ەكولوگيا, گەولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتى حابارلاعانداي, بۇل جۇمىس بالىق رەسۋرستارىن مولايتۋ جونىندەگى مەملەكەتتىك تاپسىرىس شەڭبەرىندە بەكىرە تۇقىمداس بالىق تۇرلەرىنىڭ قورلارىن ساقتاۋ جانە قالپىنا كەلتىرۋ ماقساتىندا جىل سايىن جۇرگىزىلەدى.
«بەكىرە شاباقتارىن سۋ ايدىندارىنا جىبەرۋ بۇقارالىق اقپارات قۇرالدارىنىڭ قاتىسۋىمەن جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسى قىزمەتكەرلەرىنىڭ, جەرگىلىكتى اتقارۋشى ورگان, قوعامدىق جانە عىلىمي ۇيىمدار وكىلدەرىنىڭ قاتىسۋىمەن كوميسسيالىق تۇردە جۇزەگە اسىرىلدى. بەكىرە تۇقىمداس بالىقتاردىڭ شاباقتارى (قورتپا, شوقىر, ورىس بەكىرەسى, سۇيرىك) زاۋىتتا جاساندى تۇردە وسىرىلگەنىن اتاپ وتكەن ءجون», دەلىنگەن مينيسترلىك حابارلاماسىندا.
جىل سايىن زاۋىت جايىق وزەنىنىڭ ۇيىقتىق ۋچاسكەلەرىندە بەكىرە تۇقىمداس بالىق تۇرلەرىنىڭ وندىرۋشىلەرىن (اتالىق جانە انالىق) اۋلايدى, ودان ءارى ينكۋباتسيالاۋ ءۇشىن ولاردان ءتىرى كەزىندە جىنىستىق ونىمدەر (ۋىلدىرىق جانە شوعال) الادى. مىسالى, وسى جىلدىڭ 19 ساۋىرىندە ۇستالعان, سالماعى 190 كەلى قورتپادان ۋىلدىرىق العاننان كەيىن تابيعي مەكەن ەتۋ ورتاسى ءۇشىن ورتاشا سالماعى 15 گرامم 729 مىڭ دانا شاباق الىندى, ولار بۇگىن وزەنگە جىبەرىلدى. سونىمەن قاتار 629 مىڭ دانا سۇيرىك, 419 مىڭ دانا ورىس بەكىرەسى جانە 1,723 ملن دانا ورىس بەكىرەسىنىڭ شاباقتارى جىبەرىلدى.
«جالپى 2022 جىلى مەملەكەتتىك تاپسىرىس شەڭبەرىندە تابيعي مەكەندەۋ ورتاسىنا 93,1 ملن دانا قۇندى بالىق تۇرلەرىنىڭ شاباقتارىن, ونىڭ ىشىندە 7,5 ملن دانا بەكىرە شاباقتارىن جىبەرۋ جوسپارلانعان. بۇگىنگى كۇنى مەملەكەتتىك كاسىپورىندار مەن جەكە بالىق ءوسىرۋ شارۋاشىلىقتارى 69,4 ملن دانا بالىق شاباقتارىن ءوسىرىپ, تابيعي مەكەندەۋ ورتاسىنا جىبەردى», دەلىنگەن حابارلامادا.
بۇل رەتتە بالىق رەسۋرستارىن جاساندى جولمەن مولايتۋ جونىندەگى جۇمىستار جالعاسۋدا جانە ونى اعىمداعى جىلدىڭ قازان ايىندا اياقتاۋ جوسپارلانىپ وتىر.
