شاراعا ارمەنيانىڭ ۇكىمەت باسشىسى نيكول پاشينيان, بەلارۋس ۇكىمەتىنىڭ باسشىسى رومان گولوۆچەنكو, قىرعىزستاننىڭ ۇكىمەت باسشىسى اكىلبەك جاپاروۆ, قازاقستاننىڭ پرەمەر-ءمينيسترى ءاليحان سمايىلوۆ, رەسەيدىڭ ۇكىمەت باسشىسى ميحايل ميشۋستين, ەۋرازيالىق ەكونوميكالىق كوميسسيا القاسىنىڭ توراعاسى ميحايل مياسنيكوۆيچ قاتىستى.
شاعىن جانە كەڭەيتىلگەن قۇرامدا وتكەن كەڭەس وتىرىستارىندا ەۋرازيالىق ەكونوميكالىق وداقتىڭ بىرىكتىرىلگەن اقپاراتتىق جۇيەسىن دامىتۋ, تاۋارلاردى تاڭبالاۋدى جۇرگىزۋ, الكوگول نارىعىن رەتتەۋ جانە ەلەكتروندىق ساۋدا كەزىندە سالىق سالۋ ماسەلەلەرى تالقىلاندى.
بۇعان دەيىن تسيفرلىق تاڭبالاۋ وداققا مۇشە مەملەكەتتەردىڭ ۆيتسە-پرەمەرلەرى دەڭگەيىندە كوميسسيا كەڭەسىنىڭ 2022 جىلعى 19 مامىرداعى № 83 «ەۋرازيالىق ۇكىمەتارالىق كەڭەس جارلىعىنىڭ جوباسى تۋرالى» شەشىمىمەن قولداۋ تاپقان ەدى.
22 ماۋسىمدا ەاەو-دا دارىلىك زاتتاردى تاڭبالاۋدى ەنگىزۋ ماسەلەلەرى بويىنشا ساراپشىلار كەزدەسۋى ءوتتى. وتىرىس ناتيجەسىندە كوميسسيا كەڭەسىنىڭ «دارىلىك زاتتاردى سايكەستەندىرۋ قۇرالدارىمەن تاڭبالاۋدى ەنگىزۋ تۋرالى» شەشىمىنىڭ جوباسىن پىسىقتاۋ قاجەتتىگى تۋرالى شەشىم قابىلداندى.
ەسكە سالايىق, تاۋارلاردى تسيفرلىق تاڭبالاۋ ەاەو اۋماعىندا جۇزەگە اسىرىلاتىن حالىقارالىق جوبا. مىندەتتى تسيفرلىق تاڭبالاۋدى ەنگىزگەننەن كەيىن كولەڭكەلى اينالىم ۇلەسىنىڭ ايتارلىقتاي تومەندەۋى مۇمكىن, ماسەلەن قازاقستاننىڭ جەڭىل ونەركاسىپ نارىعىندا جالپى اينالىمنىڭ 63%-عا, اياق كيىم نارىعىندا 48,5%-عا, الكوگول نارىعىندا 25%-عا, جانە فارماتسەۆتيكا ونەركاسىبىندە 12%-عا تومەندەيدى.
سونىمەن قاتار تاڭبالاۋ جۇيەسىن ەنگىزۋ IT نارىعىنىڭ, قاپتامالار مەن جابدىقتاردى وندىرۋشىلەرگە قىزمەت كورسەتۋدىڭ دامۋىنا سەرپىن بەرەدى. تاڭبالاۋ مەن قاداعالاۋدىڭ بىرىڭعاي اقپاراتتىق جۇيەسىنىڭ كومەگىمەن تاۋارلاردى قابىلداۋ جانە بەرۋ, قايتارۋ, قابىلداماۋ, اينالىمنان شىعارۋ پروتسەستەرىن راستايتىن اقپاراتتارمەن تسيفرلىق ورتا جاسالادى.
