ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا كومپانيا وكىلىنە «قتج ءاليا نازارباەۆانىڭ «Instant Payments» كومپانياسىمەن جاسالعان شارتتى قاشان بۇزادى؟» دەگەن ساۋال قويىلدى.
بۇل ساۋالعا «قازاقستان تەمىر جولى» اق ۇلتتىق كومپانياسىنىڭ ساتۋ جانە كليەنتتەرمەن جۇمىس جۇرگىزۋ دەپارتامەنتىنىڭ ديرەكتورى ەرلان جامايىلوۆ جاۋاپ بەردى.
«بيىلعى اقپان ايىنان باستاپ ءتيىستى ءراسىمدى جۇرگىزىپ جاتىرمىز. 18 ناۋرىزدا شارتتى بۇزۋ تۋرالى كەلىسىم جاسالدى. وعان ەكى تاراپ قول قويدى. بىراق بۇل وندىرىستىك پروتسەسس بولعاندىقتان, جولاۋشىلاردىڭ بيلەت ساتىپ الۋىنا كەدەرگى كەلتىرمەي, تاسىمالداۋ قىزمەتىندە اقاۋ بولماس ءۇشىن بىرتىندەپ ءوتۋىمىز كەرەك. بۇگىنگى تاڭدا جاڭا ۇلگىدەگى شارتتى كەلىسۋ جانە اشىق تەندەر قۇجاتتارىن راسىمدەپ جاتىرمىز», دەدى ول.
ونىڭ ايتۋىنشا, كەلىسىم پروتسەدۋراسى «سامۇرىق-قازىنا» ءال-اۋقات قورى بەكىتكەن ەرەجەگە سايكەس جۇرەدى.
«بۇگىنگى تاڭدا ۇلگىلىك شارتتى كەلىسۋ ءراسىمى جۇرگىزىلىپ جاتىر, سودان كەيىن شارت بەكىتىلەدى. اراعا 45 كۇن سالىپ شارت رەسمي سايتقا جاريالانادى. ونداعى ماقسات – كەز كەلگەن ادام تانىسۋى ءۇشىن جانە اشىق تەندەرگە نيەت بىلدىرۋشىلەر ەركىن قاتىسا الادى. تەندەردى وسى جازدىڭ سوڭىنا دەيىن وتكىزۋ جوسپارلانىپ وتىر», دەدى ەرلان جامايىلوۆ.
