«2022 جىلعى 1 ماۋسىمداعى جاعداي بويىنشا جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 16 424 شەتەل ازاماتى ەڭبەك ەتەدى», دەلىنگەن ۆەدومستۆو اقپاراتىندا.
شەتەل جۇمىس كۇشىن تارتۋعا كۆوتا كەلەسى ساناتتارعا بەرىلگەن:
- باسشىلار مەن ولاردىڭ ورىنباسارلارى ءۇشىن 617 رۇقسات ء(بىرىنشى سانات);
- قۇرىلىمدىق بولىمشەلەردىڭ باسشىلارى ءۇشىن 3 224 رۇقسات (ەكىنشى سانات).
- ماماندارعا 8 020 رۇقسات;
- بىلىكتى جۇمىسشىلارعا 926 رۇقسات;
- ماۋسىمدىق جۇمىستارعا 1 506 رۇقسات;
- كورپوراتيۆتىك اۋىستىرۋ اياسىندا 2 131 رۇقسات.
مينيسترلىك مالىمەتىنە سايكەس, قازىرگى ۋاقىتتا قازاقستاندا ەڭبەك ميگرانتتارىنىڭ قىزمەتىن پايدالاناتىن 1 762 جۇمىس بەرۋشى بار. ولاردا قازاقستاننىڭ 398 مىڭنان استام ازاماتى جۇمىس ىستەيدى, بۇل قىزمەتكەرلەردىڭ جالپى سانىنىڭ 96%. ەڭبەك ميگرانتتارى كەلەتىن نەگىزگى ەلدەر: قىتاي – 3 651 ادام, تۇركيا – 1 853 ادام, وزبەكستان – 1 605 ادام, ءۇندىستان – 1 577 ادام, ۇلىبريتانيا – 1 113 ادام.
ايتا كەتەيىك, ىشكى ەڭبەك نارىعىن قورعاۋ ماقساتىندا قر ەڭبەك جانە حالىقتى الەۋمەتتىك قورعاۋ مينيسترلىگى شەتەل ماماندارىن تارتۋعا جىل سايىن كۆوتا بولەدى. 2022 جىلعا جوسپارلانعان 28 352 كۆوتا سانى 23 560-قا دەيىن, ياعني 4 792 ادامعا (16%) ازايتىلدى.
ايانا توعانبەك
