كونستيتۋتسيانىڭ 53-بابىنىڭ 5-تارماقشاسىنا سايكەس, پرەزيدەنت ۇسىنىسى بويىنشا پارلامەنت پالاتالارىنىڭ بىرلەسكەن وتىرىسىندا حالىقارالىق مىندەتتەمەلەردى ورىنداۋ ءۇشىن رەسپۋبليكانىڭ قارۋلى كۇشتەرىن پايدالانۋ تۋرالى شەشىم قابىلدايدى.
وسىعان بايلانىستى, قر قورعانىس ءمينيسترى رۋسلان جاقسىلىقوۆ مەملەكەت باسشىسىنىڭ ۇسىنىسىن وقىپ بەردى.
«قازىرگى ۋاقىتقا دەيىن قارۋلى كۇشتەردىڭ اسكەري قىزمەتشىلەرى پارلامەنت قاۋلىلارىنا سايكەس, بەيبىتشىلىك پەن قاۋىپسىزدىكتى قولداۋ جونىندەگى حالىقارالىق مىندەتتەمەلەردى ورىنداۋ ءۇشىن بۇۇ بىتىمگەرشىلىك ميسسيالارىنا جىبەرىلىپ وتىردى. 2014 جىلدان باستاپ 45 وفيتسەر باتىس ساحارادا, كوت-د-يۆۋاردا, ليۆانداعى ميسسياعا اسكەري بايقاۋشى جانە شتاب-وفيتسەرى رەتىندە, 2018 جىلدان باستاپ – 520 اسكەري قىزمەتشى بىتىمگەرشىلىك بولىمشە قۇرامىندا ليۆانداعى ۋاقىتشا كۇشتەر ميسسياسىنا قاتىستى. قازىر باتىس ساحارادا – 6, ليۆانداعى ۋاقىتشا كۇشتەردە – 9 اسكەري قىزمەتشى ءجۇر», دەپ جازىلعان پرەزيدەنت ۇسىنىمىندا.
ونىڭ ايتۋىنشا, ۇيىم باسشىلىعى ءبىزدىڭ اسكەريلەردىڭ دايارلىق دەڭگەيىن جوعارى باعالاپ, بىتىمگەرلەر سانىن ارتتىرۋعا قولداۋ كورسەتۋگە دايىن ەكەنىن ءبىلدىردى. كونتينگەنتتى بىتىمگەرشىلىك وپەراتسياسىنا جىبەرىپ, جاھاندىق قاۋىپسىزدىكتى نىعايتۋعا ۇلەس قوسۋ قازاقستاننىڭ حالىقارالىق ارەناداعى بەدەلى مەن ءرولىن ارتتىرۋعا ىقپال ەتەدى.
«ومىردە جانە الەمدە بولىپ جاتقان سوڭعى وقيعالار قاۋىپسىزدىككە تونەتىن سىن-قاتەردى جوققا شىعارمايدى. وسىعان بايلانىستى اسكەردىڭ جاۋىنگەرلىك ازىرلىگىن ودان ءارى نىعايتۋ قازىرگى سىن-قاتەرگە قارسى ارەكەت ەتۋدە تاجىريبە جيناقتاۋ ماسەلەسى وزەكتى بولىپ وتىر. وسى تۇرعىدا ۇيىم جارعىسىنىڭ 7-تاراۋىنا سايكەس, قارۋلى كۇشتەردىڭ ورتالىق افريكادا, كونگو دەموكراتيالىق رەسپۋبليكاىندا, ماليدە بىتىمگەرشىلىك ميسسياعا قاتىسۋىن كەڭەيتۋدى ورىندى دەپ سانايمىن», دەيدى ق. توقاەۆ.
قازاقستان شتاب وفيتسەرى, اسكەري بايقاۋشى رەتىندە قازىرگى ۋاقىتتا ميسسيادا اناعۇرلىم تاپشى بولىپ وتىرعان جاياۋ اسكەر, مەديتسينالىق بارلاۋ, ينجەنەرلىك, اسكەري پوليتسيا بولىمشەسىن بولۋگە دايىن.
«كونستيتۋتسيانىڭ 53-بابىنا سايكەس, بىتىمگەرشىلىك كونتينگەنت جالپى سانى 430 اسكەري قىزمەتشىنى ءبىرىنشى – ورتالىق افريكاداعى تۇراقتاندىرۋ جونىندەگى ميسسياعا, ەكىنشى – كونگو دەموكراتيالىق رەسپۋبليكاسىنداعى تۇراقتاندىرۋ جونىندەگى ميسسياعا, ءۇشىنشى ماليدەگى تۇراقتاندىرۋ جونىندەگى ميسسياعا, ءتورتىنشى – ليۆانداعى ۋاقىتشا كۇشتەر ميسسياسىنا جىبەرۋ تۋرالى ۇسىنىس ەنگىزەمىن», دەپ جازىلعان پرەزيدەنت ۇسىنىسىندا.
بىرلەسكەن پالاتا وتىرىسىندا دەپۋتاتتار پرەزيدەنت ۇسىنىسىن قابىلدادى.
