قازاقستان • 01 شىلدە، 2022

بەرگەن سەرتكە بەرىكتىك

38 رەت كورسەتىلدى

اتا زاڭىمىزدىڭ 53-بابىندا: رەسپۋبليكا پارلامەنتى ءوزىنىڭ بىرلەسكەن وتىرىسىندا «سوعىس جانە ءبىتىم» ماسەلەسىن، سونداي-اق «رەسپۋبليكا پرەزيدەنتىنىڭ ۇسىنىسى بويىنشا بەيبىتشىلىك پەن قاۋىپسىزدىكتى ساقتاۋ جونىندەگى حالىقارالىق مىندەتتەمەلەردى ورىنداۋ ءۇشىن رەسپۋبليكانىڭ قارۋلى كۇشتەرىن پايدالانۋ تۋرالى شەشىم قابىلدايدى»، دەپ انىق كورسەتىلگەن. بۇل – كەشە عانا ەنگىزىلگەن جاڭالىق ەمەس، ۇلتتىق پارلامەنتاريزم تاريحىندا بۇرىننان بار ءۇردىس. قازاقستان پارلامەنتى 2013 جانە 2018 جىلدارى مۇنداي شەشىم قابىلداعان.

سەنات بيىلعى 22 ساۋىردە قارۋلى كۇشتەرىمىزدىڭ بىتىمگەرشىلىك قىزمەت اتقارۋ جونىندەگى ەسەبىن تىڭداپ، ارنايى ورتالىقتىڭ جۇمىسىمەن تانىستى. سوندا ءمالىم بولعانداي، 2014 جىلدان بەرى قازاقستاندىق اسكەريلەر ءۇش مەملەكەتتە – باتىس ساحارا، كوت-د-يۆۋار مەن ليۆانداعى بىتىمگەرشىلىك كونتينگەنتىندە ءتۇرلى قىزمەتتەر اتقارعان.

ءدال قازىر جەر شارىنىڭ ءار تۇكپىرىندە 12 بىتىمگەرشىلىك ميسسياسى وتۋدە. ال باتىس ساحارادا – 6، ليۆاندا 9 قازاق­ستاندىق بىتىمگەر وزدەرىنە جۇكتەلگەن تاپ­سىرمالاردى ابىرويمەن ورىنداپ ءجۇر.

مىنا ءبىر نارسەگە ەرەكشە نازار اۋدارعىم كەلەدى. بىتىمگەرلەردىڭ ءبارى بىردەي مۇزداي قارۋلانعان جاۋىنگەر ەمەس، ولاردىڭ اراسىندا شتاب وفيتسەرلەرى، اسكەري زاڭگەرلەر، اسكەري دارىگەرلەر، ينجەنەرلەر مەن باقىلاۋشىلار دا بار. ولار ءتىل ۇيرەنۋدىڭ جەدەلدەتىلگەن ارنايى كۋرستارىنان وتەدى. كەيىنگى جىلدارى قازاقستاندىق بىتىمگەرلەر قاتارىن اقش، ۇلىبريتانيا، ت.ب. مەملە­كەت­تەردىڭ اسكەري اكادەميالارىن بىتىرگەن، اعىلشىن ءتىلىن ەركىن مەڭگەرگەن جاس وفيتسەرلەر تولىقتىرۋدا. بىتىمگەرلەرگە جىل سايىن روتاتسيا دا جاسالىپ وتىرادى.

قازاقستاندا 2006 جىلى العاش بىتىمگەرلەر دايارلايتىن وقۋ ورتالىعى اشىلىپ، ول 2020 جىلدان بەرى بىتىم­گەر­لەردىڭ ارنايى ورتالىعى بولىپ قايتا قۇرىلدى. بۇل – ورتالىق ازياداعى ەڭ ءىرى دايارلىق ورنى. قازىر دۇنيە ءجۇزىنىڭ 50-دەن استام ەلىندە ءدال وسىنداي 140 ورتالىق جۇمىس ىستەيدى. قازاقستاندىق ورتالىق 2021 جىلى وتكىزگەن «شتاب وفيتسەرلەرى» كۋرسىندا ۇلىبريتانيا، يسپانيا، قىرعىزستان، موزامبيك سياقتى مەملەكەتتەردىڭ وكىلدەرى بولدى. ال بىلتىر قاراشا ايىندا وتكەن «بەيبىت حالىقتى قورعاۋ» كۋرسىنا بانگلادەش، برازيليا، ماۆريتانيا، موزامبيك، نيگەريا، پاكىستان، ساۋد ارابياسى جانە فينليانديا مەملەكەتتەرىنىڭ وكىلدەرى قاتىستى.

جالپى، بىتىمگەرلەر دايارلايتىن قازاق­ستاندىق ورتالىقتىڭ جۇمىسىنا حالىق­ارالىق دەڭگەيدە وتە جوعارى باعا بەرى­لۋدە. بۇۇ باس حاتشىسىنىڭ ورىن­باسا­رى جان-پەر لاكرۋا 2019 جىلى ورتا­لىق جۇمىسىمەن تانىسىپ، وعان بۇۇ-نىڭ ستاندارتىنا سايكەس «شتاب وفيتسەر­لەرى» مەن «بەيبىت حالىقتى قورعاۋ» بويىنشا ارنايى سەرتيفيكاتتارىن تاپسىردى.

پاندەميا الەم ەلدەرىنە تۇتقيىلدان كەلگەن قاتەرمەن بىرلەسە كۇرەسىپ، سەلبەسە سەپتەسۋگە ۇيرەتتى. بىتىمگەرشىلىك ميسسياسى دا جاھاندىق قاۋىپسىزدىك پەن بەيبىتشىلىكتى ورتاقتاسا ورنىقتىرۋعا باعىتتالعان.

قازاقتا «الاعان قولىم بەرەگەن» دەگەن بابالار ءسوزى بار. ءبىزدىڭ حالقىمىز – دوس پەيىلمەن جاسالعان كومەكتى الا دا بىلەتىن، مۇقتاج بولعاندارعا ءدال وسىنداي جاعدايدا بەرە دە بىلەتىن حالىق.

ءبىز پرەزيدەنتىمىز قاسىم-جومارت توقاەۆتىڭ باستاۋىمەن زاڭعا عانا باعى­ناتىن، جاڭا جانە ادىلەتتى قازاقستان ورناتۋ جولىندامىز. ادىلدىك پەن ادال­دىقتىڭ ءبىر شارتى – بەرگەن سەرتكە بەرىك­تىك. الەمدەگى ەڭ بەدەلدى قاۋىم­داس­تىق – بىرىككەن ۇلتتار ۇيىمى مان­داتى­مەن قىزمەت اتقاراتىن بىتىمگەر قاتارىندا بولۋ – سەرتىمىزگە ادالدىقتىڭ بەلگىسى.

 

مۇحتار قۇل-مۇحاممەد،

پارلامەنت سەناتى حالىقارالىق قاتىناستار،

قورعانىس جانە قاۋىپسىزدىك كوميتەتىنىڭ توراعاسى

سوڭعى جاڭالىقتار

اۋەزوۆ جانە تۇركى الەمى

رۋحانيات • كەشە

يدەولوگيا

رۋحانيات • كەشە

مەيىرىم مەن قاتىگەزدىك

رۋحانيات • كەشە

ەسكى مەن جاڭا اراسى

رۋحانيات • كەشە

بي پاديشاسى

رۋحانيات • كەشە

ساپا قايتسە جاقسارادى؟

قازاقستان • كەشە

قايىرىمدىلىقتىڭ ۇلگىسى

قازاقستان • كەشە

ساق ءداۋىرىنىڭ تاسى

تانىم • كەشە

ۇقساس جاڭالىقتار