياعني ەلدىڭ گەوگرافيالىق اۋماعى نەعۇرلىم ۇلكەن بولسا، بۇكىل اۋماقتى قامتۋ دا سو­عۇرلىم قىمباتقا تۇسەدى. تيىسىنشە، پاي­دالانۋشىلارعا ارنالعان تاريفتەر دە سوعۇرلىم جوعارى بولۋى كەرەك. ال ءبىزدىڭ ەلدەگى جاعداي مۇلدەم باسقاشا. ەلى­مىزدىڭ اۋماعى ۇلكەن بولعاندىقتان، تەلەكوممۋنيكاتسيانى دامىتۋ سەكتورىنا كوپ ينۆەستيتسيا كەرەك. سويتە تۇرا ابونەنتتەر ءۇشىن تۇپكىلىكتى باعا الدەقايدا تومەن. مۇنداي ديناميكا قازاقستاننىڭ Digital-دى دامىتۋ باعىتىنداعى قادامىنىڭ وڭ ەكەندىگىنىڭ ايعاعى.

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار