قازاقستاننىڭ ءۇشىنشى جەر سەرىگى عارىشقا ۇشادى دەپ كۇتىلۋدە

استانا. 25 ءساۋىر. زىمىران تاسىعىش «پروتون-م» مەن ەلىمىزدىڭ «قازسات-3» جانە رەسەيدىڭ «لۋچ-5ۆ» اپپاراتتارى بايقوڭىر عارىش ايلاعىنىڭ ۇشىرۋ كەشەنىنە جەتكىزىلدى. بۇل تۋرالى Aviation Explorer. ru حابارلادى. 28 ساۋىردە استانا ۋاقىتىمەن ساعات 8:25-تە «پروتون-م» زىمىران تاسىعىشى «قازسات-3» جانە «لۋچ-5ۆ» عارىشتىق اپپاراتتارىن كوككە الىپ ۇشادى. ەستەرىڭىزگە سالار بولساق, «رەسپۋبليكالىق عارىشتىق بايلانىس ورتالىعى» اكتسيونەرلىك قوعامىنىڭ تاپسىرىسىمەن جاسالعان «قازسات-3» 2014 جىلعى 24 ناۋرىزدا رەسەيدىڭ كراسنويارسك قالاسىنان بايقوڭىر عارىش ايلاعىنا جەتكىزىلگەن بولاتىن. وسى جەردە سالماعى 2 تونناعا جۋىق عارىشتىق اپپاراتتى سوڭعى رەت تەكسەرۋدەن وتكىزىپ, ۇشىرۋعا دايىندادى. مامانداردىڭ ايتۋىنشا, «قازسات-3» «قازسات-2-گە» قاراعاندا بىرقاتار سيپاتتاماسى جانە وربيتالىق نۇكتەسى جاقسى كورىنەدى. اتالىپ وتىرعان جەر سەرىگى رەسەيدىڭ رەشەتنەۆ اتىنداعى اقپاراتتىق جەر سەرىگى جۇيەلەرى كومپانياسىندا 3 جىل بويى قۇراستىرىلدى. سودان كەيىن قازاقستان تاراپىنا ونىڭ قاجەتتى سىناقتان ءوتىپ, ۇشىرۋعا دايىن ەكەندىگى حابارلانىپ جانە ءتيىستى تەحنيكالىق قۇجاتتارى ۇسىنىلدى. «رەسپۋبليكالىق عارىشتىق بايلانىس ورتالاعى» ماماندارىنىڭ ايتۋىنشا, اتالعان اپپاراتتىڭ 15 جىلداي جۇمىس ىستەۋگە مۇمكىندىگى بار ەكەن. ەگەر «قازسات-3» جۇمىسىن ءساتتى باستاسا, كوكتەگى «قازسات-2» جەر سەرىگىمەن بىرلەسە قىزمەت كورسەتپەك. بۇل ەكەۋىنىڭ ارقاسىندا وتاندىق تەلەكوممۋنيكاتسيا جۇيەسىنىڭ سەنىمدىلىگى ارتادى. سونىمەن بىرگە, شەتەلدىك عارىش سالاسى كومپانيالارىنا جۇگىنۋىمىز ازايا تۇسپەك. ارينە, مۇنداي جوبالار قازاقستاننىڭ بەدەلىن كوتەرىپ, دامىعان وتىز ەلدىڭ قاتارىنا كىرۋىمىزگە ءوز ۇلەسىن قوساتىنى بەلگىلى. تاعى ءبىر ەرەكشە توقتالا كەتەر ءجايت, ەگەر «قازسات-3» كوزدەلگەن جەرىنە جەتكىزىلسە, وتاندىق ەكى بىردەي جەر سەرىگى ەلىمىزدىڭ اۋماعىنان باسقارىلماق. سوڭعى 10 جىل كولەمىندە عارىش سالاسى بويىنشا اتقارىلعان جۇمىستار وتە كوپ. سونىڭ ناتيجەسىندە قازاقستان عارىشتىق تەحنولوگيالارى جەتىلگەن مەملەكەتتەردىڭ قاتارىنا قوسىلدى. جولدىباي بازار. دەرەككوز: Aviation Explorer. ru. فوتو: Gazeta.kz.