مەديتسينا • 30 ماۋسىم، 2022

ايتۆ ينفەكتسياسىن انىقتادى

12 رەت كورسەتىلدى

«وليمپ» كلينيكالىق-دياگنوستيكالىق زەرتحاناسى ادامنىڭ يممۋن تاپشىلىعى ۆيرۋسىن (ايتۆ) انىقتاۋعا باعىتتالعان زەرتتەۋدى ەكى جىلدان بەرى جۇرگىزىپ كەلەدى.

– وسى ۋاقىت ارالىعىندا زەرتحانادا ايتۆ ينفەكتسياسىنا 105 مىڭ ادام تەكسەرىلدى. ايتۆ 225 پا­تسيەنتتەن انىقتالدى، ونىڭ ىشىن­دە 130 ادامنان ينفەكتسيا العاش رەت تابىلعان، – دەپ حابارلادى «كدل وليمپ» جشس باس ديرەكتورى ەرلان سۇلەيمەنوۆ.

زەرتحانا باسشىسى ينفەكتسيا­نىڭ العاش رەت انىقتالۋى جايىندا ناقتىراق ايتتى.

– ايتۆ ينفەكتسياسىن انىق­تاعاندا ءبىز وڭ سىنامالاردى جيتس ورتالىقتارىنا (جۇقتىرىلعان يممۋن تاپشىلىعى سيندرومىنىڭ الدىن الۋ جانە وعان قارسى كۇرەس ورتالىقتارى) ناتيجەلەرىن راستاۋ ءۇشىن جىبەرەمىز. كەيدە ءبىرشاما پاتسيەنتكە بۇعان دەيىن ايتۆ دياگنوزى قويىلعانى، ول ادامدار تۋرالى مالىمەت جيتس ورتا­لىقتارىندا بار ەكەندىگى انىق­تالادى. بىراق ايتۆ ينفەكتسياسى انىقتالعان پاتسيەنتتەردىڭ جارتىسىنان كوبى وسى ۋاقىتقا دەيىن وزدەرىندە جۇقپا بارىن بىلمەگەن، ولارعا بۇل دياگنوز العاش رەت قويىلىپ وتىر. ياعني بۇل جاعداي جەكەمەنشىك زەرتحانالاردا ايتۆ-گە تەكسەرىلۋدىڭ قولجەتىمدىلىگى ينفەكتسيانى انىقتاۋ كورسەتكىشىن ارتتىراتىنىن دالەلدەپ وتىر، – دەپ اتاپ ءوتتى ە.سۇلەيمەنوۆ.

زەرتحانا جەتەكشىسى ايتۆ-عا قارالۋ نەعۇرلىم وڭاي بولسا، سو­عۇر­لىم كوپ ادام ءوزىنىڭ ايتۆ-مار­تەبەسىن انىقتاي الادى دەپ سا­نايدى. ال بۇل ءوز كەزەگىندە جۇق­پانى ەرتە كەزەڭدە، پاتسيەنت ءوز مار­تەبەسىن بىلمەي ينفەكتسيانى كوپ ادامعا جۇقتىرىپ ۇلگەرمەگەن كەزدە انىقتاپ، ۆيرۋسقا قارسى ەمدى ۋاقتىلى باستاۋ مۇمكىندىگىن ارتتىرادى.

– جالپى قان تالداۋىن تاپسىرۋ قانشالىقتى وڭاي بولسا، ايتۆ-عا قارالۋ دا سونداي جەڭىل بولۋى قاجەت. سەبەبى ادامداردىڭ بارلىعى ايتۆ-عا تەكسەرىلۋ ءۇشىن جيتس ورتالىقتارى مەن تۇرعى­لىقتى جەرلەرى بويىنشا بەكىتىلگەن ەمحانالارعا ارنايى بارۋعا دايىن دەپ ايتا المايمىز. جەكەمەنشىك زەرتحانالار كەرىسىنشە جەر-جەردە ورنالاسقان، سول ارقىلى ادامدار وزىنە قولايلى جەردە ايتۆ-عا تالداۋ تاپسىرا الادى. بۇل جۇقپانىڭ بولۋى ىقتي­مال ادامداردىڭ نە­عۇر­لىم كوپ سانىن تەكسەرۋمەن قامتۋعا ىقپال ەتەدى، – دەيدى ە.سۇلەيمەنوۆ.

ينفەكتسيانىڭ نەگىزگى تارالۋ جولى – قورعالماعان جىنىستىق قاتىناستار. سونداي-اق ايتۆ-نى ستەريلدى ەمەس قۇرالدار ارقىلى مەديتسينالىق، كوسمەتولوگيالىق جانە وزگە مانيپۋلياتسيالار كەزىندە دە جۇقتىرۋ مۇمكىن.

تالداۋ ءۇشىن كوكتامىر قانى قولدانىلادى.

ايتۆ ينفەكتسياسىنىڭ مار­كەرلەرى قاندا جۇقتىرۋدان كەيىن بىرنەشە اپتا وتكەن سوڭ عانا بىلىنە باستايدى. سوندىقتان ايتۆ-نى انىقتاۋعا باعىتتالعان تالداۋدى ىقتيمال جۇقتىرۋدان كەيىن كەم دەگەندە ءبىر اي وتكەن سوڭ تاپسىرۋ ۇسىنىلادى.

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار