«اتامەكەن» ۇلتتىق كاسىپكەرلەر پالاتاسى ساراپشىلارىنىڭ, كولىك سالاسىنداعى قاۋىمداستىقتار مەن بيزنەس-قوعامداستىقتىڭ وكىلدەرىنىڭ قاتىسۋىمەن وتكەن القالى جيىندا مەملەكەتتىك رەتتەۋدىڭ پروبلەمالىق ماسەلەلەرى تالقىلاندى. سونداي-اق كاسىپكەرلىك قىزمەتتى رەتتەۋدىڭ «تازا پاراقتان» جاڭا تاسىلدەرىنە سايكەس نورماتيۆتىك-قۇقىقتىق بازانى جەتىلدىرۋ جۇيەسى نازارعا الىندى.
جۇمىس توبى جىل باسىنان بەرى ازاماتتىق اۆياتسيا, اۆتوموبيل, تەمىرجول جانە سۋ كولىگى سالالارىن رەتتەيتىن 283 نورماتيۆتىك قۇقىقتىق اكتىنى قايتا قاراعان. ناتيجەسىندە 4 615 تالاپ تۇزەتۋدى تالاپ ەتپەيتىندىگى جانە ازاماتتىق اۆياتسيا سالاسىنداعى حالىقارالىق پراكتيكاعا (ICAO ستاندارتتارىنا) جانە سۋ كولىگى سالاسىنداعى حالىقارالىق شارتتارعا (بۇۇ, IMO, حەۇ) سايكەس كەلەتىندىگى انىقتالدى. وسىعان وراي اتالعان قۇجاتتارعا تۇزەتۋلەر ەنگىزىلگەن جوق.
سونىمەن قاتار 1 092 نورماتيۆ بازالىق شارتتارعا سايكەس كەلمەيتىندىگى انىقتالدى. ونىڭ 950-ءى وزگەرتۋدى (تولىقتىرۋدى) تالاپ ەتسە, جويۋدى تالاپ ەتەتىن نورماتيۆ سانى 128-ءدى قۇرايدى.
وتىرىس قورىتىندىسى بويىنشا كاسىپكەرلىك سۋبەكتىلەرىنە قويىلاتىن مىندەتتى تالاپتاردىڭ الدىن الا تىزبەسىن قالىپتاستىرۋ, سونداي-اق ازاماتتىق اۆياتسيا جانە سۋ كولىگى سالالارىنداعى بولەك بەلگىلەنگەن بىرقاتار ماسەلەلەردى كىشى توپتاردىڭ وتىرىستارىندا بيىلعى جىلدىڭ 1 شىلدەسىنە دەيىن قايتا قاراۋ تۋرالى شەشىم قابىلداندى.
تىزىلىمدە مەملەكەتتىك ورگان تالاپتارىنىڭ جاڭا رەتتەۋشى ساياساتقا سايكەستىگى تۇرعىسىنان قايتا قارالۋ مەرزىمدە ايقىندالىپ, وسى باعىتتاعى جۇمىس تۇراقتى نەگىزدە جالعاساتىن بولادى.
